ကော်လိုရာဒို စပရင်းစ်၊ ဇွန် ၂
အမေရိကန်သမ္မတ ဂျိုးဘိုင်ဒင်သည် ဇွန်လ ၁ ရက် ကြာသပတေးနေ့တွင် ကော်လိုရာဒို ပြည်နယ်ရှိ လေတပ် အကယ်ဒမီ၏ ဘွဲ့နှင်းသဘင်၌ ခလုတ်တိုက်ကာ ကျွမ်းထိုးမှောက်ခုံ ကျသွားခဲ့ကြောင်း သိရသည်။
အသက် ၈၀ အရွယ် ဘိုင်ဒင်သည် လေတပ် အကယ်ဒမီ၏ ဘွဲ့နှင်းသဘင် အခမ်းအနားတွင် မိန့်ခွန်းပြောကြားပြီးနောက် ဗိုလ်လောင်းတစ်ယောက်နှင့် လက်ဆွဲနှုတ်ဆက်ကာ သူ၏ ထိုင်ခုံဆီသို့ ပြန်အသွားတွင် လဲကျသွားခဲ့ခြင်း ဖြစ်သည်။
လေတပ်အရာရှိများက ထူပေးခဲ့ပြီးနောက် ဘိုင်ဒင်သည် သူ ခလုတ်တိုက်မိသည့် အနက်ရောင် သဲအိတ် အသေးနှစ်ခုကို ညွှန်ပြခဲ့သည်။ မှောက်လဲခဲ့သော်လည်း ထိခိုက်ဒဏ်ရာတော့ မရရှိခဲ့ပေ။
ထိုဖြစ်ရပ်နှင့် ပတ်သက်၍ အိမ်ဖြူတော် ဆက်သွယ်ရေး ညွှန်ကြားရေးမှူး ဘန် လာဘို့ က “သူ အဆင်ပြေပါတယ်။ သူလက်ဆွဲနှုတ်ဆက်တဲ့ စင်မြင့်ပေါ်က နေရာနားမှာ သဲအိတ် ရှိနေတာကြောင့်ပါ” ဟု တွစ်တာ ပေါ်တွင် ရေးသားခဲ့သည်။
ဘိုင်ဒင်သည် အမေရိကန်သမိုင်း၌ အသက်အကြီးဆုံး သမ္မတအဖြစ် ရပ်တည်နေပြီး ၂၀၂၄ ခုနှစ် ရွေးကောက်ပွဲတွင်လည်း သမ္မတလောင်းအဖြစ် ဆက်လက် ယှဉ်ပြိုင်သွားဦးမည် ဖြစ်သည်။
သို့ရာတွင် ဘိုင်ဒင်သည် သူ၏ အသက်အရွယ်၊ ကျန်းမာရေး အခြေအနေများနှင့် ပတ်သက်၍ ဒုတိယမြောက် သမ္မတသက်တမ်းအတွက် ဆက်လက် ယှဉ်ပြိုင်သင့်၊ မပြိုင်သင့် ဟူသော မေးခွန်းများနှင့် ရင်ဆိုင်နေရသည်။ ထို့ကြောင့် ယခုကဲ့သို့ ဖြစ်ရပ်မျိုးသည် သူ၏ ပြိုင်ဖက်များအတွက်မူ မဲဆွယ်ရာ၌ ထိုးနှက်စရာအကွက် ဖြစ်လာစေခဲ့သည်။
Source: CNA
