ရုရှားနှင့် ယူကရိန်း စစ်အကျဉ်းသားလဲလှယ်မှုအသစ် စတင်

ယူကရိန်းနှင့် ရုရှားအကြား အကျဉ်းသားလဲလှယ်မှုအသစ်ကို စတင်လိုက်ပြီဟု နှစ်နိုင်ငံတာဝန်ရှိသူများက တနင်္လာနေ့တွင် ပြောကြားခဲ့ပြီး နေရပ်ပြန်ကြရသူများတွင် စစ်ပွဲကာလတလျှောက်လုံးနီးပါး ဖမ်းဆီးခံထားရသည့် ယူကရိန်းစစ်သားများလည်း ပါဝင်ခဲ့သည်။

ပြီးခဲ့သည့် သီတင်းပတ်က တူကီယေးနိုင်ငံဆွေးနွေးခဲ့မှု၌ ရရှိခဲ့သော သဘောတူညီချက်အရ အလဲအလှယ်လုပ်ရာတွင် အသက် ၂၅ နှစ်အောက် ဖမ်းဆီးခံထားရသူများအပြင် ပြင်းထန်‌သောဒဏ်ရာရရှိထားသူများလည်း ပါဝင်သည်ဟု ယူကရိန်းသမ္မတ ဗိုလိုဒီမာ ဇလန်းစကီးက တယ်လီဂရမ်တွင် အတည်ပြုရေးသားခဲ့သည်။

ယူကရိန်းသည် အကျဉ်းသား အလဲအလှယ်ခြင်းကိစ္စကို ဆိုင်းထားသည်ဟု မော်စကိုက စွပ်စွဲခဲ့ပြီး ကိဗ်က ငြင်းဆိုခဲ့သော သီတင်းပတ်ကုန်ပိုင်းက အငြင်းပွားမှုအပြီးတွင် ယခုအစီအစဉ်ကို အကောင်အထည်ဖော်လိုက်ခြင်းဖြစ်သည်။

ရုရှားတွင် ထိန်းသိမ်းခံထားရသည့် ယူကရိန်းနိုင်ငံသားများသည် နေရပ်သို့ပြန်လာနေပြီဖြစ်ကြောင်းနှင့် ယနေ့တွင် လဲလှယ်မှု စတင်ခဲ့ပြီး လာမည့်ရက်အနည်းငယ်အထိ အဆင့်အလိုက်ဆက်လက် ဆောင်ရွက်သွားမည်ဖြစ်ကြောင်း ဇလန်းစကီးက ရေးသားခဲ့သည်။

လွတ်မြောက်လာသူများထဲတွင် စစ်ပွဲ၏ ပထမရက်သတ္တပတ်များအတွင်း ရုရှားတို့၏ အပြင်းအထန်တို-က်ခို-က်မှုကို ခံခဲ့ရသော မာရီယူပူးလ်မြို့ကို ကာကွယ်ခဲ့သည့် ယူကရိန်းစစ်သားများလည်း ပါဝင်ခဲ့သည်ဟု ယူကရိန်းစစ်အကျဉ်းသားဆိုင်ရာ ညှိနှိုင်းရေးဌာနချုပ်က ပြောကြားခဲ့သည်။

လွတ်မြောက်လာသူအများစုသည် ၂၀၂၂ ခုနှစ်ကတည်းက ထိန်းသိမ်းခံထားရသူများဖြစ်ကြောင်း ယူကရိန်းလွှတ်တော် လူ့အခွင့်အရေးကော်မရှင်နာဒီမီထရို လူဘီနက်စ်က ပြောကြားခဲ့သည်။

ရုရှားကာကွယ်ရေးဝန်ကြီးဌာနကလည်း အကျဉ်းသားလဲလှယ်မှု လုပ်ဆောင်နေပြီဖြစ်ကြောင်း အတည်ပြုခဲ့သည်။ “လောလောဆယ်မှာ ရုရှားစစ်မှုထမ်းတွေ ဘယ်လာရုစ်သမ္မတနိုင်ငံထဲမှာ ရှိနေပြီး အဲဒီမှာ စိတ်ပိုင်းဆိုင်ရာနဲ့ ဆေးဘက်ဆိုင်ရာ အကူအညီတွေ ရရှိနေပါတယ်” ဟု ဝန်ကြီးဌာက ပြောဆိုခဲ့သည်။

ယခုအကျဉ်းသားလဲလှယ်မှုသည် သုံးနှစ်ကြာခဲ့ပြီဖြစ်သော စစ်ပွဲစခဲ့ပြီးနောက်ပိုင်း အကြီးဆုံး လဲလှယ်မှုဖြစ်လိမ့်မည်ဟု ယူကရိန်းနှင့် ငြိမ်းချမ်းရေးဆွေးနွေးမှုများဆိုင်ရာ ရုရှားကိုယ်စားလှယ်အဖွဲ့ အကြီးအကဲ ဗလာဒီမာ မီဒင်စကီးက ပြီးခဲ့သည့် သီတင်းပတ်တွင် ပြောဆိုထားသည်။ ကျဆုံး ယူကရိန်းစစ်သည် ၆,၀၀၀ ကျော်၏ ရုပ်အလေ-ာင်းများနှင့် အရေအတွက် အတိအကျမသိရသေးသည့် ဒဏ်ရာရစစ်သည်များကို ရုရှားက လွှဲပြောင်းပေးသွားမှာဖြစ်ကြောင်း ၎င်းက ပြောကြားခဲ့သည်။

Ref: စီအင်န်အင်န်