သြဂုတ်လ ၃၁ရက်နေ့က ကျင်းပခဲ့တဲ့ Mrs. Golden Land Myanmar 2017 အိမ်ထောင်ရှင် အလှမယ်ရွေးချယ်ပွဲကြီးမှာ Classic Ms.. Golden Land Myanmar သရဖူဆုအပြင်Miss Weint Sein နဲ့ People Choice ဆုများကို ရရှိခဲ့သူကတော့ အလှမယ် ဒေါ်ရီရီသာပဲ ဖြစ်ပါတယ်။ အလှမယ် ဒေါ်ရီရီ သာက အသက် ၄၈နှစ် ရှိပြီဖြစ်ပြီး အသက် ၂၇နှစ် အရွယ် သားတစ်ဦးရှိကာ သားဖြစ်သူက အမေရိကန်နိုင်ငံက Master of Economic ဘွဲ့နဲ့ ကျောင်းပြီးသွားပြီလို့ သိရပါတယ်။ ခင်ပွန်း အမျိုးသားနဲ့ ၁၉၉၇ ခုနှစ်မှာ လမ်းခွဲခဲ့ပြီး သားဖြစ်သူကိုတစ်ဦးတည်း အုပ်ထိန်း စောင့်ရှောက်ခဲ့တာ ဖြစ်တယ်လို့ သိရပါတယ်။ ဒေါ်ရီရီသာ က မြန်မာနိုင်ငံမှာYangon Academy International School ရဲ့ Managing Director တစ်ဦးဖြစ်သလို အရှေ့ပိုင်းရှမ်းပြည်နယ်မှ စည်သာကော်ဖီ ကုမ္ပဏီရဲ့ ဒါရိုက်တာ တစ်ဦးလည်း ဖြစ်ပါတယ်။ အမေရိကန်နိုင်ငံမှာ ကလေး Day Care Center တွေလည်း ဖွင့်လှစ်ထားပြီး တခြားရင်းနှီး မြှုပ်နှံမှု လုပ်ငန်းတွေကိုလည်း လုပ်ဆောင်လျက်ရှိသူ တစ်ဦးဖြစ်ပါတယ်။
မိခင်တစ်ဦးအနေနဲ့သားသမီးချင်း ကိုယ်ချင်းစာမိတဲ့အတွက် သက်ငယ်မုဒိန်းမှု ပပျောက်ရေးအတွက် လုပ်ဆောင် သွားမယ်ဆိုတဲ့ ဒေါ်ရီရီသာက “ကျွန်မဟိုးအရင်ကတည်းက ကလေးတွေကို ချစ်တယ်။ ကျွန်မနိုင်ငံခြားမှာ သွားနေတုန်းကလည်း ကလေးတွေနဲ့ ပတ်သက် တဲ့ Early Childhood ကိုပဲကျောင်းတက်ခဲ့တယ်။ ကျွန်မ ကိုယ်တိုင်လည်း ဟိုဘက်မှာ ကလေးကျောင်းတွေ လုပ်တယ်။ အခုနောက်ပိုင်းမှာ သတင်းတွေ ဖတ်ရတဲ့အခါ သက်ငယ် မုဒိန်း ကို အထူးသဖြင့် သိပ်ငယ်လွန်းအားကြီးတဲ့ ကလေးတွေကို ဖတ်ရတဲ့အခါ ကျွန်မရင်ထဲမှာ တော်တော် လေးခံစားရ တယ်။ ခံစားရတဲ့အပြင် ကလေးတွေရဲ့ ဘဝပြန်ပျိုးထောင်ရမယ်။ သူ့တို့မှာ ထိခိုက်သွားတဲ့ စိတ်ဝေဒနာနောက် Physically, Mentally အကုန်လုံးထိခိုက်ပါတယ်။ အဲဒါတွေကို ရင်ထဲမှာခံစားရတဲ့ အတွက် သားသမီးချင်းလည်း ကိုယ်ချင်းစာ လို့ဒီလုပ်ငန်းကို လုပ်မယ်လို့ရည်ရွယ်လိုက်တာ ပါ”လို့ပြောပါတယ်။
