လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီး တရုတ်နိုင်ငံသို့ သွားရောက်

နှစ်နိုင်ငံနယ်စပ်များမှ တရားဝင် ဝင်/ထွက်သွားလာမှုရှိစေရေး၊ အွန်လိုင်းလိမ်လည်မှုလုပ်ငန်းများ ပူးပေါင်းတိုက်ဖျက်ရေး ကိစ္စများ ဆွေးနွေး

မြန်မာ-တရုတ် နှစ်နိုင်ငံအကြား လူဝင်မှုကြီးကြပ်ရေးလုပ်ငန်းများ ပိုမိုတိုးမြှင့်ဆောင်ရွက်ရေးနှင့် တရားမဝင် ဝင်/ထွက်သွားလာမှု လျော့နည်းပပျောက်ရေး၊ အွန်လိုင်းလိမ်လည်မှုလုပ်ငန်းများ ပူးပေါင်းတိုက်ဖျက်ရေးအတွက် ရည်ရွယ်ပြီး လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်နှင့်အဖွဲ့ သည် တရုတ်နိုင်ငံသို့ သွားရောက်ခဲ့ကြောင်း သိရသည်။

ပြီးခဲ့သည့် နိုဝင်ဘာ (၁၄)ရက်မှ (၁၈)ရက်အထိ သွားရောက်ခဲ့ခြင်းဖြစ်ပြီး တရုတ်နိုင်ငံ ပြည်သူ့လုံခြုံရေးဝန်ကြီးဌာန ဒုတိယဝန်ကြီး Mr. WANG Zhizhong နှင့် တွေ့ဆုံခဲ့ကြောင်း သိရသည်။

မြန်မာ-တရုတ် နှစ်နိင်ငံ နယ်စပ်ဂိတ်များ၌ လူဝင်မှုစစ်ဆေးရေးစနစ်များ အဆင့်မြှင့်တင်နိုင်ရေးနှင့် လူဝင်မှုကြီးကြပ်ရေးဆိုင်ရာလုပ်ငန်းများ ပိုမိုတိုးမြှင့်ဆောင်ရွက်နိုင်ရေး၊ နှစ်နိုင်ငံနယ်စပ်များမှ တရားဝင် ဝင်/ထွက်သွားလာမှု ရှိစေရေးတို့ အတွက် အပြန်အလှန်ပူးပေါင်းဆောင်ရွက်ရန် ဆွေးနွေးခဲ့ခြင်းလည်း ဖြစ်သည်။

ထို့ပြင် နှစ်နိုင်ငံလူဝင်မှုကြီးကြပ်ရေးဆိုင်ရာ သတင်းအချက်အလက်များ အပြန်အလှန်ဖလှယ်ရေး၊ လူကုန်ကူးမှုတိုက်ဖျက်ရေး၊ အွန်လိုင်းလောင်းကစားမှုလုပ်ငန်းများ ပူးပေါင်းတိုက်ဖျက်ရေး၊ နယ်စပ်ဒေသများ တည်ငြိမ်အေးချမ်းရေး ကိစ္စများကို ဆွေးနွေးခဲ့ခြင်းဖြစ်ကြောင်း သိရသည်။

တရုတ်နိုင်ငံတွင် အကြောင်းအမျိုးမျိုးကြောင့် ဖမ်းဆီးခံရသည့် မြန်မာနိုင်ငံသားများကို ဥပဒေနှင့်အညီ စိစစ်ပြီး နေရပ်ပြန်ပို့နိုင်ရေးနှင့် ပတ်သက်ပြီး နှစ်နိုင်ငံအကြား နားလည်မှုစာချွှန်လွှာ လက်မှတ်ရေးထိုးမှုများလည်း လုပ်ဆောင်ခဲ့ကြောင်း သိရသည်။