ရန်ကုန်တိုင်းအတွင်း၌ စားသုံးဆီပြတ်လပ်မှုမရှိဟု မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌဦးဆန်းလင်းမှ ယနေ့ နိုဝင်ဘာ ၁၃ ရက်နံနက်ပိုင်းက မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) တွင်ကျင်းပသည့် ရန်ကုန်တိုင်းအတွင်းရှိ စားအုန်းဆီ ဖြန့်ဖြူးရောင်းချရေး ကိုယ်စားလှယ်များနှင့် တွေ့ဆုံရှင်းလင်းပွဲ၌ ပြောကြားခဲ့သည်။
စားအုန်းဆီများကို ပြည်သူများထံဖြန့်ဖြူးပေးနိုင်ရေးအတွက် လစဥ်တန်ချိန် (၃၄,၀၀၀) ကျော် တင်သွင်းလျက်ရှိပြီး ယင်းအနက် ရန်ကုန်တိုင်းအား တန်ချိန် (၁၄,၈၅၀) တန်ကို ဖြန့်ဖြူးပေးထားသဖြင့် ရန်ကုန်တိုင်းအတွင်းရှိ လူဦးရေအရ လုံလောက်အောင်ဖြန့်ဖြူးပေးထားသည်ဟု ပြောသည်။
” စားအုန်းဆီကို လစဥ်ပုံမှန်တင်သွင်းနေပါတယ်။ စားအုန်းဆီတင်သင်္ဘောတွေ လစဥ်ရောက်ရှိအောင်လည်း စနစ်တကျနဲ့ စီစဥ်ဆောက်ရွက်ထားပါတယ်။ ဒါ့ကြောင့် ရန်ကုန်တိုင်းအတွင်းကို ပုံမှန်ဖြန့်ဖြူးပေးနေသလို လောက်ငအောင်လည်း စီစဥ်ထားပါတယ်”ဟု မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌဦးဆန်းလင်းက ပြောသည်။
ရန်ကုန်တိုင်းအတွင်း၌ စားအုန်းဆီရောင်းချရာတွင် ဆီဝယ်စာအုပ်ဖြင့်ရောင်းချပေးသည့်နည်းတူ Door to Door စနစ်ဖြင့်လည်းရောင်းချပေးကာ ပင်စင်စားများကိုလည်း ဘဏ်များတွင်ရောင်းချပေးလျက်ရှိသည်ဟု ပြောသည်။
ထို့ပြင် ရန်ကုန်တိုင်းအစိုးရအဖွဲ့ စီးပွားရေးရာဝန်ကြီးမှလည်း ရန်ကုန်တိုင်းအတွင်း စားအုန်းဆီခွဲတမ်းအဖြစ် တစ်လလျင်တန်ချိန် (၁၄,၈၅၀) တန်ခွဲတမ်းရရှိပြီး တိုင်းအတွင်းရှိ မြို့နယ် (၄၄) မြို့နယ်အတွက် လူဦးရေကိုအခြေခံကာ ၁ ရက်လိုအပ်ချက်ကိုတွက်ချက်ပြီး ပြည်သူများထံ ဖြန့်ဖြူးရောင်းချပေးလျက်ရှိသည်ဟု ပြောသည်။
ထိုသို့ ဖြန့်ဖြူးရောင်းချရာ၌ ခွဲတမ်းရရှိသည့် စားအုန်းဆီများအနက်မှ (၈၅၀) တန်ကို တိုင်းအတွင်းရှိ ဌာနဆိုင်ရာများ၊ နိုင်ငံ့ဝန်ထမ်းပင်စင်စားများ၊ စက်မှုဇုန်ဝန်ထမ်းများကို စားအုန်းဆီအိမ်တိုင်ရာရောက် ဖြန့်ဖြူးရောင်းချပေးရေးစနစ်ဖြင့် လစဥ်ရောင်းချပေးလျက်ရှိသည်ဟု ပြောသည်။
ထို့ကြောင့် စားအုန်းဆီအား အရေးကြီးကုန်စည်အဖြစ်သတ်မှတ်ထားသဖြင့် စျေးနှုန်းမြှင့်တင်ရောင်းချခြင်း၊ စျေးကစားရန်ရည်ရွည်ချက်ဖြင့် သိုလှောင်ခြင်း၊ မသမာသောလုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူသွားမည်ဟုလည်း ပြောကြားခဲ့သည်။