မန္တလေးတိုင်း၊သပိတ်ကျင်းမြို့နယ်အားဗဟိုပြု၍ ဖေဖော်ဝါရီ ၄ ရက်(ယနေ့)မွန်းလွဲပိုင်းက အင်အားအနည်းငယ်ရှိ ငလျင်လှုပ်ခတ်ခဲ့သည်ဟု မြန်မာနိုင်ငံ မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရသည်။
ယနေ့မွန်းလွဲ ၂ နာရီ ၄ မိနစ် ၄၄ စက္ကန့်က သပိတ်ကျင်းမြို့၏ အရှေ့တောက်ဘက်(၉)မိုင်ခန့်အကွာ၊မြောက်လတ္တီတွဒ်(၂၂ ဒသမ ၇၆)ဒီဂရီ၊အရှေ့လောင်ဂျီတွဒ်(၉၆ ဒသမ ၀၄)ဒီဂရီ၊အနက် (၁၂)ကီလိုမီတာအား ဗဟိုပြု၍ အင်အားရစ်(ခ်) တာစကေး(၄ ဒသမ ၆)အဆင့်ရှိ အင်အားအနည်းငယ်ရှိသည့် ငလျင်လှုပ်ခတ်ခဲ့ကြောင်း သိရသည်။
မန္တလေးတိုင်းအတွင်း၌ ၂၀၂၂ ခုနှစ်ဒီဇင်ဘာလအတွင်းကလည်း ငလျင်လှုပ်ခတ်မှုများ ဖြစ်ပွားခဲ့သဖြင့် ပျက်စီးမှုများဖြစ်ပေါ်ခဲ့ပြီးဖြစ်ကြောင်း သိရသည်။
“ဒီနေ့လှုပ်တဲ့ငလျင်က အနည်းအကျဥ်းကြမ်းတယ်လို့ပြောရမှာပေါ့ ဒီဇင်ဘာလကလှုပ်သွားတဲ့ ငလျင်တွေကြောင့် ပျက်စီးသွားတာတွေကိုပြန်ပြီးပြင်ဆင်နေတုန်းပဲရှိသေးတယ် အခုထပ်လှုပ်တာပါ ဒီတစ်ခါလှုပ်တာပျက်စီးမှုတော့မရှိဘူး အသင်းက ကလေးတွေတော့လိုက်ကြည့်နေကြတယ်”ဟု သပိတ်ကျင်းမြို့အခြေစိုက် လူမှုကူညီရေးအသင်းဝင်တစ်ဦးကပြောသည်။
ဖေဖော်ဝါရီ ၂ ရက်နံနက် ၇ နာရီ ၃၄ မိနစ် ၅၃ စက္ကန့်ကလည်း ရခိုင်ပြည်နယ်၊အမ်းမြို့အားဗဟိုပြု၍ အင်အားရစ်(ခ်)တာစကေး(၄ ဒသမ ၃)အဆင့်ရှိ အင်အားအနည်းငယ်ရှိသော ငလျင်လှုပ်ခတ်ခဲ့ကြောင်း သိရသည်။