သက်ဆိုင်ရာနိုင်ငံရှိလုပ်ငန်းခွင်များတွင် မြန်မာအလုပ်သမားများကြုံတွေ့ရသည့်ဖြစ်စဉ်များကို ရက်ပေါင်း ၃၀ အတွင်းဖြေရှင်းရမည်

ပြည်ပနိုင်ငံများတွင်ရောက်ရှိလုပ်ကိုင်နေသည့် မြန်မာအလုပ်သမားများကြုံတွေ့နေရသော အခက်အခဲများကို လျင်မြန်စွာဖြေရှင်းပေးရေးနှင့်ပတ်သက်၍ အလုပ်သမားဝန်ကြီးဌာန ပြည်ထောင်စုဝန်ကြီးဦးမြင့်နောင်က မှာကြားသည်။

မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ်(MOEAF)မှ တာဝန်ရှိသူများအား ပြည်ထောင်စုဝန်ကြီးဦးမြင့်နောင်မှ သြဂုတ် ၂၉ ရက်မွန်းလွဲပိုင်းကတွေ့ဆုံစဥ် မှာကြားခဲ့ခြင်းဖြစ်သည်။

သက်ဆိုင်ရာအေဂျင်စီများအနေဖြင့် စာချုပ်ချုပ်ဆိုပြီးသည့်အလုပ်သမားများကို ရက်ပေါင်း ၉၀ အတွင်း စေလွှတ်ရမည်ဖြစ်ကာ သတ်မှတ်ရက်အတွင်း စေလွှတ်နိုင်မှုမရှိပါက အလုပ်သမားများ၏ တိုင်ကြားမှုများဖြစ်ပေါ်လာနိုင်၍ အေဂျင်စီများအနေဖြင့် အလေးထားဆောင်ရွက်ရမည်ဟု မှာကြားသည်။

ထို့ပြင် MoU အလုပ်သမားများ၏ မိသားစုငွေလွှဲအများစုအား နှစ်နိုင်ငံဘဏ်များမှတစ်ဆင့် စနစ်တကျစီးဆင်းစေရေးအတွက် ဆောင်ရွက်ရမည်ဟု မှာကြားသည်။

ပြည်ပအလုပ်အကိုင်အကျိုးဆောင်အေဂျင်စီများအနေဖြင့် စေလွှတ်လိုက်သည့်အလုပ်သမားများ သက်ဆိုင်ရာနိုင်ငံရှိလုပ်ငန်းခွင်များတွင် အလုပ်ရှင်၊အလုပ်သမားမပြေလည်မှု၊လုပ်ငန်းခွင်ထိခိုက် ဒဏ်ရာရရှိမှု/သေဆုံးမှုဖြစ်စဉ်တို့အား ရက်ပေါင်း ၃၀ အတွင်းဖြေရှင်းရန်လည်းပါဝင်သည်။

ထို့အတူ အလုပ်သမားရေးရာကိစ္စများ ပြဿနာများ၊ထူးခြားဖြစ်စဉ်များ ပေါ်ပေါက်ပါက သက်ဆိုင်ရာသို့သတင်းပို့၍ အချိန်နှင့်တစ်ပြေးညီ အလုပ်သမားသံအရာရှိများနှင့်အတူ ဝိုင်းဝန်းပူးပေါင်းဆောင်ရွက်ရမည်ဖြစ်ကာ မိမိတို့စေလွှတ်သည့်အလုပ်သမားများ စတင်ထွက်ခွာချိန်မှ မြန်မာနိုင်ငံသို့ပြန်လည်ရောက်ရှိချိန်အထိ တာဝန်အပြည့်အဝရှိပြီး ပြည်ပသို့အလုပ်သမားစေလွှတ်ရေးလုပ်ငန်းစဉ်များအား ဝန်ကြီးဌာနမှထုတ်ပြန်ထားသည့် ဥပဒေ၊စည်းမျဉ်း၊စည်းကမ်း၊လုပ်ထုံး လုပ်နည်းများနှင့်အညီဆောင်ရွက်ရမည်ဟု မှာကြားခဲ့သည်။

မြန်မာနိုင်ငံတွင် ဩဂုတ် ၂၃ ရက်အထိ ပြည်ပအလုပ်အကိုင်အကျိုးဆောင်လိုင်စင်ရအေဂျင်စီ ၄၅၇ ခုနှင့်ထိုင်းလိုင်စင်ရအေဂျင်စီ ၁၅၀ ရှိကြောင်း သိရသည်။