လာမည့် အောက်တိုဘာ ၂၇ ရက်၌ ဘင်္ဂလားပင်လယ် အော်(အနောက်တောင်ပိုင်း)နှင့် ယင်းနှင့် ဆက်စပ်လျက်ရှိသော ဘင်္ဂလားပင်လယ်အော် (အနောက်အလယ်ပိုင်း) တို့တွင် ဆိုင်ကလုန်းမုန်တိုင်းတစ်ခုဖြစ်ပေါ်နိုင်သည်ဟု မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။
ဘင်္ဂလားပင်လယ်အော်(အရှေ့တောင်ပိုင်း)တွင်ဖြစ်ပေါ်နေသော လေဖိအားနည်းရပ်ဝန်းသည် ဆက်လက်တည်ရှိနေရာမှ အနောက်-အနောက်မြောက်ဘက်သို့ ရွေ့လျားပြီး ပိုမိုအားကောင်းလာနိုင်ကာ အောက်တိုဘာ ၂၅ ရက်တွင် ဘင်္ဂလားပင်လယ်အော် (အရှေ့တောင်ပိုင်း)နှင့် ယင်းနှင့်ဆက်စပ်လျက်ရှိသော ဘင်္ဂလားပင် လယ်အော်(အလယ်ပိုင်း)တို့တွင် မုန်တိုင်းငယ်အဖြစ်၊ အောက်တိုဘာ ၂၆ ရက်တွင်အားကောင်းသောမုန်တိုင်းငယ်အဖြစ်၊ အောက်တိုဘာ ၂၇ ရက်တွင် ဘင်္ဂလားပင်လယ်အော်(အနောက်တောင်ပိုင်း)နှင့် ယင်းနှင့် ဆက်စပ်လျက်ရှိသော ဘင်္ဂလားပင်လယ်အော်အနောက်(အလယ်ပိုင်း)တို့တွင် ဆိုင်ကလုန်းမုန်တိုင်းတို့အဖြစ်ရောက်ရှိနိုင်ကြောင်း သိရသည်။
ထို့ကြောင့် မန္တလေးတိုင်း၊ စစ်ကိုင်းတိုင်း (အောက်ပိုင်း)၊ ကယားပြည်နယ်နှင့် ရှမ်းပြည်နယ်(မြောက်ပိုင်းနှင့် အရှေ့ပိုင်း)တို့မှလွဲ၍ ကျန်တိုင်းနှင့် ပြည်နယ်များ၌ မနက် ဖြန် အောက်တိုဘာ ၂၅ ရက်မွန်းတည့်ချိန်အထိ မိုးရွာသွန်းမှုများဖြစ်ပေါ်နိုင်ကြောင်း သိရသည်။
ထို့ပြင် ပဲခူးတိုင်း၊ စစ်ကိုင်းတိုင်း(အထက်ပိုင်း)၊ ဧရာဝတီတိုင်းနှင့် တနင်္သာရီတိုင်းတို့တွင် မိုးတိမ်တောင်များ ဖြစ်ထွန်းမှုအားကောင်းလျက်ရှိရာ မိုးတိမ်တောင်များ ရွေ့လျားရာ နေရာတစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းဖြစ်စဉ်များဖြစ်ပေါ်နိုင်ကြောင်း သိရသည်။