ရေထွက်ကုန်များကို ပြည်ပသို့ တိုးမြှင့်တင်ပို့ရန် လုပ်ငန်းရှင်များကို ညွှန်ကြား

ပြည်ပသို့ရေထွက်ကုန်တင်ပို့မှုမှ နှစ်စဉ်နိုင်ငံခြားဝင်ငွေအမြောက်အမြားရရှိနေခြင်းကြောင်း ပိုမိုတိုးမြှင့်တင်ပို့ရန် လုပ်ငန်းရှင်များကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီးက ညွှန်ကြားထားသည်။

ဒုတိယဝန်ကြီး ဒေါက်တာအောင်ကြီးသည် CK FROZEN FOODS YANGON CO.,LTD သို့လည်းကောင်း၊ ADVANCED SEAFOOD INDUSTRIES CO., LTD သို့ လည်းကောင်း၊ သာကေတမြို့နယ်ရှိ MYANMAR GOLDEN PHOENIX INDUSTRIAL CO., LTD သို့လည်းကောင်း သွားရောက်ကြည့်ရှုစစ်ဆေးခဲ့သည်။

ထိုသို့သွားရောက်စဉ် ရေထွက်ကုန်ပစ္စည်းများ ပြည်ပသို့ တင်ပို့ရာမှ နိုင်ငံခြားဝင်ငွေ အမြောက်အမြား နှစ်စဉ်ရရှိလျက်ရှိရာ နိုင်ငံတကာ အသိအမှတ်ပြု တန်ဖိုးမြင့် ရေထွက်ကုန်များ နှစ်အလိုက်တန်ချိန် ပိုမိုတိုးထုတ်တင်ပို့နိုင်ရေး ကြိုးစားဆောင်ရွက်ကြရန် လိုအပ်ကြောင်း၊ ယင်းသို့ လုပ်ငန်းဆောင်ရွက်ရာတွင်လည်း အခက်အခဲများ၊ လိုအပ်ချက်ရှိသည်များကို မိမိတို့ဌာနအနေဖြင့် တတ်စွမ်းအားရှိသမျှ ဘက်စုံထောင့်စုံမှ ပူးပေါင်းကူညီဆောင်ရွက်ပေးရန်လည်း အသင့်ရှိကြောင်း ပြောကြားခဲ့သည်။

ထို့ပြင် ရန်ကုန်တိုင်းဒေသကြီး ဒဂုံမြို့သစ် (ဆိပ်ကမ်း) မြို့နယ်ရှိ L&Z Marine Food Products LTD (အအေးခန်းစက်ရုံ) သို့ ရောက်ရှိရာ စက်ရုံတာဝန်ရှိသူက တစ်နေ့လျှင် အအေးခဲထုတ်လုပ်နိုင်မှုပမာဏ ၂၅ တန်ရှိပြီး တန် ၁၅၀၀ ဆံ့ သိုလှောင်အအေးခန်းဖြင့် လုပ်ငန်း ဆောင်ရွက်နေမှုအခြေအနေ၊ စက်ရုံမှ အရည်အသွေးမြင့်ထုတ်ကုန်များကို သန့်ရှင်းစွာဖြင့် ထုတ်လုပ်နိုင်ရန်အတွက် ငါးလုပ်ငန်းဦးစီးဌာနမှ ဖွင့်လှစ်ထားသည့် သင်တန်းများ တက်ရောက်စေခြင်း၊ ညွှန်ကြားထားသည့် စည်းမျဉ်း စည်းကမ်းချက်များနှင့်အညီ ကုန်ထုတ်လုပ်မှု၊ သိုလှောင်မှု၊ တင်ပို့မှုလုပ်ငန်းစဉ်များ ဆောင်ရွက်လျက်ရှိပြီး စက်ရုံအနေဖြင့် EU၊ Saudi နိုင်ငံများသို့ တင်ပို့ရရှိမှုအတွက် ခွင့်ပြုချက် ရရှိထားပြီဖြစ်၍ ရေချိုငါး၊ ရေငန်ငါးမျိုးများအား အများဆုံးတင်ပို့ လျက်ရှိကြောင်းနှင့် နှစ်အလိုက် တင်ပို့မှု တန်ချိန်များအား ရှင်းလင်းတင်ပြခဲ့ကြောင်း သိရသည်။