ကယားပြည်နယ်၊ လွိုင်ကော်မြို့နယ်တွင် ဘီလူးချောင်းနှင့် ပွန်ချောင်းရေ ထပ်မံမြင့်တက်ဝင်ရောက်လာသဖြင့် ဒေသခံများ ရေဘေးလွတ်ရာ ပြောင်းရွှေ့နေထိုင်လျက်ရှိပြီး တံတား(၂)စင်းပေါ်မှ ဖြတ်သန်းသွားလာခွင့်ကို သက်ဆိုင်ရာ တာဝန်ရှိသူများမှ ယာယီပိတ်ထားလိုက်ရကြောင်း ဒေသတွင်း သတင်းများအရ သိရသည်။
လွိုင်ကော်မြို့နယ်တွင် ဘီလူးချောင်းနှင့် ပွန်ချောင်းရေ ဆက်လက်မြင့်တက်မှုကြောင့် ရှမ်းပိုင်းရပ်ကွက်၊ ဒေါနိုးကူးရပ်ကွက်၊ ရှမ်းစုရပ်ကွက်၊ မင်းစုရပ်ကွက်နှင့် နမ့်ကွတ်ရပ်ကွက်တွင် ရေများ ဆက်လက် ဝင်ရောက်မှုဖြစ်ပွားလျက်ရှိပြီး နှစ်ထပ်ဈေး (ကန္ဒာရဝတီ) တံတားနှင့် ဥတ္တရာရုံတံတားတို့ အပေါ်မှ ဖြတ်သန်းသွားလာခွင့်ကို စက်တင်ဘာ (၂၅)ရက်မှ စတင်၍ ယာယီပိတ်ထားကြောင်း သိရသည်။
လွိုင်ကော်မြို့နယ်အတွင်း ဘီးလူးချောင်းနှင့် ပွန်ချောင်းရေဆက်လက်မြင့်တက်မှုကြောင့် အနိမ့်ပိုင်း ရပ်ကွက်များ ရေဆက်လက် ဝင်ရောက်မှုဖြစ်ပွားလျက်ရှိရာ လွိုင်ကော်မြို့နယ် မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး စက်လှေ(၆)စီးဖြင့် ရှာဖွေကယ်ဆယ်ရေးတပ်ဖွဲ့ဝင်များမှ ရဟန်းပြည်သူ သွားလာရေး အဆင်ပြေစေရန်နှင့် ရေဘေးသင့် အိမ်ထောင်စုဝင်များအား ရေဘေးလွတ်ရာသို့ ကူညီရွှေ့ပြောင်းပေးနေရကြောင်း သိရသည်။
ယခု စက်တင်ဘာလအတွင်း လွိုင်ကော်မြို့နယ် အနိမ့်ပိုင်းနေရာများနှင့် မြို့လယ်အထိ ဈေးများ၊ တံတားများ၊ အဓိက လမ်းမများ၊ နေအိမ်များနှင့် ဒီးမော့ဆို မြို့နယ် ကျေးရွာများရှိ လယ်ဧက၊ စိုက်ခင်းများစွာ ရေနစ်မြုပ်နေပြီး အကူညီများ လိုအပ်လျက်ရှိရာ နယ်မြေကန့်သတ်မှုကြောင့် အကူညီမရောက်သေးသည့် ဒေသများလည်းရှိနေသေးကြောင်း လွိုင်ကော်ရေးဘေး အကူညီပေးနေသူများထံမှ သိရသည်။
လက်ရှိ ဆက်သွယ်ရေး အခြေနေတွင်လည်း ဖုန်းလိုင်းနှင့် အင်တာနက်ကွန်ရက်များ ပြတ်တောက်လျက်ရှိပြီး တချို့နေရာများတွင် မြန်မာ့ဆက်သွယ်ရေး MPT ဖုန်းလိုင်းရရှိနေသည်ဟုဆိုသော်လည်း နေရာတိုင်းတွင် ဆက်သွယ်၍ မရရှိသေးကြောင်းနှင့် ရေဘေးသင့်များ ခိုလှုံရန် မိုဃ်းကောင်းဘုရားကြီးရှိ ဓမ္မာရုံ၊ စေတီပုထိုးနှင့် ပုဗ္ပါရုံပရိယတ္တိ စာသင်တိုက်ရှိ ကျောင်းဝန်းတို့တွင် ကယ်ဆယ်ရေးစခန်းများအဖြစ် ကြိုတင်ပြင်ဆင်ထားပြီး ဆက်လက်၍ ထပ်တိုးနေရာများအတွက် ပြင်ဆင်နေရကြောင်း သိရသည်။
တိုင်ဖွန်းမုန်တိုင်း ယာဂီနှင့် ရှမ်းပြည်နယ်တောင်ပိုင်း၏ ရေကြီးရေလျှံမှုများကြောင့် ဖြစ်ပေါ်ခဲ့သော ရေများမှာ မိုးဗြဲရေလှောင်တမံမှ တစ်ဆင့် ဘီလူးချောင်းနှင့် ပွန်ချောင်းအတိုင်း လွိုင်ကော်မြို့နယ်အတွင်း ဝင်ရောက်ခဲ့ရာမှ စက်တင်ဘာ (၉)ရက်မှ စတင်၍ မြေနိမ့်ပိုင်းရပ်ကွက်များတွင် ရေကြီး၊ ရေလျှံမှုဖြစ်ပေါ်ခဲ့ကြောင်း သိရသည်။
ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေအား အသင့်အတင့်ရှိနေရာ ကယားပြည်နယ်တွင် နေရာကွက်ကျား မိုးထစ်ချုန်းရွာနိုင်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ယနေ့ စက်တင်ဘာ (၂၆)ရက်၊ နံနက်(၇)နာရီအချိန် နေ့စဉ်မိုးလေဝသတင်း ထုတ်ပြန်ချက်အရ သိရသည်။
ပုံစာ – စက်တင်ဘာ ၂၄ ရက်နေ့ ဘီလူးချောင်းရေမြင့်တက်နေသည့် မြင်ကွင်းပုံရိပ်များ
