ဗီယန်ကျင်း၊စက်တင်ဘာ ၃၀
လာအိုနိုင်ငံမြောက်ပိုင်း လွမ်နမ်သာခရိုင်၌ ရေကြီးရေလျှံမှုများကြောင့် စာသင်ကျောင်း ၅၀ ကျော် ယာယီပိတ်ထားရပြီး ဒေသခံ ဆရာ၊ဆရာမနှင့်ကျောင်းသားကျောင်းသူ ၆,၀၀၀ နီးပါး သင်ကြားရေးကိုရပ်နားထားရကြောင်းသိရသည်။
လက်ရှိတွင် ရေကြီးမှုကြောင့် ပျက်စီးဆုံးရှုံးခဲ့သည့်ကျောင်းများ၌ ဒေသခံအာဏာပိုင်များနှင့် စေတနာ့ဝန်ထမ်းများစုပေါင်းကာ စာသင်ကျောင်းများကိုသန့်ရှင်းရေးလုပ်ခြင်း၊ပျက်ဆီးသွားသောပစ္စည်းများအစားထိုးပြုပြင်ပြီးပြင်ဆင်နေကြကြောင်းသိရသည်။
လာအိုရှိပြည်နယ်အများအပြားသည်လည်း ယာဂီမုန်တိုင်းဒဏ်ခံခဲ့ရပြီး စက်တင်ဘာလအစောပိုင်းကတည်းက မိုးသည်းထန်စွာရွာသွန်းကာ မြစ်ကမ်းပါးပြိုကျမှုများဖြစ်ပေါ်ခဲ့သည့်အနက် လွမ်နမ်သာပြည်နယ်သည် အဆိုးရွားဆုံးထိခိုက်ခဲ့သည့်ဒေသလည်းဖြစ်သည်။
မုန်တိုင်းဒဏ်ကြောင့် မြေနိမ့်ပိုင်းဒေသများတွင် မြစ်ချောင်းများရေပြည့်လျှံကာ ရေလွှမ်းမိုးမှုများလည်းဖြစ်ပေါ်ခဲ့သည်။
မုန်တိုင်းကြောင့် စာသင်ကျောင်းများသာမက နေအိမ်များ၊ဆေးရုံများ၊လမ်းများ၊ရေလှောင်ကန်များ၊ တံတားများနှင့်လယ်မြေများပါ ရေနစ်မြုပ်ကာ တိရစ္ဆာန်များလည်းဆုံးရှုံးခဲ့ရသည်ဟုသိရသည်။လာအိုမြို့တော် ဗီယင်ကျန်း၏ခရိုင်အချို့တွင်လည်း ရေကြီးရေလျှံမှုများ ဖြစ်ပေါ်ခဲ့ကြောင်းသိရသည်။
တစ်ချိန်တည်းမှာပင် လာအိုနိုင်ငံမိုးလေဝသဗျူရိုမှ တာဝန်ရှိသူများကလည်း မြေနိမ့်ပိုင်းဒေသများတွင် နေထိုင်သူများအနေဖြင့်သတိထားနေထိုင်ရန်နှင့် နောက်ထပ်ရေကြီးမှုများအတွက် အဆင်သင့်ပြင်ဆင်ထားရန်လည်း ထပ်မံအကြံပြုထားသည်။
အထူးသဖြင့် မြစ်ကမ်းဘေးတွင်နေထိုင်ကြသည့် ပြည်သူများအနေဖြင့် ရေတက်လာနိုင်သည့် အန္တရာယ်ကို အချိန်တိုင်းသတိရှိကြရန်လည်း မိုးလေဝသဌာနက သတိပေးထားသည်။
Source : ရှင်းဟွာ