ယူကရိန်းစစ်ပွဲနောက်ပိုင်း ရှီနှင့် ပူတင်ပထမဆုံးအကြိမ်တွေ့ဆုံမည်
ပေကျင်းနှင့် မော်စကိုတို့သည် အနောက်အုပ်စု ဦးဆောင်သော ပြစ်တင်ဝေဖန်မှုများနှင့် ပိတ်ဆို့အရေးယူမှုများကို ရင်ဆိုင်နေရသောကြောင့် နှစ်နိုင်ငံ စီးပွားရေးဆိုင်ရာ ပူးပေါင်းဆောင်ရွက်မှုများကိုတိုး မြှင့်နေစဉ် တရုတ်သမ္မတ ရှီကျင့်ဖျင်နှင့် ရုရှားသမ္မတပူတင်တို့သည် လာမည့်အပတ်တွင် ဥဇဘက်ကစ္စတန်၌ တွေ့ဆုံရန် စီစဉ်ထားကြောင်း သိရသည်။
စက်တင်ဘာ ၁၅ ရက်မှ ၁၆ ရက်နေ့အထိ ကျင်းပမည့် ရှန်ဟိုင်း ပူးပေါင်းဆောင်ရွက်ရေးအဖွဲ့ (အကစ်စီအို) ထိပ်သီးအစည်းအဝေး၏ ပြင်ပတွင် ခေါင်းဆောင်နှစ်ဦး သီးသန့်တွေ့ဆုံရန် စီစဉ်ထားသည်ဟု တရုတ်နိုင်ငံဆိုင်ရာ ရုရှားသံအမတ်ကြီး အင်န်ဒရေးဒန်နီဆော့ဗ်က သတင်းထောက်များကို ဗုဒ္ဓဟူးနေ့တွင် ပြောကြားခဲ့ကြောင်း ရုရှားနိုင်ငံပိုင် သတင်းအေဂျင်စီ တာ့စ် ကဖော်ပြထားသည်။
အဆိုပါတွေ့ဆုံမှုသည် ကန့်သတ်ချက်များမရှိသော မိတ်ဖက်ချစ်ကြည်ရေး နိုင်ငံများအဖြစ် ကြေညာထားသည့် တရုတ်နှင့် ရုရှားအကြား နွေးထွေးနေသော ဆက်ဆံရေးကို ပြသမည့် နှစ်နိုင်ငံ ခေါင်းဆောင်များ၏တွေ့ဆုံမှုဖြစ်လာမည် ဖြစ်သည်။
အင်္ဂါနေ့က ရုရှားအစိုးရပိုင် စွမ်းအင်ကုမ္ပဏီကြီး Gazprom က တရုတ်နှင့် သဘောတူညီချက်တစ်ရပ်ကို လက်မှတ်ရေးထိုးခဲ့ပြီး ဓာတ်ငွေ့အတွက် ပေးချေမှုများကို အမေရိကန် ဒေါ်လာအစား ယွမ်နှင့် ရူဘယ််လ်ဖြင့် ပေးချေရန် သဘောတူညီခဲ့ကြောင်း သိရသည်။
ယင်းကဲ့သို့ ပြုလုပ်ရခြင်းမှာ မော်စကိုသည် ယူကရိန်း အရေးအခင်းနှင့် ပတ်သက်၍ မြောက်များစွာသော ပိတ်ဆို့အရေးယူမှုဒဏ်ကို အကြိမ်ကြိမ်ခံရပြီးနောက် အမေရိကန်ဘဏ္ဍာရေးစနစ်အပေါ် ၎င်း၏ မှီခိုအားထားနေမှုကို လျှော့ချရန် ကြိုးစားလာခြင်း၏ တစ်စိတ်တစ်ပိုင်းဖြစ်သည်။
ရှီနှင့်ပူတင်၏ ဆွေးနွေးပွဲသည် ရုရှား-ယူကရိန်း အရေးအခင်း စတင်ချိန်မှစ၍ ၎င်းတို့နှစ်ဦး ပထမဆုံးအကြိမ် မျက်နှာချင်းဆိုင် တွေ့ဆုံကြမည့်ပွဲ ဖြစ်လာမည်ဖြစ်သည်။
ထို့အပြင် ရှီသည် လာမည့်အပတ်တွင် ကာဇက်စတန်နိုင်ငံသို့ သွားရောက်မည်ဖြစ်ပြီး ကိုဗစ်-၁၉ ကပ်ရောဂါ စတင်ပြီးနောက် ပြည်ပသို့ သွားရောက်မည့် ၎င်း၏ ပထမဆုံးခရီးစဉ် ဖြစ်လာမည် ဖြစ်သည်။
အောက်တိုဘာလလယ်တွင်ကျင်းပမည့် တရုတ်ပြည်၏ အာဏာရ ပါတီဖြစ်သော ကွန်မြူနစ်ပါတီ၏ ကွန်ဂရက်ညီလာခံ မတိုင်မီ အဆိုပါ ဆွေးနွေးပွဲ ပေါ်ပေါက်လာခြင်း ဖြစ်သည်။ အထက်ပါ ညီလာခံ၌ ရှီသည် မည်သူမျှ မရရှိဖူးခဲ့သော တတိယအကြိမ်မြောက် သမ္မတသက်တမ်းကို ဆက်လက်ရယူနိုင်ရန် မျှော်လင့်ထားကြောင်း သိရသည်။
Source:Aljazeera