ထိုင်း – မြန်မာနယ်စပ် မြဝတီမြို့နယ်အတွင်းရှိ ရွှေကုက္ကိုကျေးရွာတွင် ဖြစ်ပွားနေသည့် ဝမ်းရောဂါဖြစ်ပွားမှုနှင့်ပတ်သက်၍ ရောဂါကာကွယ်ထိန်းချုပ်နိုင်ရေး အရှိန်အဟုန်ဖြင့် ဆောင်ရွက်နေကြောင်း ကျန်းမာရေးဝန်ကြီးဌာန တာဝန်ရှိသူက ပေါ်ပြူလာနယူးစ်သို့ ပြောသည်။
ရွှေကုက္ကို အပါအဝင် မန္တလေး၊ လပွတ္တာနှင့် ဒေသအချို့တွင် ဝမ်းရောဂါဖြစ်ပွားမှုနှုန်း မြင့်တက်နေသည့်အပေါ် ကျန်းမာရေးဝန်ကြီးဌာန၏ ဆောင်ရွက်ချက်များနှင့် ပတ်သက်၍ ပေါ်ပြူလာနယူးစ်၏ မေးမြန်းမှုကို ဝန်ကြီးဌာနက ပြန်လည်ဖြေကြားခဲ့ခြင်း ဖြစ်သည်။
“ကရင်ပြည်နယ်အစိုးရအဖွဲ့ရဲ့ အနီးကပ် ကြီးကြပ်ကွပ်ကဲမှုဖြင့် ကရင်ပြည်နယ်ပြည်သူ့ကျန်းမာရေးဦးစီးဌာနသည် ပြည်နယ်အစိုးရအဖွဲ့မှ တာဝန်ရှိသူများ၊ မြဝတီခရိုင်စီမံအုပ်ချုပ်ရေးအဖွဲ့တို့နှင့်ညှိနှိုင်း၍ ဒေသခံကျန်းမာရေးဝန်ထမ်းများ၊ ဒေသခံကျန်းမာရေးစောင့်ရှောက်မှုပေးသည့် အဖွဲ့အစည်းများနှင့်ပူးပေါင်းကာ ရောဂါကာကွယ်ထိန်းချုပ်ရေးလုပ်ငန်းများကို အရှိန်အဟုန်မြှင့်တင် ဆောင်ရွက်လျက်ရှိပါတယ်” ဟု ဆိုသည်။
ထို့ပြင် နယ်စပ်ဒေသဖြစ်သည့်အတွက် အပြည်ပြည်ဆိုင်ရာ ကျန်းမာရေးပြဌာန်းချက်(IHR 2005) နှင့်အညီ ကမ္ဘာ့ကျန်းမာရေးအဖွဲ့နှင့်လည်း အချိန်နှင့်တပြေးညီ ပူးပေါင်းဆောင် ရွက်လျက်ရှိကြောင်းလည်း ကျန်းမာရေးဝန်ကြီးဌာန တာဝန်ရှိသူက ဆိုသည်။
ထိုင်း – မြန်မာနယ်စပ်ဖြစ်သည့် မြဝတီမြို့နယ် ၊ ရွှေကုက္ကိုကျေးရွာ သီတဂူချစ်သူဆေးရုံသို့ ဒီဇင်ဘာလ (၁၇)ရက်မှ (၂၃)ရက်အထိ ဝမ်းပျက်ဝမ်းလျှောရောဂါလက္ခဏာများဖြင့် ဆေးရုံတက်ရောက် ကုသမှုခံယူခဲ့သူ စုစုပေါင်း (၁၀၄)ဦးရှိခဲ့ပြီး ဒီဇင်ဘာ (၂၃)ရက်တွင် ဆေးရုံတက်ရောက်ဆဲလူနာ (၁၉)ဦးသာ ကျန်ရှိတော့ပြီး ကျန်းမာရေး ကောင်းမွန်လျက်ရှိကြောင်းလည်း သိရသည်။
အဆိုပါ ဝမ်းရောဂါဖြစ်ပွားသူများအနက်မှ ဒီဇင်ဘာ (၁၉) ရက်တွင် လူနာတစ်ဦး ေ-သဆုံးခဲ့ပြီး အဆိုပါလူနာသည် နှလုံးရောဂါအခံရှိသူ ဖြစ်ကြောင်းလည်း ကျန်းမာရေးဝန်ကြီးဌာန၏ ဖြေကြားချက်အရ သိရသည်။
