ရေအားလျှပ်စစ်ထုတ်လုပ်နိုင်ရေးအတွက် သတ်မှတ်ရှာဖွေထားသည့်နေရာများတွင် အနိမ့်တမံများကိုအမြန်ဆောင်ရွက်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ အမျိုးသားအဆင့်ရေအရင်းအမြစ်ကော်မတီဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ မတ် ၂၂ ရက်နံနက်ပိုင်းက နေပြည်တော်၌ ကျင်းပသည့် ကမ္ဘာ့ရေနေ့ ၂ဝ၂၅ အခမ်းအနားတွင် မှာကြားခဲ့ခြင်းဖြစ်သည်။
လက်ရှိအနေအထားတွင် ဧရာဝတီမြစ်နှင့် ချင်းတွင်းမြစ်တို့သည် လူတို့၏လုပ်ဆောင်ချက်ကြောင့် သောင်ပို့မှုများ များပြားလာပြီး ရေကြောင်း သွားလာရေးတွင် ကန့်သတ်ချက်များ များလာသဖြင့် မြစ်ကြောင်းများထိန်းသိမ်းရေးသည် အရေးကြီးသည့်အခြေအနေရှိနေပြီး စောလျင်စွာဖြေရှင်းရန်လိုသည်ဟု မှာကြားသည်။
ထို့ပြင် အဓိကမြစ်များနှင့် ယင်းမြစ်များအတွင်းစီးဝင်သည့် မြစ်၊ ချောင်းများ ဘေး ဝဲယာတွင် သဘာဝပတ်ဝန်းကျင်ထိခိုက်စေသည့် လုပ်ငန်းများကို ဒေသဆိုင်ရာ အစိုးရ၊ အုပ်ချုပ်ရေးအဖွဲ့များကကြပ်မတ်ရန်လိုကာ ယင်း မြစ်များသည် ကူးသန်းသွားလာမှုတွင် အဓိကျခြင်းကြောင့် ဆောလျင်စွာ သောင်တူးရှင်းလင်းရမည်ဟု မှာကြားသည်။
” ဟိမဝန္တာတောင်ကစီးဆင်းလာတဲ့ ရေချိုတွေကို စိုက်ပျိုးရေးကဏ္ဍမှာ အကျိုးရှိစွာအသုံးချနိုင်ဖို့၊ ရာသီမရွေးရေကြောင်းသွားလာနိုင်ဖို့၊ ရေအားလျှပ်စစ်ထုတ်လုပ်နိုင်ဖို့၊ မြစ်ဘေး ဝဲ ၊ ယာနဲ့သက်ရောက်တဲ့ နေရာတွေစိမ်းလန်းစိုပြေလာစေဖို့တွေကို ဖြစ်ပေါ်လာစေဖို့ သတ်မှတ်ရှာဖွေထားတဲ့နေရာတွေမှာ အနိမ့်တမံတွေကို ဖြစ်နိုင်သမျှအမြန်ဆောင်ရွက်ရပါမယ်”ဟု နစက ဥက္ကဋ္ဌက မှာကြားသည်။
ထို့ပြင် အနာဂတ်ရေဖူလုံစေရေးအတွက် ရေစီမံအုပ်ချုပ်ရေးလုပ်ငန်းများသည် အလွန်အရေးကြီးကာ ရေရှည်တည်တံ့သည့် ရေစီမံခန့်ခွဲမှုအလေ့အကျင့်ကောင်းများရရှိစေရန် လူတိုင်းကိုအသိပညာပေးခြင်းအပြင် နည်းပညာအသစ်များ တီထွင်ကြံဆခြင်း၊ ရေအသုံးပြုမှုဆိုင်ရာ အလေ့အကျင့်ကောင်းများဖော်ထုတ်ခြင်းစသည့် နည်းစနစ်အသစ်များကို ကျင့်သုံးရမည်ဟုလည်း နစက ဥက္ကဋ္ဌက မှာကြားခဲ့သည်။