ပါတီစုံဒီမိုကရေစီ အထွေထွေရွေးကောက်ပွဲ အပိုင်း (၃) ကို ရွေးကောက်ပွဲ အပိုင်း (၂) ကျင်းပပြီး နှစ်ပတ်အကြာတွင် ကျင်းပမည်ဖြစ်ကြောင်း အမျိုးသားကာကွယ်ရေးနှင့်လုံခြုံရေးကောင်စီ သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ယနေ့ နိုဝင်ဘာ (၁၀) ရက် ညပိုင်းတွင် ပြောကြားခဲ့သည်။
မကြာမီကျင်းပမည့် ပါတီစုံဒီမိုကရေစီအထွေထွေရွေးကောက်ပွ်နှင့် ပတ်သက်၍ ပြည်သူများကို အသိပေးပြောကြားသည့် ရုပ်သံဗီဒီယိုကတဆင့် အထက်ပါအတိုင်း ထည့်သွင်းပြောကြားခဲ့ခြင်းလည်း ဖြစ်သည်။
ရွေးကောက်ပွဲအပိုင်း (၁) ကို ၂၀၂၅ ခုနှစ် ဒီဇင်ဘာ ၂၈ ရက်တွင် မြို့နယ် (၁၀၂) မြို့နယ်၌ စတင်ကျင်းပမည်ဖြစ်ပြီး အပိုင်း (၂) ကို ၂၀၂၆ ခုနှစ် ဇန်နဝါရီလ (၁၁) ရက်တွင် မြို့နယ် (၁၀၀) မြို့နယ်၌ ကျင်းပမည်ဖြစ်ကြောင်း သိရသည်။
ရွေးကောက်ပွဲအပိုင်း (၃) ကျင်းပမည့်မြို့နယ်များကိုမူ ပြည်ထောင်စုရွေးကောက်ပွဲကော်မရှင်က အသိပေးထုတ်ပြန်ခြင်းမရှိသေးကြောင်း သိရသည်။
လက်ရှိအချိန်တွင် ရွေးကောက်ပွဲအပိုင်း (၁) ကျင်းပရန် ရက်ပေါင်း (၄၈) ရက်သာ လိုတော့မည်ဖြစ်ပြီး ပထမအကြိမ်မဲဆန္ဒရှင်စာရင်းကို ကြေညာထားပြီးဖြစ်သကဲ့သို့ ဝင်ရောက်ယှဉ်ပြိုင်မည့် ကိုယ်စားလှယ်လောင်စာရင်းများအနေဖြင့်လည်း မဲဆွယ်စည်းရုံးမှုများ စတင်လုပ်ဆောင်နေပြီးလည်း ဖြစ်ကြောင်း သိရသည်။