လာမည့် ဒီဇင်ဘာ ၂၈ ရက်မှစတင်၍ အပိုင်းလိုက်ကျင်းပမည့် လွတ်လပ်၍တရားမျှတသော ပါတီစုံဒီမိုကရေစီ အထွေထွေရွေးကောက်ပွဲအောင်မြင်စေရေးအတွက် လိုအပ်သည်များကိုအလေးထားဆောင်ရွက်ရန် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က မှာကြားသည်။
ယနေ့ နိုဝင်ဘာ ၁၆ ရက်နံနက်ပိုင်းက အရှေ့တောင်တိုင်းစစ်ဌာနချုပ်၏ စစ်ဦးစီး၊ စစ်ရေးနှင့် စစ်ထောက်ဆိုင်ရာဆောင်ရွက်ထားရှိမှုများကိုကြည့်ရှုစစ်ဆေးစဥ်မှာကြားခဲ့ခြင်းဖြစ်ကြောင်း သိရသည်။
မကြာမှီကျင်းပမည့် ပါတီစုံဒီမိုကရေစီအထွေထွေ ရွေးကောက်ပွဲကြီးအောင်မြင်စေရေးအတွက် လိုအပ်သည်များကို အလေးထားဆောင်ရွက်ရန်လိုကာ လုံခြုံရေးနှင့် ကာကွယ်ရေးဆိုင်ရာများအပြင် ဒေသဖွံ့ဖြိုးရေး၊ နယ်မြေခံလူထု၏ အကျိုးစီးပွားဖော်ဆောင်ရေးတို့ကိုလည်း သက်ဆိုင်ရာနယ်မြေအလိုက် နယ်မြေခံတပ်ရင်း ၊ တပ်ဖွဲ့များက တတ်စွမ်းသရွေ့ကြိုးပမ်းဆောင်ရွက်ရမည်ဟုမှာကြားခဲ့ကြောင်း သိရသည်။
ဒေသတွင်းလုံခြုံရေး၊ နိုင်ငံတော်လုံခြုံရေးတို့ကိုအစဉ်အမြဲဂရုပြုရန်၊ အလေးအနက်ထားဆောင်ရွက်သွားရန်၊ လုံခြုံရေးနှင့်ပတ်သက်သည့် လုပ်ဆောင်သင့်လုပ်ဆောင်ထိုက်သည်များအားလုံးကို အမြဲမပြတ်ဆောင်ရွက်ရန်၊ မဟာဗျူဟာအရအရေးကြီးသည့် လမ်း ကြောင်းများ အားလုံးလုံခြုံချောမွေ့စွာသွားလာအသုံးပြုနိုင်ရေးဆောင်ရွက်ရန်၊ အွန်လိုင်းငွေကြေးလိမ်လည်မှုနှင့် အွန်လိုင်းလောင်းကစားမှုများကို အမျိုးသားရေးတာဝန်တစ်ရပ်အဖြစ်ခံယူ၍ ဆက်လက်ရှင်းလင်းတိုက်ဖျက်ရန်တို့ကိုလည်း မှာကြားခဲ့ကြောင်း သိရသည်။
ထို့နောက် တက်မတော်ကာကွယ်ရေးဦးစီးချုပ်သည် မော်လမြိုင်တပ်နယ်ရှိ နယ်မြေခံတပ်မတော်ဆေးရုံတွင် တက်ရောက်ကုသမှုခံယူလျက်ရှိသည့် နိုင်ငံတော်ကာကွယ်ရေးနှင့် လုံခြုံရေးတာဝန်များထမ်းဆောင်စဉ် ထိခိုက်ဒ-ဏ်ရာရရှိခဲ့သော အရာရှိ၊ စစ်သည်များအား ထိခိုက်ဒ-ဏ်ရာရရှိခဲ့မှုအခြေအနေများ၊ ရောဂါကုသပျောက်ကင်းမှုအခြေအနေများကိုမေးမြန်းပြီး အားပေးစကားပြောကြားကာလိုအပ်သည်များ၊ ဆေးရုံလိုအပ်ချက်များကို ဖြည့်ဆည်းပေးခဲ့ကြောင်း သိရသည်။