ရွှေတိဂုံစေတီတော် မသိုးသင်္ကန်းယှဉ်ပြိုင်ရက်လုပ် ကပ်လှူပူဇော်ပွဲကို လှူဒါန်းနိုင်ကြောင်းနှင့် ညအိပ်ကုသိုလ်ပြုကြမည့်သူများ ညအိပ်ခွင့်တိုင်ကြားနိုင်

လေးဆူဓါတ်ပုံ ရွှေတိဂုံစေတီတော် (၃၇)ကြိမ်မြောက် မသိုးသင်္ကန်း ယှဉ်ပြိုင်ကပ်လှူပွဲဇော်ကို နိုဝင်ဘာ(၃)ရက်နေ့ တွင် ကျင်းပမည်ဖြစ်ပြီး တန်ဆောင်မုန်းလပြည့်နေ့ နံနက်(၁)နာရီတွင် မသိုးသင်္ကန်းရက်လုပ်ပြိုင်ပွဲ ဆုချီးမြှင့်ပွဲကိုကျင်းပမည်ဖြစ်ကြောင်း ရွှေတိဂုံစေတီတော် ဘဏ္ဍာတော်ထိန်းဂေါပက အဖွဲ့က ယနေ့ အောက်တိုဘာ(၂၀)ရက်နေ့တွက် အသိပေးထုတ်ပြန်ထားသည်။ တန်ဆောင်မုန်းလပြည့်နေ့တွင် အာရုံခံမုခ်ဦးများအတွင်းရှိ ဗုဒ္ဓရုပ်ပွားတော်(၄)ဆူ နှင့် အထက်ပစ္စယံ ပတ္တမြားမျက်ရှင် ရုပ်ပွားတော် ရင်ပြင်တော်ပေါ်ရှိ ဗုဒ္ဓရုပ်ပွားတော်များကို မသိုးသင်္ကန်းတော်များ ဆက်ကပ်မည်ဖြစ်ကြောင်း သိရသည်။ အဆိုပါ မသိုးသင်္ကန်းပြိုင်ပွဲတွင် ပြိုင်ပွဲဝင်အသင်း(၉)သင်း ပါဝင်ယှဉ်ပြိုင်မည်ဖြစ်ပြီး ပထမဆု ကျပ်သိန်(၄၀)၊ ဒုတိယဆု ကျပ်(၃၅)သိန်း၊တတိယဆု ကျပ်သိန်း(၃၀)၊ စတုတ္ထဆု ကျပ်(၂၅)သိန်းနှင့် နှစ်သိမ့်ဆုအဖြစ် (၁၅)သိန်း စီ (၅)သင်းကို ပေးအပ်သွားမည်ဖြစ်သည်။ မသိုးသင်္ကန်း ယှဉ်ပိုင်ရက်လုပ် ကပ်လှူပွဲဇော်တွင် အများပြည်သူတို့ပါဝင် လှူဒါန်းနိုင်ကြောင်းနှင့် ညအိပ်ကုသိုလ်ပြုကြမည့် ဘုရားဖူးပြည်သူများအနေဖြင့်လည်း နိုင်ငံသားစိစစ်ရေးကတ်ပြားဖြင့် ညအိပ်ခွင့်တိုင်ကြားရန်လည်း အသိပေးထားသည်။ ပုံစာ -ရွှေတိဂုံစေတီတော်၌ (၃၆)ကြိမ်မြောက်မသိုး သင်္ကန်းရက်လုပ်ကပ်လှူပူဇော်ခဲ့သည့်မြင်ကွင်းများ