မကွေးတိုင်း၊မင်းဘူး(စကု)မြို့နယ်၊မန်းရွှေစက် တော်ဘုရားကြီးအနီးရှိ ရွှေစက်တော်မန်းချောင်း အပန်းဖြေဆင်စခန်းဖွင့်လှစ်ရာ၌ ယခုနှစ်တွင် ဆင်လိမ်မာလေးများ၏ ကပြ(အလှပြ)ဖျော်ဖြေဧည့်ခံမှုအစီအစဥ်အား ထည့်သွင်းသွားမည်ဟု ဆင်စခန်းမှသိရသည်။
ရွှေစက်တော်မန်းချောင်းဆင်စခန်းအား ယခုနှစ်တွင် မန်းရွှေစက်တော်ဘုရားကြီး၏ ဗုဒ္ဓပူဇနိယပွဲတော်နှင့်အတူ တစ်ဆက်တည်းဖွင့်လှစ်သွားမည်ကြောင်း သိရသည်။
“ဆင်စခန်းကအမြဲဖွင့်ထားတယ် ရွှေစက်တော်ဘုရားပွဲတော်ချိန်မဟုတ်တဲ့အတွက် လာတဲ့သူနည်းတယ် ဘုရားပွဲတော်ချိန်ဆိုရင်တော့ လာတဲ့လူများပါတယ် ဒီနှစ်မှာတော့ ဆင်လိမ်မာလေးတွေရဲ့ ကပြ(အလှပြ)ဖျော်ဖြေဧည့်ခံတဲ့အစီအစဉ် (Elephant Show)ကို ထည့်သွင်းသွားမှာပါ”ဟု ရွှေ စက်တော်မန်းချောင်းဆင်စခန်းမှ တာဝန်ရှိသူတစ်ဦးကပြောသည်။
လက်ရှိအချိန်၌ ရွှေစက်တော်မန်းချောင်းဆင်စခန်းသို့ လာရောက်အပန်းဖြေသူများအတွက် ခရီးသွားဝန်ဆောင်မှုလုပ်ငန်းများဆောင်ရွက်ပေးနိုင်ရန်၊ ခရီးတိုဆင်စီး၍ သဘာဝရှုခင်းများကြည့် ရှုခံစားနိုင်ရန်နှင့်မန်းချောင်းဘေးတွင် ဆင်များနှင့်အတူ ရေချိုးအပန်းဖြေအနားယူနိုင်ရန် ယာယီတံတား၊တဲကျောင်းနှင့်အလှဆင်ခြင်းများအား ပြင်ဆင်ဆောင်ရွက်လျက်ရှိကြောင်း သိရသည်။
ရွှေစက်တော်မန်းချောင်းဆင်စခန်းအား နေ့စဉ် နံနက် ၇ နာရီမှည ၆ နာရီအထိဖွင့်လှစ်ထားပြီး ဆင်စခန်း၌ ဆင်ထီး ၄ ကောင်၊ဆင်မ ၇ ကောင် (စုစုပေါင်း ၁၁ ကောင်)ရှိကာ ဆင်စခန်းဝင်ကြေးအဖြစ် ပြည်တွင်းခရီးသွားတစ်ဦးလျှင် ၁၀၀၀ ကျပ်၊ နိုင်ငံခြားသားတစ်ဦးလျှင် ၁၀၀၀၀ ကျပ်သတ်မှတ်ထားကြောင်း သိရသည်။
ထို့ပြင် ခရီးတိုဆင်စီးခအနေဖြင့် ပြည်တွင်းခရီး သွားတစ်ဦးလျှင် ၅၀၀၀ ကျပ်၊ နိုင်ငံခြားသားတစ်ဦးလျှင် ၁၀၀၀၀ ကျပ်သတ်မှတ်ထားကြောင်း သိရသည်။
“ဆင်စခန်းမှာ တည်းခိုဆောင်အနေနဲ့ ဘန်ဂလို ၁၁ လုံးရှိပါတယ် ငှားရမ်းခ တစ်ရက်ကို ၃၀၀၀၀ ကျပ်သတ်မှတ်ထားပါတယ်”ဟု ရွှေစက်တော်မန်းချောင်းဆင်စခန်းမှ တာဝန်ရှိသူတစ်ဦးကပြော သည်။
ရွှေစက်တော်မန်းချောင်းအပန်းဖြေဆင်စခန်းအား ပဒေါင်း-ပျော်ဘွယ် ကြိုးပြင်ကာကွယ်တောအ တွင်း၌ တောတောင်ရေမြေနှင့်စိမ်းစိုသာယာလှပသည့် သဘာဝရှုခင်းအလှများကိုအခြေခံ၍ မြန်မာ့သစ်လုပ်ငန်း၊မင်းဘူးသစ်ထုတ်ရေးဒေသ၊ဆင် ထိန်းသိမ်းစောင့်ရှောက်ရေးအခြေပြုခရီးသွားလုပ်ငန်းမှ ပြည်တွင်း/ပြည်ပ ခရီးသွားများအား ဆွဲဆောင်နိုင်ရန်နှင့်ခရီးသွားဝန်ဆောင်မှုလုပ်ငန်းများဆောင်ရွက်နိုင်ရန် ရည်ရွယ်ဖွင့်လှစ်ထားခြင်းဖြစ်သည်။
