ရက်ပိုင်းအတွင်း စက်သုံးဆီစျေးနှုန်း ၂၁၀၀ ကျော်ပြန်ဖြစ်လာ

ရက်ပိုင်းအတွင်း စက်သုံးဆီစျေးနှုန်း ၂၁၀၀ ကျော်ပြန်ဖြစ်လာ

ပြီးခဲ့သည့်ရက်ပိုင်းအထိ အကျဘက်သို့ ဦးတည် ခဲ့သည့် ပြည်တွင်း စက်သုံးဆီ ဈေးနှုန်းသည် ယနေ့ ဩဂုတ်လ (၁၁) ရက်တွင် ၂၁၄၀ ကျပ်အထိ မြင့်တက်သွားကြောင်း သိရသည်။

အဆိုပါ ဈေးနှုန်းမှာ နစက လက်အောက်ရှိ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ ရည်ညွှန်း ဈေးနှုန်းဖြစ်ပြီး ရက်ပိုင်းအတွင်း ၅၀၀ ကျော် အထိ မြင့်တက်လာခြင်း ဖြစ်သည်။

ဩဂုတ်လ အစပိုင်းတွင် (၁) လီတာလျင် (၁၆၀၀) ကျပ်ဝန်းကျင်သာ ပေါက်သည့် စက်သုံးဆီ ဈေးနှုန်းမှာ ယနေ့ ဩဂုတ်လ (၁၁) ရက်တွင် ၂၁၄၀ ကျပ်အထိ တရှိန်ထိုး မြင့်တက်လာခြင်း ဖြစ်သည်။

“ဆီစျေးတွေကအဲ့လောက်ထိထိုးတက်သွားတော့ ကျွန်တော်တိုအတွက် အဆင်မပြေဘူး။ အုံနာခပေးရတယ်။ ဆီဖိုးပေးရတယ်၊ နောက်ပြီး လက်ရှိဖြစ်နေတဲ့အခြေအနေက ကားငှားတဲ့လူကလည်း ကားသမားကိုမယုံ ကားသမားကလည်းခရီးသည်ကို မယုံရတဲ့အခြေအနေဖြစ်နေတော့ ဌားစီးတဲ့လူနည်းသွားတယ်။ တစ်ခါတစ်လေဆိုရင် ကိုယ့်အတွက် ပိုက်ဆံမကျန်တဲ့ရက်တွေတောင်ရှိတယ်”ဟု Taxi မောင်းသည့် ကိုဇော်မင်းဦးကပြောသည်။

စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်း ကြီး ကြပ်ရေးကော်မတီ၏ ရည်ညွှန်း ဈေးနှုန်းများအရ ရန်ကုန်၊ မန္တလေး အပါအဝင် နေပြည်တော်၊ ပဲခူး၊ မကွေး၊ထားဝယ်၊ မုံရွာ၊ ပုသိမ်၊ ဘားအံ၊ မော်လမြိုင်၊ မြစ်ကြီးနား၊ စစ်တွေ၊ လားရှိး၊ တောင်ကြီး၊ လွိင်ကော်၊ ဟားခါးနှင့်ကျိုင်းတုံတွင်လည်း 92 Ron တစ်လီတာလျင် ၂၁၀၀ ကျပ်ကျော်ရှိကြောင်း သိရသည်။

စက်သုံးဆီတင်သွင်းသိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ ထုတ်ပြန်ခဲ့သည့် စက်သုံးဆီရည်ညွှန်းစျေးနှုန်းများအရ ရန် ကုန်တိုင်းအတွင်း၌ လက်လီစျေးအဖြစ် 92 Ron တစ်လီတာလျင် ၂၁၄၀ ကျပ်၊ 95 Ron တစ်လီတာလျင် ၂၂၁၀ ကျပ်၊ HSD (500 ppm) တစ်လီတာလျင် ၂၄၄၀ ကျပ် သတ်မှတ်ခဲ့သည်။

အလားတူ HSD (50 ppm)နှင့် HSD (10 ppm)တိုမှာ တစ်လီတာလျင် ၂၅၁၅ ကျပ်အဖြစ် စက်သုံးဆီရည်ညွှန်းလက်လီစျေးနှုန်းများအဖြစ် သတ် မှတ်ခဲ့သည်။

ထိုပြင် စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီ၏ စက်သုံးဆီရည်ညွန်းလက်ကားစျေးနှုန်းမှာလည်း ရန်ကုန်တိုင်း ၌ 92 Ron တစ်လီတာလျင် ၂၀၃၈ ကျပ်၊ 95 Ron တစ်လီတာလျင် ၂၁၀၈ ကျပ်၊ HSD(500 ppm) တစ်လီတာလျင် ၂၃၃၁ ကျပ်၊ HSD (50 ppm)နှင့် HSD(10 ppm)တိုမှာ တစ်လီတာလျင် ၂၄၄၀ ကျပ်တိုဖြစ်သည်။

” ဒေါ်လာဈေးအပြောင်းအလဲ‌‌ကြောင့်လို့ထင်ပါတယ်၊ ဆီကနိုင်ငံခြားကတင်သွင်းနေတာဆိုတော့ ဒေါ်လာဈေးတက်တော့ ဆီဈေးပါတက်တဲ့သဘောပေါ့၊ အကုန်လုံးကဆက်စပ်နေတယ်၊ ဆီဈေးဆက်တက်မယ့်အနေအထားရှိမရှိကတော့ စောင့်ကြည့်ရမယ်ထင်ပါတယ် ” ဟု စီးပွားရေး ကျွမ်းကျင်သူ တစ်ဦးက သုံးသပ်ပြသည်။

လက်ရှိတွင် စက်သုံးဆီ စျေးနှုန်းများအား စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ MOPS စျေးနှုန်းအပေါ်တွင် အခြေခံတွက်ချက်ထားခြင်းဖြစ်ကာ စက်သုံးဆီဝယ်ယူသူများအနေဖြင့် ကျေနပ်မှုမရှိပါက ကော်မတီသိုဆက်သွယ်တိုင်ကြားနိုင်ကြောင်း သိရသည်။