ပြန်ကြားရေးဝန်ကြီးဌာန ပြည်ထောင်စုဝန်ကြီးဦးမောင်မောင်အုန်း၊အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကိုကိုလှိုင်၊နိုင်ငံခြားရေးဝန်ကြီးဌာန ဒု-ဝန်ကြီး ဦးကျော်မျိုးထွဋ်တို့သည် ဇွန် ၇ ရက်က အိန္ဒိယနိုင်ငံ၊နယူးဒေလီမြို့အခြေစိုက် တောင်အာရှနိုင်ငံခြားသတင်းထောက်များအသင်းဥက္ကဋ္ဌ Mr. Shirumalla Venkat Narayan နှင့် နေပြည်တော်၌ အသီးသီးတွေ့ဆုံဆွေးနွေးခဲ့ကြသည်။
ပြည်ထောင်စုဝန်ကြီး ဦးမောင်မောင်အုန်းမှ ယမန်နေ့မွန်းလွဲ ၂ နာရီက တောင်အာရှနိုင်ငံခြား သတင်းထောက်များအသင်းဥက္ကဋ္ဌ Mr.Shirumalla Venkat Narayan အားလက်ခံတွေ့ဆုံခဲ့ပြီး အိန္ဒိယ-မြန်မာ နှစ်နိုင်ငံမီဒီယာကဏ္ဍ ပူးပေါင်းဆောင်ရွက်ရေး၊ The Global New Light of Myanmar သတင်းစာအဆင့်မြှင့်တင်ပြောင်းလဲရေးနှင့်နှစ်နိုင်ငံနယ်စပ်ကုန်သွယ်ရေးသတင်းများထည့်သွင်းဖော်ပြရေးတို့ကိုဆွေးနွေးခဲ့ကြသည်။
ထို့ပြင် အိန္ဒိယနိုင်ငံ၌ဖွင့်လှစ်သည့် သတင်းမီဒီယာသင်တန်းကျောင်းများတွင် မြန်မာနိုင်ငံမှ သင်တန်းသားများ ပိုမိုတက်ရောက်နိုင်ရေး၊ပြည်ပမီဒီယာများစိတ်ဝင်စားသည့်သတင်းနှင့်သတင်းပုံစံကျဖော်ပြနိုင်ရန်ဆောင်ရွက်ရေး၊သတင်းမီဒီယာကဏ္ဍပိုမိုဖွံ့ဖြိုးတိုးတက်ရေးအတွက် နှစ်နိုင်ငံနားလည်မှုစာချွန်လွှာလက်မှတ်ရေးထိုးနိုင်ရေး၊နိုင်ငံပိုင်မီဒီယာနှင့်လွတ်လပ်သည့် မီဒီယာဟန်ချက်ညီညီပူးပေါင်းဆောင်ရွက်နိုင်ရေး၊နှစ်နိုင်ငံသတင်းသမားများအပြန်အလှန်လည်ပတ်ရေးတို့ကိုလည်း ဆွေးနွေးခဲ့ကြသည်။
ထို့အတူ ပြည်ထောင်စုဝန်ကြီးဦးကိုကိုလှိုင်မှလည်း ယမန်နေ့နံနက် ၁၀ နာရီခွဲ၌ တောင်အာရှနိုင်ငံခြားသတင်းထောက်များအသင်းဥက္ကဋ္ဌ Mr. Shirumalla Venkat Narayan အားတွေ့ဆုံ၍ မြန်မာနိုင်ငံ၏ ဖြစ်ပေါ်တိုးတက်မှု၊နိုင်ငံတည်ငြိမ်အေးချမ်းရေးနှင့်တရားဥပဒေစိုးမိုးရေးအတွက် နိုင်ငံတော်အစိုးရမှ ကြိုးပမ်းဆောင်ရွက်နေမှု၊မြန်မာနိုင်ငံနှင့်အိန္ဒိယနိုင်ငံကြား ကုန်သွယ်ရေးနှင့်ရင်းနှီးမြှုပ်နှံမှု၊လမ်းပန်းဆက်သွယ်မှုချိတ်ဆက်ရေးနှင့် မီဒီယာကဏ္ဍဖွံ့ဖြိုးတိုးတက်ရေးတို့တွင် ပူးပေါင်းဆောင်ရွက်မှုများ မြှင့်တင်ရေးတို့အား ဆွေးနွေးခဲ့ ကြသည်။
ထို့ပြင် နိုင်ငံခြားရေးဝန်ကြီးဌာန ဒု-ဝန်ကြီးဦးကျော်မျိုးထွဋ်မှလည်း တောင်အာရှနိုင်ငံခြားသ တင်းထောက်များအသင်းဥက္ကဋ္ဌ Mr. Shirumalla Venkat Narayan အား ယမန်နေ့နံနက် ၁၀ နာရီက လက်ခံတွေ့ဆုံခဲ့သည်။
တွေ့ဆုံစဉ် မြန်မာနိုင်ငံ၏ ဖြစ်ပေါ်တိုးတက်မှုနှင့် မီဒီယာကဏ္ဍဖွံ့ဖြိုးတိုးတက်ရေးအတွက် ပူး ပေါင်းဆောင်ရွက်မှုများမြှင့်တင်ရေး၊မြန်မာနိုင်ငံ ၏ ပကတိအခြေအနေမှန်များကို နိုင်ငံတကာမှ ပိုမိုသိရှိရေးနှင့်နိုင်ငံပိုင်သတင်းမီဒီယာများတွင် စွမ်းဆောင်ရည်မြှင့်တင်ရေးတို့ကို ဆွေးနွေးခဲ့ကြသည်။
