မြန်မာနိုင်ငံ အမျိုးသားလူအခွင့်ရေးကော်မရှင်နှင့် ရုရှားဖက်ဒရေးရှင်းနိုင်ငံ လူအခွင့်ရေးကော်မရှင်တို့အကြား လူအခွင့်အရေး မြှင့်တင်ကာကွယ်ရေးကဏ္ဍများတွင် ပူးပေါင်းဆောင်ရွက်ရေး စာချွှန်လွှာကို လက်မှတ်ရေးထိုးခဲ့ကြောင်း သိရသည်။
ရုရှားဖက်ဒရေးရှင်းနိုင်ငံ မော်စကိုမြို့၌ ကျင်းပသည့် (၉) ကြိမ်မြောက် အပြည်ပြည်ဆိုင်ရာ သိပ္ပံနှင့် လက်တွေ့အသုံးချညီလာခံကို မြန်မာနိုင်ငံလူအခွင့်ရေးကော်မရှင် ဥက္ကဋ္ဌ ဦးပေါ်လွင်စိန် ဦးဆောင်သည့် ကိုယ်စားလှယ်အဖွဲ့က တက်ရောက်ရန် ရောက်ရှိနေစဉ် ရုရှားလူအခွင့်ရေးကော်မရှင်နှင့် လက်မှတ်ရေးထိုးခဲ့ခြင်းလည်းဖြစ်သည်။
အဆိုပါ ညီလာခံကို လူအခွင့်ရေးကာကွယ်စောင့်ရှောက်ခြင်း ခေါင်းစဉ်ဖြင့် ကျင်းပခြင်းဖြစ်ပြီး မြန်မာနိုင်ငံ အမျိုး သားလူအခွင့်ရေးကော်မရှင်အပါအဝင် ကမ္ဘာနိုင်ငံနှင့်အဖွဲ့စည်း(၆၀)ကျော်မှ လူအခွင့်ရေးကော်မရှင် ကိုယ်စားလှယ်များ တက်ရောက်ခဲ့ကြောင်း သိရသည်။
မြန်မာနိုင်ငံအနေဖြင့် လူအခွင့်ရေးများ ဖော်ဆောင်ရာတွင် ဒစ်ဂျစ်တယ်နည်းပညာဖြင့် လူအခွင့်ရေးများ မြှင့်တင်ကာကွယ်စောင့်ရှောက်ပေးနိုင်သည့် Learning Management System ကို အကောင်ထည်ဖော်ဆောင်ရွက်နေပြီး Mobile Application ဆောင်ရွက်ထားရှိခြင်းနှင့် အွန်လိုင်းမှ တိုင်းတန်းချက်များပေးနိုင်ရန်လည်း ဝက်ဆိုဒ်တည်ထောင်ထားရှိကြောင်း ဦးပေါ်လွင်စိန်က ပြောကြားခဲ့သည်။
ထို့နောက် အင်ဒိုနီးရှားနိုင်ငံ၊ဆူဒန်နိုင်ငံ၊ နီပေါနိုင်ငံနှင့် သီရိလင်္ကာနိုင်ငံ အမျိုးသားလူအခွင့်ရေးကော်မရှင်များမှ ကိုယ်စားလှယ်အဖွဲ့များနှင့်လည်း သီးခြားတွေ့ဆုံခဲ့ပြီး ပူးပေါင်းဆောင်ရွက်ရေးကိစ္စရပ်များ ဆွေးနွေးခဲ့ကြောင်း သိရသည်။