လက်ရှိတွင် မြဝတီမြို့နယ်အတွင်း ပြင်းထန်ဝမ်းပျက်ဝမ်းလျှောရောဂါ ကာကွယ် ထိန်းချုပ်ရေးလုပ်ငန်းများအား အရှိန်အဟုန်မြင့်တင်ဆောင်ရွက်နေပြီး ရွှေကုက္ကိုနှင့် မြဝတီမြို့နယ် များတွင်ပညာပေး Vinyl ပိုစတာများကို ထုတ်ဝေ ဖြန့်ဖြူးခြင်း၊ ပြည်နယ်အစိုးရအဖွဲ့ထံ သတင်းပေးပို့၍ မြဝတီခရိုင်စီမံအုပ်ချုပ်ရေးအဖွဲ့၏ အစီအစဉ်ဖြင့် ရွှေကုက္ကိုသီတဂူချစ်သူဆေးရုံသို့ လိုအပ်သည့် ဆေးနှင့်ဆေးဝါးများကို အချိန်နှင့်တပြေးညီ ထောက်ပံ့ပေးခဲ့ပြီး ဖြစ်ကြောင်းလည်း သိရသည်။
ထို့ပြင် မြဝတီ-ဘားအံ လမ်းကြောင်းတစ်လျှောက်ရှိ ကော့ကရိတ်၊ လှိုင်းဘွဲ့၊ ဘားအံမြို့နယ် များတွင်လည်း ဝမ်းပျက်ဝမ်းလျှော ရောဂါစောင့်ကြပ်ကြည့်ရှုခြင်းလုပ်ငန်းများအား အထူးအလေးထား ဆောင်ရွက်ရန် ညွှန်ကြားထားကာ လိုအပ်ပါက ဝမ်းပျက်ဝမ်းလျှောရောဂါ ကာကွယ်ထိန်းချုပ်ခြင်း လုပ်ငန်းများအား ကွင်းဆင်းတုံ့ပြန်ဆောင်ရွက်နိုင်ရေးအဖွဲ့များကိုလည်း ဖွဲ့စည်းထားရှိပြီး မြဝတီဆေးရုံတွင် လိုအပ်သည့် ဆေးနှင့်ဆေးပစ္စည်းများကို စုပုံထားရှိကာ ရောဂါကာကွယ် ထိန်းချုပ်ရေးအဖွဲ့များမှ တောင်းခံသည့် ပမာဏအတိုင်း ထောက်ပံ့ပေးနိုင်ရန် စီစဉ်ထားကြောင်းလည်း သိရသည်။
အကယ်၍ လိုအပ်ပါက ကမ္ဘာ့ကျန်းမာရေးအဖွဲ့၏ ပံ့ပိုးမှုဖြင့် မြဝတီမြို့နယ်၊ ရွှေကုက္ကိုကျေးရွာနှင့် ဆက်စပ်လျက်ရှိသော မြဝတီမြို့နယ်၊ ဘားအံမြို့နယ်၊ လှိုင်းဘွဲ့မြို့နယ်များတွင်လည်း ရောဂါဖြစ်ပွားနိုင်ချေ မြင့်မားသောလူအုပ်စုများအား ပြင်းထန်ဝမ်းပျက် ဝမ်းလျှောရောဂါ တုံ့ပြန်ကာကွယ်ဆေး (OCV)တိုက်ကျွေးနိုင်ရေး စီစဉ်ဆောင်ရွက်မည်ဖြစ်ကြောင်းလည်း ကျန်းမာရေးဝန်ကြီးဌာန တာဝန်ရှိသူက ဆိုသည်။
လက်ရှိတွင် ရွှေကုက္ကိုကျေးရွာ၌ ဖြစ်ပွားနေသည့် ဝမ်းရောဂါဖြစ်ပွားမှုနှင့် ပတ်သက်၍ ထိုင်းနိုင်ငံဘက်မှလည်း သတိထားစောင့်ကြည့်နေပြီး နှစ်နိုင်ငံ နယ်စပ်ဖြတ်သန်းသွားလာရေးလမ်းကြောင်းဖြစ်သည့် လှေလမ်းကြောင်းကို တစ်လကြာပိတ်ထားမည်ဖြစ်ကြောင်း ထိုင်းနိုင်ငံ ဒေသအာဏာပိုင်များက ပြောကြားထားသည်။