အမေရိကန်သမ္မတ ဒေါ်နယ်ထရမ့် အစိုးရ၏ မူဝါဒများကို ဆန့်ကျင်ကန့်ကွက်ရန် ဝါရှင်တန်မြို့ရှိ လမ်းမများပေါ်တွင် လူထောင်ပေါင်းများစွာ ထွက်ပေါ်လာခဲ့ကြသည်။
“ဘုရင်များ မလို” (No Kings) ဆိုသည့် ကြွေးကြော်သံအောက်တွင် စုဝေးခဲ့ကြသည့် ဆန္ဒပြသူများသည် မြို့လယ်ခေါင်တွင် စုရုံးပြီး ပင်ဆယ်ဗေးနီးယား ရိပ်သာလမ်း (Pennsylvania Avenue) အတိုင်း ကက်ပီတယ်လ်ကုန်း (Capitol Hill) ဆီသို့ ချီတက်ခဲ့ကြသည်။ ၎င်းတို့အထဲတွင် ဒီမိုကရက်တစ်ပါတီမှ ကွန်ဂရက်အမတ်များလည်း ပါဝင်ခဲ့ကြသည်။ အမျိုးသားအစောင့်တပ်ဖွဲ့များ တာဝန်ထမ်းဆောင်နေခဲ့သော်လည်း သူတို့ ဝင်ရောက်ဖြေရှင်းရန် လိုအပ်မည့် အခြေအနေမျိုးအထိ မဖြစ်ပျက်ခဲ့ချေ။
အောက်တိုဘာလ ၁၈ ရက်နေ့တွင် “ဘုရင်များ မလို” ဟူသည့် ကြွေးကြော်သံဖြင့် ဆန္ဒပြပွဲများ အမေရိကန် နိုင်ငံတစ်ဝန်းတွင် ကျင်းပလျက်ရှိသည်။ စီစဉ်သူများက ယနေ့တွင် အမေရိကန်ပြည်ထောင်စု၌ အနည်းဆုံး ဆန္ဒပြပွဲ ၂,၆၀၀ ကို မျှော်မှန်းထားပြီး၊ ၎င်းသည် ခေတ်သစ်အမေရိကန်သမိုင်းတွင် အကြီးကျယ်ဆုံး ငြိမ်းချမ်းသော ဆန္ဒပြပွဲ ဖြစ်လာစေရန် စီစဉ်ထားသည်။
ယခင်က “ဘုရင်များ မလို” ဆန္ဒပြပွဲများကို ထရမ့်၏ မွေးနေ့နှင့် ဝါရှင်တန်ရှိ စစ်ရေးပြအခမ်းအနားနေ့ ဖြစ်သည့် ဇွန်လ ၁၄ ရက်နေ့တွင် ကျင်းပခဲ့သေးသည်။ ထိုစဉ်က အမေရိကန်တစ်ဝန်းတွင် အနည်းဆုံး ဆန္ဒပြပွဲ ၂,၁၀၀ ခန့် ဖြစ်ပွားခဲ့ပြီး လူပေါင်း ၅ သန်းခန့် ပါဝင်ခဲ့ကြသည်။