ပို့ကုန်/သွင်းကုန်လုပ်ငန်းရှင်များအနေဖြင့် Online Trading အစီအစဉ်တွင် ညှိနှိုင်းဆုံးဖြတ်ထားသော ငွေလဲလှယ်နှုန်းဖြင့်သာ ရောင်းဝယ်ရမည်ဖြစ်ပြီးရောင်းဝယ်ခြင်းမရှိသော လုပ်ငန်းရှင်များကိုလည်း ပို့ကုန်/သွင်းကုန် လုပ်ငန်းရှင် မှတ်ပုံတင်လက်မှတ်ကိုပိတ်သိမ်းသွားရန် ဗဟိုဘဏ်မှတစ်ဆင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသို့ အကြောင်းကြားမည်ဖြစ်ကြောင်း ပို့ကုန်/သွင်းကုန် လုပ်ငန်းရှင်များကို အသိပေးရန် AD လိုင်စင်ရဘဏ်များကို ညွှန်ကြားထားကြောင်း သိရသည်။
နိုင်ငံခြားသုံးငွေများ ရောင်းဝယ် ဖောက်ကားသည့်လုပ်ငန်း(AD) လိုင်စင်ရဘဏ်များသည် နိုင်ငံခြားငွေ ဈေးကွက်အတွင်း ဘဏ်နှင့် Customer များအကြား အရောင်းအဝယ် ပြုလုပ်ရာတွင်လည်းကောင်း၊ Customer အချင်းချင်း အရောင်းအဝယ်ပြုလုပ်ရာတွင်လည်းကောင်း ၂၀၂၃ခုနှစ် ဇွန်လ (၂၂)ရက်နေ့က စတင်ပြီး မြန်မာနိုင်ငံတော်ဗဟိုဘဏ် ဦးဆောင်၍ Online Trading အစီအစဉ်ဖြင့် ဆောင်ရွက်နေပြီဖြစ်သည်။
ထိုသို့ Online Trading ပြုလုပ်ရာတွင် ဗဟိုဘဏ်သည် သတ်မှတ်ချက်များဖြင့် စိစစ်ပြီး အရောင်းအဝယ်ပြုရမည့် ကုမ္ပဏီများ၊ ပမာဏ၊ ငွေလဲလှယ်နှုန်း အစရှိသည်တို့ကို AD လိုင်စင်ရ ဘဏ်များနှင့် ညှိနှိုင်းဆုံးဖြတ်မည်ဖြစ်ကြောင်း သိရသည်။
အရောင်းအဝယ်ပြုလုပ်ခွင့်ရှိသည့်အခြေအနေများမှာ
(၁) အရေးကြီးကုန်စည်များနှင့် Payment Due Date ပြည့်ပြီး transaction များကိုသာ ဝယ်ယူခွင့်ပြုမည်၊
(၂) ကုမ္ပဏီတစ်ခုသည် ဘဏ်တစ်ဘဏ်ထက်ပို၍ ဝယ်ယူလိုပါက Import License နှင့် ID မတူသည့် Payment Due ပြည့်ပြီးဖြစ်သော transaction များကို တင်ပြထားသည့် ဘဏ်၌ ဝယ်ယူခွင့်ပြုမည်
(၃) ကုမ္ပဏီတစ်ခုသည် transaction တစ်ကြောင်းအတွက် ဝယ်ယူလိုသည့်ပမာဏများပြားပါက သင့်လျှော်သည့် ပမာဏကိုသာ ဝယ်ယူခွင့်ပြုမည်ဖြစ်ကြောင်း
(၄) ကုမ္ပဏီတစ်ခုသည် နိုင်ငံခြား ငွေဝယ်ယူလိုကြောင်း နေ့စဉ်တင်ပြနေစေကာမူ ရောင်းချနိုင်သည့် ပမာဏအပေါ်သာမူတည်၍သာ ဝယ်ယူခွင့်ပြုမည်ဟု သတ်မှတ်ထားသည်။
ယင်းအပြင်အရောင်းအဝယ်ပြုလုပ်ခွင့်မရှိသည့်အခြေအနေများမှာ
(၁) သွင်းကုန်လိုင်စင် ခွင့်ပြုသည့်ရက်စွဲသည် ID ရက်စွဲထက်နောက်ကျနေခြင်း၊
(၂) လိုင်စင်ကုန်စည်ဖြစ်စေ ၊ Non License ကုန်စည်ဖြစ်စေ ID သက်တမ်း (၆) လထက်ကျော်နေခြင်း၊
(၃) တူညီသည့် သွင်းကုန်လိုင်စင် နှင့် ID များအားထပ်မံတင်ပြလာခြင်း၊
(၄) သွင်းကုန်လိုင်စင်သည် ၂၀၂၂ ခုနှစ်အတွင်း ခွင့်ပြုချက်ရထားခြင်း (သို့) သက်တမ်း တိုးထားခြင်း၊ (၅) သီလဝါအထူးစီးပွားရေးဇုန်ရှိ ကင်းလွတ်ဇုန် (Free Zone) တွင်လုပ်ငန်းဆောင်ရွက်နေခြင်းတို့ဖြစ်ကြောင်း သိရသည်။
ထို့ပြင် စိစစ်မည့်အချက်များမှာ
(၁) သွင်းကုန်အတွက် Advanced Payment TT ဖြင့် ငွေပေးချေလိုပါက မဖြစ်မနေပေးချေရန် လိုအပ်မှုရှိ/မရှိ စိစစ်ခြင်းနှင့် Case by Case တင်ပြခွင့်ပြုချက်ရယူရန် လိုအပ်ခြင်း၊
(၂) ID သည် License ရပြီး (၃) လအတွင်းဖြစ်/မဖြစ်နှင့် (၃) လထက်ပိုပါက License သက်တမ်း တိုးထားခြင်းရှိ/မရှိ စိစစ်ခြင်း၊
(၃) Non-License ကုန်စည်များ၏ transaction များအတွက်နိုင်ငံခြားငွေ ဝယ်ယူလိုပါက စီး/ကူးဝန်ကြီးဌာနမှ သတ်မှတ်ထားသည့် HS Code များဖြင့် စိစစ်ခြင်း (၄) ချေးငွေအတိုးပြန်လည်ပေးဆပ်ရန်အတွက်ဖြစ်ပါက ဗဟိုဘဏ်မှ ခွင့်ပြုထားသည့် Repayment Schedule ဖြင့် စိစစ်မည်ဖြစ်ကြောင်း သိရသည်။
ထို့ကြောင့် AD လိုင်စင်ရဘဏ်များသည် အထက်ဖော်ပြပါ သတ်မှတ်ချက်များဖြင့် ကိုက်ညီရန် စိစစ်ပြီးဖြစ်သည့် transaction များအတွက် ယင်းနှင့်သက်ဆိုင်သည့် အထောက်အထားများကို သေချာစွာ တောင်းခံစိစစ်ပြီးမှ Online Trading Platform သို့ တင်ပြရမည်ဖြစ်ကာ Online Trading အစီအစဉ်တွင် ညှိနှိုင်းထားသည့် ငွေလဲလှယ်နှုန်းဖြင့်သာ ရောင်းဝယ်ရမည်ဖြစ်ကြောင်း သိရသည်။
သတ်မှတ်ထားသည့် ညွှန်ကြားချက်များကို လိုက်နာခြင်းမရှိပါက AD လိုင်စင်ရဘဏ်များကို နိုင်ငံခြားသုံးငွေ စီမံခန့်ခွဲမှုဥပဒေအရ အရေးယူသွားမည်ဖြစ်ကြောင်းလည်း သိရသည်။