လက်ဘနွန် ဟစ်ဇ်ဘိုလာအဖွဲ့ရဲ့ အစ္စရေးနိုင်ငံဘက်ကို နယ်စပ်ဖြတ်ကျော် ပစ်ခတ်တာတွေ ပြင်းထန်လာမှုဟာ အန္တရာယ်များတဲ့ စစ်ရှိန်မြင့်မှုဖြစ်လာနိုင်တယ်လို့ အစ္စရေးစစ်တပ်က တနင်္ဂနွေနေ့မှာ သတိပေးလိုက်ပါတယ်။
ဟစ်ဇ်ဘိုလာရဲ့ မြင့်တက်လာတဲ့ ရန်လိုမှုက လက်ဘနွန်နဲ့ ဒေသတစ်ခုလုံးကို ပျက်စီးစေမယ့် အကျိုးဆက်တွေဖြစ်လာနိုင်သော ကျယ်ပြန့်တဲ့ စစ်ကမ်းပါးစွန်းဆီ တွန်းပို့နေတယ်လို့ အစ္စရေးစစ်တပ် ပြောရေးဆိုခွင့်ရှိသူ ရေတပ်ဗိုလ်ချုပ်ကြီး ဒန်နီရယ် ဟာဂရီက ရုပ်သံထုတ်ပြန်ချက်မှာ ပြောဆိုခဲ့ပါတယ်။
အီရန်ကျောထောက်နောက်ခံပြု ဟစ်ဇ်ဘိုလာအဖွဲ့ဟာ ပြီးခဲ့တဲ့ သီတင်းပတ်မှာ အစ္စရေးဘက်ကို ဒုံးကျည်နဲ့ ဒရုန်း အစုအပြုံလိုက်ပစ်လွှတ်တိုက်ခိုက်မှု လုပ်ဆောင်ခဲ့ပါတယ်။ ဒါဟာ ဂါဇာစစ်ပွဲနဲ့အပြိုင် ပေါ်ပေါက်လာတဲ့ နှစ်ဖက် အပြန်အလှန်ပစ်ခတ်မှု ၈ လတာအတွင်း အကြီးဆုံး တိုက်ခိုက်မှုဖြစ်ခဲ့ပါတယ်။
ပြီးခဲ့တဲ့ သီတင်းပတ်မှာ အပြန်အလှန်ပစ်ခတ်မှုတွေ ကြီးကြီးမားမားဖြစ်ခဲ့ပြီးနောက် တနင်္ဂနွေနေ့မှာ ဟစ်ဇ်ဘိုလာဘက်က ပစ်ခတ်မှုတွေ သိသိသာသာ လျော့ကျသွားခဲ့တာတွေ့ရပါတယ်။ ယင်းသို့ရှိစဉ် လက်ဘနွန်တောင်ပိုင်းရှိ ဟစ်ဇ်ဘိုလာအုပ်စုကို လေကြောင်းတိုက်ခိုက်မှု အကြိမ်များစွာ လုပ်ဆောင်ခဲ့တယ်လို့ အစ္စရေးစစ်တပ်က ပြောဆိုခဲ့ပါတယ်။
လက်ဘနွန်တောင်ပိုင်းနယ်စပ်တလျှောက် ရန်လိုမှုတွေ ပြေငြိမ်းဖို့ရာ အမေရိကန်နဲ့ ပြင်သစ်က ညှိနှိုင်းမှုတွေ လုပ်ဆောင်နေခဲ့ပါတယ်။ ဟစ်ဇ်ဘိုလာအဖွဲ့ကတော့ ဂါဇာမှာ အစ္စရေးထိုးစစ် မရပ်မခြင်း သူတို့ရဲ့ ပစ်ခတ်မှုတွေကို ရပ်မှာ မဟုတ်ဘူးလို့ ပြောဆိုပါတယ်။
လက်ဘနွန်နဲ့ မိမိတို့ နယ်စပ်တလျှောက် လုံခြုံမှုပြန်ရသည့်တိုင် အရပ်သားတွေကိုအကာအကွယ်ပေးရေး လိုအပ်တဲ့ အစီအမံတွေ အစ္စရေးက လုပ်ဆောင်သွားမှာဖြစ်တယ်လို့ ဟာဂရီက ပြောဆိုသွားပါတယ်။
Arab News