လတ်တလော မြန်မာနိုင်ငံ အတွင်းမှာ ဖြစ်ပွားမှု များပြား လာနေတဲ့ သက်ငယ် မုဒိန်းပပျောက်ရေး အတွက် အသိပညာပေး ဆောင်ရွက်ပေးဖို့ အထူးလိုအပ်နေကြောင်းနဲ့ ပတ်သက်ပြီး ဒေါ်ရီရီသာက “အားလုံးကတော့ ဆက်စပ်နေတာပါ။ မိဘတွေအနေနဲ့ စီးပွားရေး အဆင်မပြေတဲ့အခါ မိမိသားသမီးကို ရင်အုပ်မကွာ မစောင့်ရှောက်နိုင်ဘူး။ ဘေးပတ်ဝန်းကျင် လူတွေကို ထိန်းသိမ်း ခိုင်းတာတို့ ကိစ္စတွေ အမျိုးမျိုးရှိကြတယ်။ မြန်မာ လူမျိုးတွေ ဆိုတာ အင်မတန် စိတ်သဘောထား နူးညံ့သိမ်မွေ့တဲ့ လူမျိုးတွေဖြစ်တယ်။ ကောင်းကောင်း မွန်မွန် စောင့်ရှောက်ကြတဲ့ အသိုင်းအဝိုင်း ကနေ နည်းနည်းလေး အခြေ အနေပြောင်းလာတယ်။ Technology တွေ တအားမြင့်လာတဲ့အခါမှာ ဖုန်းပေါ်မှာတင်ပဲ မကြည့်သင့် မကြည့်ထိုက် မလုပ်သင့် မလုပ်ထိုက်တာတွေမြင်ရတဲ့အခါကျတော့ နှစ်ဦးနှစ်ဖက်စလုံး ကလေးတွေ မှာလည်း အကာအကွယ်မဲ့ တယ်။ မိဘက အနားမှာ မရှိနိုင်ဘူး။ ပြစ်မှုကျူးလွန်ချင်တဲ့ သူတွေ အနေနဲ့ကလည်း သူတို့ ကိုယ်တိုင် ပိုက်ဆံမရှိ တဲ့အခါကျတော့ တခြားပြင်ပ မရှာဖွေနိုင်တဲ့ အခါ ဒီကလေးတွေကို target ထားပြီး လုပ်ကြတဲ့အနေ အထားရှိတယ်။ ဒါကြောင့် ကျွန်မတို့က နှစ်ပိုင်းပေါ့။ ဒေသတွေ ရဲ့ ဖွံ့ဖြိုးရေးကို အတတ်နိုင်ဆုံး ပူးပေါင်း ဆောင်ရွက်သလို မိဘတွေ အနေနဲ့ကလည်း ဘယ်လိုမျိုး ကလေးတွေကို ထားရမယ်။ ဘယ်လိုမျိုး အခြေ အနေမှာ ထိန်းသိမ်းရမယ်။ နောက်ပြီးဖြစ်လာတဲ့ အချိန်မှာလည်းကလေးတွေက ကြောက်ရွံ့ရှက်ရွံပြီး မပြောရဲကြတာတွေ ရှိတယ်။ အဲဒါတွေကိုလည်း ပွင့်ပွင့်လင်းလင်း ထုတ်ဖော်ပြောရမယ်။ ဥပဒေကြောင်း ဆိုင် ရာအရလည်း မှန်ကန်တဲ့ တိကျတဲ့ ဥပဒေထားရှိမယ် ဆိုရင် ဒါကျဆင်းရေး အတွက်ဖြစ် လာမယ်လို့ ထင်ပါတယ်။ ပပျောက်ရေး ဆိုတာကတော့ မလွယ်ပါဘူး။ လျော့ကျရေး အတွက်ကိုသာ ကျွန်မတို့ ကြိုးစားပြီး အတတ် နိုင်ဆုံး လုပ်ပြီး လူ့ဘောင်ဘဝ အထူးသဖြင့် မျိုးဆက်သစ် ကလေးလေးတွေ စိတ် အနာတရ မဖြစ်ဖို့ကို အတတ် နိုင်ဆုံး ကြိုးစား သွားပါ့မယ်” လို့ဆိုပါတယ်။ မရီရီသာ ကသက်ငယ် မုဒိန်းပပျောက်ရေး အတွက် ဥပဒေပညာရှင်၊ ကလေး စိတ်ပညာရှင်များနဲ့ တိုင်ပင်ပြီး အောက်တိုဘာလမှာ ကချင်ပြည်နယ် နဲ့ ချင်းပြည်နယ် ဘက်တွေကို သွားရောက်ပြီး ပညာပေး လုပ်ငန်းများ လုပ်ဆောင် သွားမှာဖြစ်ကြောင်း သိရပါတယ်။
ခိုင်ဝေလွင်၊
ဓာတ်ပုံ- အောင်ဇော်မင်း