ရွှေဈေးနှုန်းတည်ငြိမ်စေရေးအတွက် သင့်တင့်မျှတသည့် အလျော့တွက် လက်ခနှုန်းဖြင့်သာ ရောင်းချပေးရန် ရွှေဆိုင်များအား ဇူလိုင်လ(၂၈)ရက် ရက်စွဲဖြင့်ရန်ကုန်တိုင်းဒေသကြီး၊ ရွှေလုပ်ငန်းရှင်များအသင်းက မေတ္တာရပ်ခံထားသည်။
ရန်ကုန်တိုင်းဒေသကြီးအတွင်းရှိ ရွှေဆိုင်များသည် လက်ဝတ်တန်ဆာများ ရောင်းဝယ်ရာတွင် တစ်ဆိုင်နှင့်တစ်ဆိုင် ပုံစံဒီဇိုင်းများအရ အလျော့တွက်လက်ခများ ကွဲပြားလျက်ရှိနေခြင်းကြောင့် သင့်တင့်မျှတသည့် အလျော့တွက်လက်ခနှုန်းဖြင့်သာ ရောင်းချရန်နှင့် ထပ်ဆောင်းအလျော့တွက်များကို ထည့်သွင်းတွက်ချက်ခြင်းမပြုလုပ်ကြရန် မေတ္တာရပ်ခံထားခြင်း ဖြစ်သည်။
ရွှေဝယ်ယူသည့်အခါ ရွှေ၏ အသားတင်အလေးချိန် တန်ဖိုးအပြင် အလျော့တွက်လက်ခကို ထည့်တွက်ကာ ဝယ်ယူသူက ပေးဆောင်ရပြီး ရွှေတစ်တုံးလျှင် လက်ဝတ်ရတနာပုံဖော်သည့်အခါ ဖြတ်တောက်ထုတ်လိုက်ရသည့် ရွှေစလေးများကိုလည်း ပေးလိုက်ရသည့်အပြင် ယင်းအတွက်လက်ခကိုလည်း ပေးဆောင်နေရခြင်းဖြစ်သည်။
လက်ရှိ ရွှေဈေးကွက်အတွင်း ရွှေဈေးနှုန်းမှာ (၃၄) သိန်းအထက်ဖြင့် အရောင်းအဝယ်ပြုလုပ်နေသော်လည်းအရောင်းအဝယ်အေးနေကာ အချို့ဆိုင်များမှာ ဈေးမတည်ငြိမ်မှုကြောင့် အရောင်းအဝယ် ယာယီရပ်နားထားကြကြောင်း ဈေးကွက်အတွင်းမှ စုံစမ်းသိရသည်။
“ရွှေလောကမှာ အလုပ်လုပ်လို့ မချောမွေ့နေတာ ၂လလောက်ရှိနေပြီ။ခုချိန်ကျတော့ စျေးကွက်ပါ ပျောက်သလိုဖြစ်ပြီး လူတွေလည်း ဘာလုပ်လို့လုပ်ရမှန်းမသိဖြစ်နေကြတာများတယ်။အစိုးရကဘယ်လိုသွားချင်နေတာလဲဆိုတာကို ကျွန်တော်တို့သေသေချာချာသိချင်ပါတယ်။အစိုးရအနေနဲ့ရွှေစျေးတည်ငြိမ်စေချင်မှာပါပဲ။ ကျနော့်ယူဆချက်အရ အခွန်စနစ်၊ကောင်းရောင်းကောင်းဝယ်စနစ်(မြတ်စေရမယ်လို့မက်လုံးတွေပေးရောင်းနေသူတွေကိုသေချာစောင့်ကြည့်တာမျိုး)စတာတွေပါတဲ့ ဖေးမထိမ်းကြောင်းပေးတာမျိုးတွေမျှော်လင့်ပါတယ်”ဟု ရွှေလောကသားတစ်ဦးကပေါ်ပြူလာနယူးစ်သို့ပြောသည်။