ရန်ကုန်တိုင်း၊သာကေတမြို့နယ်၊ရှုခင်းသာမြို့ပတ်လမ်းတွင် နိုဝင်ဘာ ၁၄ ရက်(ယနေ့)နေ့လည်ပိုင်းက ကွန်တိန်နာကားတစ်စီးအရှိန်မထိန်းနိုင်ဘဲ တိမ်းမှောက်ခဲ့သည်။
ယနေ့နေ့လည် ၁ နာရီကျော်ခန့်က သံလျင်ဘက်မှ ရှုခင်းသာလမ်းမကြီးအတိုင်းမောင်းနှင်လာသည့် ကွန်တိန်နာကားသည် ရှုခင်းသာမြို့ပတ်လမ်း၏ ငါးကွေ့မှတ်တိုင်အနီးအရောက် အရှိန်မထိန်းနိုင်ဘဲတိမ်းမှောက်ခဲ့ခြင်းဖြစ်သည်။
ဖြစ်စဥ်ကြောင့် ကားမောင်းသူနှင့်ယာဥ်နောက်လိုက်တို့တွင် ထိခိုက်ဒဏ်ရာများ(မစိုးရိမ်ရ)ရရှိခဲ့သဖြင့် ရှုခင်းသာ လူမှုကူညီရေးပရဟိတအသင်းမှ အရေးပေါ်ပြုစုကုသပေးမှုများပြုလုပ်ပေးခဲ့ကြကြောင်း သိရသည်။
“ကွန်တိန်နာမှောက်ပြီး ဒဏ်ရာရတာက ကားသမားနဲ့စပယ်ယာပါ ပွန်းပဲ့ဒဏ်ရာတွေပေါ့ တခြားလူတွေထိခိုက်ဒဏ်ရာရတာမရှိပါဘူး မှောက်သွားတဲ့ကားကိုတော့အခု သယ်သွားပါပြီ”ဟု သာကေတမြို့နယ်လူမှုကူညီရေးအဖွဲ့၏ သတင်းပြန်ကြားရေးတာဝန်ခံကိုဇင်လင်းမောင်ကပြောသည်။
ထိခိုက်ဒဏ်ရာရရှိခဲ့သည့် ကားမောင်းသူနှင့်ယာဥ်နောက်လိုက်တို့အား ရှုခင်းသာ လူမှုကူညီရေးပရဟိတအသင်း၏ လူနာတင်ကားဖြင့် ရန်ကုန်ပြည်သူ့ဆေးရုံကြီးသို့ ဆေးကုသမှုခံယူရန် ပို့ဆောင်ပေးခဲ့ကြကြောင်း သိရသည်။