ရန်ကုန်တိုင်းဒေသကြီးလွှတ်တော် ဒုတိယနေ့တွင် ဒေသဖွံ့ဖြိုးရေးဆိုင်ရာ ကြယ်ပွင့်ပြမေးခွန်းများ မေးမြန်း

တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး ဒုတိယနေ့အစည်းအဝေးကို ယနေ့ ဇွန် ၁၂ ရက် (သောကြာနေ့)တွင် ကျင်းပပြုလုပ်ခဲ့ပြီး ဒေသဖွံ့ဖြိုးရေးနှင့် ပြည်သူ့လိုအပ်ချက်ဆိုင်ရာ ကြယ်ပွင့်ပြမေးခွန်းများကို လွှတ်တော်ကိုယ်စားလှယ်များက မေးမြန်းဆွေးနွေးခဲ့ကြောင်း သိရသည်။

အစည်းအဝေးတွင် တိုင်းဒေသကြီးလွှတ်တော်ဥက္ကဋ္ဌက နေရာယူကာ လွှတ်တော်အစည်းအဝေး အထမြောက်ကြောင်းနှင့် စတင်ကျင်းပကြောင်း ကြေညာခဲ့ပြီး ဒုတိယနေ့ အစီအစဉ်များကို ဆက်လက်ကြေညာခဲ့သည်။

ထို့နောက် အစည်းအဝေး မတက်ရောက်နိုင်သည့် လွှတ်တော်ကိုယ်စားလှယ်များ၏ ခွင့်ပန်ကြားချက်များကို တင်ပြခဲ့ကာ လွှတ်တော်၏ အတည်ပြုချက် ရယူပြီး ကိုယ်စားလှယ်များ၏ တက်ရောက်မှု အခြေအနေကို အတည်ပြုခဲ့သည်။

အစည်းအဝေးတွင် ဗဟန်းမြို့နယ်၊ ဒဂုံမြို့သစ်(မြောက်ပိုင်း)မြို့နယ်၊ ရွှေပြည်သာမြို့နယ်၊ တိုက်ကြီးမြို့နယ်နှင့် ကျောက်တန်းမြို့နယ်တို့မှ လွှတ်တော်ကိုယ်စားလှယ်များက မြို့နယ်စုပေါင်းရုံး တည်ဆောက်ရေး၊ မူလတန်းကြိုကျောင်းများအတွက် ကလေးအာဟာရထောက်ပံ့ငွေ တိုးမြှင့်ရေး၊ ထရမ်စဖော်မာ တပ်ဆင်ရေး၊ ကျေးရွာချင်းဆက်လမ်းများ အဆင့်မြှင့်တင်ရေး၊ ချောင်းများ ပြန်လည်တူးဖော်ရေး စသည့် ဒေသလိုအပ်ချက်ဆိုင်ရာ မေးခွန်းများကို မေးမြန်းခဲ့ကြပြီး သက်ဆိုင်ရာ တိုင်းဒေသကြီးအဆင့် အဖွဲ့အစည်းဝင်များက ပြန်လည်ဖြေကြားခဲ့ကြသည်။

ထို့ပြင် ရန်ကုန်တိုင်းဒေသကြီးလွှတ်တော်တွင် ဖွဲ့စည်းထားသော ကော်မတီ(၂)ခုတွင် ကော်မတီဝင်အသစ်များ ထည့်သွင်းတာဝန်ပေးအပ်ခြင်းနှင့်စပ်လျဉ်း၍ လွှတ်တော်၏ အတည်ပြုချက် ရယူခဲ့သည်။

ယင်းအပြင် “ရန်ကုန်တိုင်းဒေသကြီး ဂုဏ်ထူးဆောင်လက်မှတ်နှင့် ဂုဏ်ထူးဆောင်ဆုပစ္စည်းများ ချီးမြှင့်ခြင်းဆိုင်ရာ ဥပဒေကြမ်း” နှင့်ပတ်သက်၍ ဥပဒေကြမ်းကော်မတီက အစီရင်ခံစာကို လွှတ်တော်သို့ ဖတ်ကြားတင်ပြခဲ့ပြီး အဆိုပါ ဥပဒေကြမ်းအား ဆွေးနွေးလိုသည့် လွှတ်တော်ကိုယ်စားလှယ်များအနေဖြင့် အမည်စာရင်း တင်သွင်းနိုင်ကြောင်း ကြေညာခဲ့သည်။

ထို့နောက် တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး ဒုတိယနေ့အစည်းအဝေးကို ရပ်နားခဲ့ပြီး တတိယနေ့အစည်းအဝေး ကျင်းပမည့် နေ့ရက်နှင့် အချိန်ကို ထုတ်ပြန်ကြေညာခဲ့ကြောင်း သိရသည်။