ရှမ်းပြည်နယ်၊လားရှိုးမြို့၊ရပ်ကွက်(၈)ရှိ Luxury Lounge ဟိုတယ်တွင် သြဂုတ် ၂၉ ရက်ညနေပိုင်းက လက်လုပ်မိုင်းပေါက်ကွဲမှုဖြစ်ပွားခဲ့ကြောင်း သိရသည်။
ယမန်နေ့ညနေ ၄ နာရီခွဲခန့်က အမည်မသိအမျိုးသား ၂ ဦးသည် လားရှိုးမြို့၊ရပ်ကွက် ၈၊ နယ်မြေ ၃ ရှိ Luxury Lounge ဟိုတယ်သို့ရောက်ရှိလာကာ အမျိုးသားတစ်ဦးမှ ဟိုတယ်အတွင်းသို့ဝင်လာကာ ဟိုတယ်ကောင်တာတွင် အခန်းဌားမည်ဟုပြောဆိုပြီး လက်ဆွဲအိတ်အမည်းရောင်အား ကောင်တာရှေ့တွင်ချ၍ ပြန်လည်ထွက်ခွာသွားခဲ့ကြောင်း သိရသည်။
“ဆိုင်ကယ်တစ်စီးနဲ့ရောက်လာကြတာ တစ်ယောက်က ဟိုတယ်အပြင်မှာစောင့်နေတယ် တစ်ယောက်ကဟိုတယ်ထဲဝင်သွားတာ သူဝင်သွားတုန်းက လက်ဆွဲအိတ်အမည်းတစ်လုံးပါတယ် နောက် ပြန်ထွက်လာပြီးဆိုင်ကယ်နဲ့ထွက်သွားကြတယ် သူတို့ထွက်သွားပြီး သိပ်မကြာဘူးပေါက်ကွဲမှုဖြစ်တာ သူတို့ချသွားတဲ့လက်ဆွဲအိတ်အမည်းရောင်ထဲကနေပေါက်ကွဲတာပါ”ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။
လက်လုပ်မိုင်းပေါက်ကွဲမှုကြောင့် အသက်(၁၇) နှစ်နှင့်(၂၂)နှစ်အရွယ်စီရှိ ဟိုတယ်ဝန်ထမ်းအမျိုး သား ၂ ဦးတွင် ထိခိုက်ဒဏ်ရာများ(မစိုးရိမ်ရ)ရရှိခဲ့ပြီး ဟိုတယ်ဝင်ပေါက်တံခါး၏ မှန်များလည်းပျက်စီးဆုံးရှုံးသွားခဲ့ကြောင်း သိရသည်။
ထိခိုက်ဒဏ်ရာရရှိခဲ့သည့် ဟိုတယ်ဝန်ထမ်း ၂ ဦးအား လူမှုကူညီရေးအသင်းဝင်များက လားရှိုးပြည်သူ့ဆေးရုံကြီး၏ ခွဲစိတ်ကုသဆောင်သို့ပို့ဆောင်ပေးခဲ့ကြကြောင်း သိရသည်။
