သယ်ယူပို့ဆောင်ရေးလုပ်ငန်းများ ရင်ဆိုင်နေရသည့် စိန်ခေါ်မှုများနှင့် အာမခံဆိုင်ရာ အသိပညာများကို မျှဝေဆွေးနွေးရန် ရည်ရွယ်သည့် “သယ်ယူပို့ဆောင်ရေးလုပ်ငန်းဆိုင်ရာ စိန်ခေါ်မှုများနှင့် အာမခံ” ခေါင်းစဉ်ဖြင့် Panel Discussion (စကားဝိုင်းဆွေးနွေးပွဲ) ကို ဇူလိုင် ၄ ရက်တွင် ကျင်းပသွားမည်ဖြစ်ကြောင်း မြန်မာနိုင်ငံ အဝေးပြေးကုန်စည်ပို့ဆောင်ရေး ဝန်ဆောင်မှုလုပ်ငန်းရှင်များအသင်း (MHFTSA) က ထုတ်ပြန်သည်။
အဆိုပါ စကားဝိုင်းကို Logistics & Supply Chain Management Magazine၊ MHFTSA နှင့် Venture Synergy Co., Ltd တို့ ပူးပေါင်းစီစဉ်ကာ EFI General Insurance မှ အဓိကပံ့ပိုးကျင်းပခြင်းဖြစ်သည်။
ဆွေးနွေးပွဲတွင် ကုန်စည်ပို့ဆောင်ရေးလုပ်ငန်းများ ရေရှည်တည်တံ့ခိုင်မြဲစေရေး၊ လုပ်ငန်းအတွင်း ကြုံတွေ့နိုင်သည့် ဆုံးရှုံးနိုင်ခြေအန္တရာယ်များကို အာမခံဖြင့် ထိရောက်စွာ ကာကွယ်နိုင်ရေးနှင့် သက်ဆိုင်သည့် အကြောင်းအရာများကို ဆွေးနွေးသွားမည်ဖြစ်ကြောင်း သိရသည်။
ထို့ပြင် အသင်းဝင်လုပ်ငန်းရှင်များ၊ ဂိတ်တာဝန်ခံများနှင့် ယာဉ်ပိုင်ရှင်များကို တက်ရောက်ရန် ဖိတ်ခေါ်ထားပြီး မိမိတို့ လုပ်ငန်းခွင်တွင် လက်တွေ့ကြုံတွေ့နေရသည့် အာမခံနှင့် သယ်ယူပို့ဆောင်ရေးဆိုင်ရာ အခက်အခဲများကို သက်ဆိုင်ရာ ကျွမ်းကျင်ပညာရှင်များအား တိုက်ရိုက် မေးမြန်းဆွေးနွေးနိုင်မည်ဖြစ်ကြောင်း သိရသည်။
စကားဝိုင်းဆွေးနွေးပွဲကို ဇူလိုင် ၄ ရက် မွန်းလွဲ ၁ နာရီမှ ညနေ ၄ နာရီအထိ ရန်ကုန်မြို့၊ ဘုရင့်နောင်ကုန်စည်ဒိုင် အပေါ်ဆုံးထပ်ရှိ အစည်းအဝေးခန်းမ တွင် ကျင်းပသွားမည်ဖြစ်ကြောင်း ထုတ်ပြန်ထားသည်။