ရန်ကုန်တိုင်းအတွင်း ကိုဗစ်-၁၉ ကာကွယ်ဆေး အလုံးရေ (၇) သိန်းဝန်းကျင်ခန့်ရှိပြီး အသက် ငါးနှစ်နှင့်အထက် ကလေးငယ်များမှစ၍ ဆေးထိုးနှံပေးနေပြီး မည်သည့်အသက်အရွယ်မဆို သက်ဆိုင်ရာမြို့နယ်ကျန်းမာရေးဌာန၊ ဒေသန္တရကျန်းမာရေးဌာနများတွင် ဆေးသွားရောက်ထိုးနှံနိုင်ကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးနှင့်ကုသရေးဦးစီးဌာနမှူး ဒေါက်တာဌေးလွင်က ပြောကြားသည်။
“အခုဆိုရင် ကာကွယ်ဆေးလုံး၀မထိုးရသေးတဲ့ ကျောင်းဝင်စ အသက်ငါးနှစ်အထက် KG ကလေးတွေကို ကိုဗစ်-၁၉ ကာကွယ်ဆေးစထိုးပေးနေပါတယ်။ ဒါတွေအပြင် အသက် ၁၂ နှစ်ကနေ ၁၈ နှစ်အတွင်း လူငယ်တွေကို ထပ်ဆောင်းကာကွယ်ဆေးတွေ ထိုးပေးနေတယ်။ ကျန်တဲ့အသက်တွေကျတော့ ထပ်ဆောင်းကာကွယ်ဆေးတွေကို ခြောက်လပြည့်ရင် တစ်ခါ မည်သူမဆို သက်ဆိုင်ရာ ကိုယ့်ရဲ့ မြို့နယ်ကျန်းမာရေးဌာနတွေမှာ သွားရောက်ထိုးနှံနိုင်ပါတယ်။ ကာကွယ်ဆေးတစ်လုံးကို လူ ငါးဦးစာ ထိုးရတဲ့အတွက် လူပါးတဲ့အချိန်ထိုးမယ်ဆိုရင်တော့ လူနည်းနည်းစောင့်ရတာလေးတော့ ရှိပါတယ်” ဟု ဒေါက်တာဌေးလွင်က ပြောကြားသည်။
မျိုးရိုးဗီဇပြောင်း ကိုဗစ်-၁၉ရောဂါပိုး အိုမီခရွန်နှင့် ၎င်း၏မျိုးစိတ်အသစ်များကို ကာကွယ်ရန် ခြောက်လတစ်ကြိမ် ကိုဗစ်-၁၉ ရောဂါ ထပ်ဆောင်းကာကွယ်ဆေးများ ထိုးနှံရန်လိုအပ်ကြောင်းနှင့် အထူးသဖြင့် ကလေးငယ်များ၊ နာတာရှည်ရောဂါခံစားနေရသူများနှင့် သက်ကြီးရွယ်အိုများမှာ ထပ်ဆောင်းကာကွယ်ဆေးကို စဉ်ဆက်မပြတ်ထိုးနှံရန် လိုအပ်ကြောင်း သိရသည်။
“ ရန်ကုန်တိုင်း တစ်တိုင်းထဲမှာကို ဆေးအလုံးရေ (၇) သိန်းလောက်ရှိပါတယ်။ လက်ရှိလည်း မြို့နယ်ကျန်းမာရေးဌာနတွေမှာ ဆေးတွေထိုးပေးနေပါတယ်။ ရန်ကုန်တိုင်းမှမဟုတ်ဘူး တစ်နိုင်ငံလုံးမှာလည်း ကိုဗစ်-၁၉ ရောဂါကာကွယ်ဆေးတွေကို အလျှံအပယ်ကို ထိုးပေးနေပါတယ်” ဟု ဒေါက်တာဌေးလွင်က ဆက်လက်ပြောကြားသည်။
မိုးတွင်းကာလဖြစ်တာနှင့်အညီ လတ်တလော တုပ်ကွေးရောဂါအမျိုးမျိုး ဖြစ်ပွားမှုများရှိနေခြင်းကြောင့် ကျန်းမာရေးဝန်ကြီးဌာနက ကာကွယ်ဆေးထိုးနှံရန် တိုက်တွန်းနှိုးဆော်ထားကြောင်းနှင့် ဆေးထိုးနှံခြင်းဖြင့် ရောဂါကူးစက်မှုနှင့် ပြင်းထန်မှုတို့ကို လျော့နည်းစေနိုင်ခြင်း ( အထူးသဖြင့် နာတာရှည်ရောဂါခံစားနေရသူများနှင့် သက်ကြီးရွယ်အိုများ)၊ ရောဂါ၏ နောက်ဆက်တွဲ ပြဿနာဖြစ်သည့် ကိုယ်တွင်းအင်္ဂါများ ထိခိုက်ပျက်စီးမှုမှ အသက်အန္တရာယ်ဆုံးရှုံးမှုဖြစ်သည်အထိ ဖြစ်ပေါ်ခြင်းမှ လျှော့ချနိုင်ခြင်းတို့ကြောင့် အသက် ငါးနှစ်နှင့်အထက်ရှိသော ပြည်သူများအားလုံး ကျန်းမာရေးဌာနနှင့်ဆက်သွယ်၍ ကိုဗစ်-၁၉ ရောဂါကာကွယ်ဆေး ( ပထမအကြိမ်၊ ဒုတိယအကြိမ်နှင့် ထပ်ဆောင်းကာကွယ်ဆေး) များကို မဖြစ်မနေ သွားရောက်ထိုးနှံကြရန် တိုက်တွန်းနှိုးဆော်ထားသည်။
Photo Credit – MOH
