ရန်ကုန်တိုင်းဒေသကြီးအတွင်းရှိ မြို့နယ် (၁၇)ခုရှိ လူနေရပ်ကွက်များ၊ ဈေးများရှိ ဆန်ဆိုင်ပေါင်း (၄၂) ဆိုင်မှတဆင့် ဧည့်မထအမျိုးအစား ဆန်တစ်ပြည် ၂,၅၀၀ ကျပ်နှုန်းဖြင့် ယနေ့စတင်ရောင်းချပေးနေပြီဖြစ်ကြောင်း ဆန်စပါးကုန်သည်များအသင်း၊ ဝါးတန်းဆန်စပါးကုန်စည်ဒိုင်မှ ဥက္ကဋ္ဌ ဦးနေလင်းက ပေါ်ပြူလာနယူးစ်သို့ ပြောသည်။
“ကျွန်တော်တို့ ဘယ်လောက် ပမာဏအထိ ရောင်းပေးမယ်ဆိုတာတော့ ပြောလို့မရသေးဘူး။ အခုမှစရောင်းမှာဆိုတော့။ လိုအပ်သလောက် ဝယ်ယူနိုင်ပါတယ်။ စက်တင်ဘာ လကုန်အထိ ရောင်းပေးသွားမယ်”ဟု ၎င်းကဆိုသည်။
လက်လီဈေးကွက်တွက် မြို့နယ်အလိုက် ရောင်းချပေးမည့် ဆန်ဆိုင်များမှာ လှိုင်သာယာမြို့နယ်တွင် (၇)ဆိုင်၊ ရွှေပြည်သာမြို့နယ်တွင် (၄) ဆိုင်၊ တောင်ဒဂုံမြို့နယ်တွင် (၄) ဆိုင်၊ မြောက်ဥက္ကလာပမြို့နယ်တွင် (၅)ဆိုင်၊ မြောက်ဒဂုံမြို့နယ်တွင် (၂) ဆိုင်၊ ဒဂုံဆိပ်ကမ်းမြို့နယ်တွင် (၁) ဆိုင်၊ အရှေ့ဒဂုံမြို့နယ်တွင် (၂)ဆိုင်၊ သင်္ဃန်းကျွန်းမြို့နယ်တွင် (၃) ဆိုင်၊ ပုဇွန်တောင်မြို့နယ်တွင် (၁) ဆိုင်၊ သာကေတမြို့နယ်တွင် (၁) ဆိုင်၊ ဒေါပုံမြို့နယ်တွင် (၂) ဆိုင်၊ ဒလမြို့နယ်တွင် (၃) ဆိုင်၊ ကြည့်မြင်တိုင်မြို့နယ်တွင် (၁) ဆိုင်၊ အလုံမြို့နယ်တွင် (၁) ဆိုင်၊ ဆိတ်ကြီးခ နောင်တိုမြို့နယ်တွင် (၁)ဆိုင်၊ မင်္ဂလာဒုံမြို့နယ်တွင် (၃) ဆိုင်၊ အင်းစိန်မြို့နယ်တွင် (၁) ဆိုင် စသည်ဖြင့် မြို့နယ် ၁၇ ခုရှိ ဆန်ဆိုင်ပေါင်း (၄၂) ဆိုင်မှတစ်ဆင့် ရောင်းချပေးမည်ဖြစ်ကြောင်း သိရသည်။
ပြည်တွင်း ဆန်ဈေးမြင့်တက်နေမှုကို ထိန်းချုပ်နိုင်ရန်ရည်ရွယ်ချက်ဖြင့် မြန်မာနိုင်ငံဆန်စပါးအသင်းချုပ်အနေဖြင့် သက်သာသောဈေးနှုန်းဖြင့် ဝါးတန်းကုန်စည်ဒိုင်နှင့် ဘုရင့်နောင်ကုန်စည်ဒိုင်တို့တွင်ဩဂုတ် (၇) ရက်မှစတင်ရောင်းချပေးနေပြီး အောက်တိုဘာလဆန်းပိုင်းအထိ ရောင်းချပေးသွားမည်ဖြစ်ကြောင်း သိရသည်။
