ယမန်နေ့က နစက၏ လွတ်ငြိမ်းချမ်းသာခွင့်ဖြင့် ပြန်လည် လွတ်မြောက်လာသူများ အနေဖြင့် နိုင်ငံတော်၏ စေတနာကို အလေးထားကာ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်ရေးအတွက် ဥပဒေဘောင်အတွင်းမှ ပါဝင်ဆောင်ရွက်နိုင်မည်ကိုယုံကြည်ကြောင်း မြန်မာနိုင်ငံ အမျိုးသားလူ့အခွင့်အရေးကော်မရှင်က သတင်းထုတ်ပြန်သည်။
ယမန်နေ့ သြဂုတ်လ (၁) ရက်တွင် နိုင်ငံတစ်ဝန်းရှိ အကျဉ်းထောင် အသီးသီးမှ အကျဉ်းသား (၇၀၀၀) ကျော်ကို လွတ်ငြိမ်းခွင့်ပေးခဲ့ပြီး နိုင်ငံတော် အတိုင်ပင်ခံပုဂ္ဂိုလ်ဟောင်းဒေါ်အောင်ဆန်းစုကြည်နှင့် သမ္မတဟောင်းဦးဝင်းမြင့်တို့အား ပြစ်ဒဏ်အချို့မှ လျှော့ပေါ့ပေးမှုများ လုပ်ဆောင်ခဲ့သည်။
အမျိုးသားလူ့အခွင့်ရေးကော်မရှင်က ထုတ်ပြန်သည့်ထုတ်ပြန်ချက်တွင် ဒေါ်အောင်ဆန်းစုကြည်အား ပြစ်ဒဏ်လွတ်ငြိမ်းသက်သာခွင့် (၆) နှစ်နှင့် ဦးဝင်းမြင့်အား ပြစ်ဒဏ်လွတ်ငြိမ်းသက်သာခွင့် (၄) နှစ် ခွင့်ပြုခဲ့ခြင်းသည် အပြုသဘောဆောင်သည်ဟု ရေးသားထားသည်။
ထို့ပြင် အကျဥ်းထောင်၊ အကျဥ်းစခန်းအသီးသီး၌ သေဒဏ်ကျခံနေရသည့် အကျဥ်းသား၊ အကျဥ်းသူ အချို့အား ဖွဲ့စည်းပုံ အခြေခံဥပဒေပုဒ်မ ၂၀၄၊ ပုဒ်မခွဲ(က)အရ ချမှတ်ထားသည့် သေဒဏ်ပြစ်ဒဏ်မှ လွတ်ငြိမ်းခွင့်ပြု၍ ထောင်ဒဏ်တစ်သက်သို့ ပြောင်းလဲကျခံစေခြင်းသည်လည်း လူသားချင်းစာနာထောက်ထားမှုကို အလေးထားရာရောက်သည်ဟု ထုတ်ပြန်ခဲ့သည်။
ထို့အတူ အကျဉ်းထောင်/အချုပ်ထောင်/စခန်းအသီးသီးတွင် ပြစ်ဒဏ်ကျခံနေရသည့် အကျဉ်းသား/အကျဥ်းသူ (၇၇၄၉) ဦး၊ တိုင်းရင်းသားလက်နက်ကိုင်အဖွဲ့ဝင် (၂၂) ဦး၊ နိုင်ငံခြားသား အကျဉ်းသား/အကျဥ်းသူ (၁၂၅) ဦးတို့ကို ပြစ်ဒဏ်လွတ်ငြိမ်းခွင့်ပြု၍ ပြည်နှင်ဒဏ်ပေးခြင်းနှင့် တရားရုံးအသီးသီးတွင် တရားစွဲဆိုထားဆဲဖြစ်သည့် တိုင်းရင်းသားလက်နက်ကိုင်အဖွဲ့ဝင်များနှင့် ဆက်စပ်သူ (၇၂) ဦး၏ တရားရုံးစစ်ဆေးဆဲ ပြစ်မှုဆိုင်ရာ အမှုများကိုပိတ်သိမ်း၍ အမှုမှ လွှတ်ခြင်းတို့သည်လည်း နိုင်ငံအချ င်းချင်း မိတ်ဝတ်မပျက်ဆက်ဆံရေးကို မြှင့်တင်ရာရောက်ပြီး တိုင်းရင်းသားစည်းလုံးညီညွတ်ရေးနှင့် ပြည်တွင်းငြိမ်းချမ်းရေးကို အထောက်အပံ့ဖြစ်စေသည်ဟု ရေးသားထားသည်။
ထို့ကြောင့် သေဒဏ်ပြစ်ဒဏ်မှ ထောင်ဒဏ်တစ်သက်သို့ ပြောင်းလဲကျခံရသူများ အသက်ရှင်ခွင့် ရရှိကာ ပြစ်ဒဏ်လွတ်ငြိမ်းခွင့်နှင့် ပြစ်ဒဏ်သက်သာခွင့်ရရှိသူများအနေဖြင့်လည်း မိသားစုဝင်များနှင့် ပြန်လည်ပေါင်းစည်းခွင့်ရကြမည်ဖြစ်သည်ဟု ထုတ်ပြန်ချက်၌ ရေးသားထားသည်။
