မြန်မာ့မီးရထားမှ ခရီးသွားများရထားလက်မှတ်ဝယ်ယူရာတွင် ပိုမိုအဆင်ပြေလွယ်ကူစွာဝယ်ယူနိုင်ရေးအတွက်အွန်လိုင်း မှရောင်းချခြင်းနှင့် ငွေပေးချေခြင်း (ORTP)စနစ်အကောင်အထည်ဖော်နိုင်ရန်ပြင်ဆင်မှုများဆောင်ရွက်နေပြီဖြစ်ရာ ရန်ကုန်-မန္တလေး ရထားလမ်းပိုင်းအတွင်းပြေးဆွဲပေးနေသော လူစီးရထားများအတွက် ရှေ့ပြေးစမ်းသပ်အစီအစဉ်အဖြစ်ဆောင်ရွက်ပေးသွားမည်ဖြစ်ကြောင်း သိရသည်။
ထို့ပြင် ရန်ကုန်-နေပြည်တော်-မန္တလေးလမ်းပိုင်းအတွင်းပြေးဆွဲလျက်ရှိသော အမှတ်(၇)အဆန်/(၈)အစုန်၊ အမှတ်(၃၁)အဆန်/(၃၂)အစုန် DEMU ရထားများနှင့် အမှတ်(၂၇)အဆန်/(၂၈)အစုန် RBE ရထားများဖြင့် စီး နင်းလိုက်ပါမည့်သူများအနေဖြင့် မိမိတို့စီးနင်းလိုက်ပါလိုသည့်ခရီးစဉ်များအလိုက် သတ်မှတ်ဘူတာများရှိ ဖုန်းနံပတ်များသို့ဆက်သွယ်၍ ခရီးသွားမည့်ရက်မတိုင်မီ (၅)ရက်အလိုမှစ၍မှတ်ပုံတင်ခြင်းနိုင်ကြောင်း သိရသည်။
ထိုသို့ မှတ်ပုံတင်ချိန်တွင် မြန်မာ့မီးရထားမှတာဝန်ရှိသူက ခရီးသွားမည့်သူ၏ ခရီးစဉ်အတိုင်းထိုင်ခုံနေရာ လစ်လပ်ပါက ခရီးသွားမည့်သူထံ ဗိုင်ဗာ မှတစ်ဆင့် လက်မှတ်ကျသင့်ငွေပမာဏကို မည်သည့် Online Payment နှင့်မဆို MMQR Code ဖြင့် ကျသင့်ငွေပေးချေနိုင်ကြောင်း သိရသည်။
ငွေပေးချေပြီးချိန်တွင် ငွေပေးသွင်းပြီးကြောင်း အထောက်အထားကို Screenshot ပြုလုပ်၍ ဖုန်းလက်ခံသည့် မီးရထားဝန်ထမ်း၏ Viber သို့ပြန်လည်ပေးပို့ရမည်ဖြစ်ကာ မီးရထားဝန်ထမ်းကငွေပေးသွင်းပြီးကြောင်းအထောက်အထားရပါက ခရီးသွားမည့်သူထံသို့ စီးနင်းလိုက်ပါရမည့် ခရီးစဉ်အတိုင်း တွဲ/ထိုင်ခုံ နံပါတ်တို့အားပြန်လည်ပေးပို့သွားမည်ဖြစ်ကြောင်း သိရသည်။
ထို့ကြောင့် ခရီးသွားမည့်သူမှ ရထားစီးမည့်ဘူတာသို့ ရထားမထွက်မီ (၁)နာရီအလို ကြိုတင်ရောက်ရှိပြီး ဘူတာလက်မှတ်ရုံ၌ ငွေပေးသွင်းပြီးကြောင်းအထောက် အထားပြသကာ ရထားလက်မှတ်ထုတ်ယူရမည်ဖြစ်ကြောင်း သိရသည်။
ထို့ပြင် ခရီးသွားများအနေဖြင့် လက်မှတ်ဝယ်ယူချိန်တွင် လက်မှတ်ခအပိုကြေးပေးရခြင်း၊ လက်မှတ်မှောင် ခိုဝယ်ယူရခြင်းများကြုံတွေ့ပါက မြန်မာ့မီးရထားမှသတ်မှတ်ထားသော ဖုန်းနံပတ်များကိုဆက်သွယ်တိုင် ကြားနိုင်ကြောင်း သိရသည်။