ယနေ့ နိုဝင်ဘာ (၂) ရက် ညဦးပိုင်းတွင် ရန်ကုန်မြို့လယ်၊ ၂၆ လမ်းနှင့် ကုန်သည်လမ်းထောင့်ရှိ အိမ်ဆောက်ပစ္စည်းရောင်းဝယ်ရေးအရောင်းဆိုင် တစ်ဆိုင်တွင် အနုကြမ်းစီး ဓါးပြတိုက်မှု တစ်ခု ဖြစ်ပွားခဲ့ပြီး ငွေကျပ် သိန်း ၂၀၀ ဝန်းကျင်ပါသွားကြောင်း သိရသည်။
ယနေ့ ည (၇) နာရီ ဝန်းကျင် က အဆိုပါ အနုကြမ်းစီး ဓါးပြတိုက်သည့်ဖြစ်စဉ်ဖြစ်ပွားခဲ့ခြင်း ဖြစ်ပြီး ဆိုင်ရှင်အ မျိုးသား (၂)ဦး ဓါးများဖြင့် တိုက်ခိုက်ခံခဲ့ရကြောင်း သိရသည်။
လူမှုကွန်ရက်တွင် ပျံ့နှံနေသည့် ဗွီဒီယိုဖိုင်တစ်ခုတွင် ဆိုင်ရှင်ဟု ယူဆရသူ အမျိုးသား (၂) ဦး ဆိုင်အတွင်း စာရင်းတွက်နေစဉ် ကျူးလွန်သူ အမျိုးသား (၃) ဦး ဝင်ရောက်လာရာ ဓားများဖြင့် ထိုးနေသည်ကို တွေ့ရသည်။
ပြစ်မှုကျူးလွန်သူ (၃) ဦးအနက် (၂) ဦးက ဆိုင်ရှင်အမျိုးသား တစ်ဦးကို ဓားများဖြင့် ချုပ်နှောင်ထိုးနှက်နေသည်ကို မြင်တွေ့ရပြီး ကျန်တစ်ဦးကို လည်း ကျူးလွန်သူတစ်ဦးက ဓားဖြင့်တိုက်ခိုက်နေသည်ကို တွေ့ရှိရသည်။
အဆိုပါ အနုကြမ်းစီး ဓါးပြတိုက်မှု ဖြစ်ပွားရာနေရာသည် ရန်ကုန်မြို့ လူစည်ကားရာ ၂၆ လမ်းနှင့် ကုန်သည်လမ်း ထောင့်တွင်ရှိပြီး အိမ်ဆောက်ပစ္စည်းရောင်းဝယ်ရေးအရောင်းဆိုင် ဖြစ်ကြောင်း ကနဦး သိရသော်လည်း ဆိုင်အမည်နှင့် ဖြစ်စဉ် အသေးစိတ်ကို ပေါ်ပြူလာနယူး(စ်) မှ ဆက်လက်စုံစမ်းလျက်ရှိသည်။
အဆိုပါ ဖြစ်စဉ်နှင့် ပတ်သက်၍ ပန်းဘဲတန်းမြို့နယ် ရဲစခန်းသို့ ဆက်သွယ်မေးမြန်းရန် ကြိုးစားခဲ့သော်လည်း ဖုန်းလက်ခံဖြေကြားမည့်သူမရှိခဲ့ပေ။
ရန်ကုန်မြို့ လူစည်ကားရာ နေရာအချို့တွင် ယခုရက်ပိုင်းအတွင် လူသတ် ဓါးပြတိုက် အနုကြမ်းစီးမှုများ မကြာခဏ ဖြစ်ပွားနေပြီး ပြီးခဲ့သည့် ရက်ပိုင်းအတွင်းကလည်း မင်္ဂလာတောင်ညွန့်မြို့နယ်အတွင်းရှိ လူစည်ကားရာ နေရာရှိ တိုက်ခန်း တစ်ခုတွင် ရူပဗေဓ ပညာရှင် စာရေးဆရာ တက္ကသိုလ် ကြယ်ပွင့်နှင့် ဇနီးဖြစ်သူတို့အား သတ်ဖြတ်ပြီးငွေနှင့် ပစ္စည်များ ယူဆောင်သွားသည့် ဖြစ်စဉ် ဖြစ်ပွားခဲ့သေးသည်။
ယနေ့ည ဖြစ်ပွားခဲ့သော အဆိုပါ အနုကြမ်းစီး ဓားပြတိုက်မှုနှင့်ပတ်သက်၍အချက်အလက်များကို ဆက်လက်ဖော်ပြပေးသွားပါမည်။
