မိုးသည်းထန်စွာ ရွာသွန်းကာ ရေကြီးရေလျှံမှုများဖြစ်ပေါ်နေသည့်အတွက် ပဲခူးမြို့တွင် ရေဘေးဒုက္ခသည် ၁၂,၄၆၁ ဦး ရှိလာပြီဖြစ်ကြောင်း ပဲခူးမြို့နယ် အထွေထွေအုပ်ချုပ်ရေးဦးစီး ဌာန၏စာရင်း အချက်အလက်များအရ သိရသည်။
ယင်းကဲ့သို့ ရေကြီးရေလျှံမှုများဖြစ်ပေါ်နေသည့်အတွက် အိမ်ထောင်စုပေါင်း (၂,၉၇၃) မှာလည်း ရေဘေးလွတ်ရာသို့ ရွှေ့ပြောင်းနေထိုင်နေရကြောင်းလည်း သိရသည်။
” အခု ဘားအံက နေပြန်လာတာ။ သထုံ၊ ဘီးလင်း၊ ကျိုက်ထို လမ်းတွေက ပုံမှန်သွားလို့ရပြီ။ ပဲခူးမှာတော့ ရေတက်နေလို့ ကားလေးတွေ သွားလို့မရသေးဘူး”ဟု ခရီးသွားတစ်ဦးက ပြောသည်။
ပဲခူးထွေအုပ်ရုံး၏ ဩဂုတ်လ (၁၀) ရက် အချက်အလက်များအရ ပဲခူးမြို့ပေါ်ရှိ ရပ်ကွက် ၁၁ ခုနှင့် ကျေးရွာ (၆) ရွာ၌ ရေဘေးကြုံနေရပြီး ရေဘေးရှောင်စခန်းပေါင်း (၂၉) ခု ဖွင့်လှစ်ထားကြောင်း သိရသည်။
ရေကြီးရေလျှံမှုဖြစ်နေသည့် ရပ်ကွက်နှင့်ရွာများမှာ ဇိုင်းဂနိုင်းတောင်ပိုင်း၊ ကျွန်းသာယာ၊ ပုဏ္ဏားစု၊ ကျောက်ကြီးစု၊ မြို့သစ်၊ ဇောင်းတူ၊ မုန်တိုင်း၊ ဝါးပြန်ကုန်း၊ ဥဿာ (၇)၊ ကလျာဏီ၊ ရွာသစ်၊ ဘုရားကြီး၊ ကလိ၊ မဇင်း၊ ဇိုင်းဂနိုင်းမြောက်ပိုင်း၊ အဝိုင်းနှင့် ထက်ရှေ့တို့ဖြစ်ကြောင်း သိရသည်။
Photo-ကိုတရုတ်လေး
