၂၀၂၂-၂၀၂၃ ကြံရာသီတွင် ကြံတစ်တန်လျှင် (၉၀၀၀၀) ကျပ်ဈေးဝယ်ယူခဲ့ရာမှ ယခုကြံတစ်တန်လျှင် (၉၅၀၀၀) ကျပ်ဈေးဖြင့် ဝယ်ယူမည်ဖြစ်ကြောင်း ငွေရည်ပုလဲသကြားကုမ္ပဏီမှ အသိပေးကြေညာထားသည်။
အဆိုပါ တိုးမြှင့်ငွေ (၅၀၀၀) ကျပ်ကို ကြံရာသီပြီးမှသာထုတ်ပေးမည်ဖြစ်ကြောင်းသိရသည်။ လက်ရှိတွင်လည်း မြန်မာနိုင်ငံကထွက်ရှိသည့်သကြားတွေကို ပြည်ပနိုင်ငံအချို့က ဝယ်ယူရန်ကမ်းလှမ်းမှုတွေရှိနေကြောင်းလည်းသိရသည်။
လက်ရှိတွင် ဗီယက်နမ်နိုင်ငံ တစ်ခုတည်းကိုသာ မြန်မာ့သကြား တန်ချိန် (၄) သောင်းခွဲ တင်ပို့ရောင်းချရန် စာချုပ်ချုပ်ဆိုထားပြီး တန်ချိန် (၅၀၀၀) ခန့်သာ တင်ပို့ရသေးကြောင်း၊ ပြည်တွင်း၌ သကြားစားသုံးမှုမြင့်တက်လာသည့်အပြင် ပြည်ပကနေလည်း တင်သွင်းမှုလျော့နည်းလာခြင်းကြောင့် ယခုနှစ်တွင် ပြည်ပသို့ သကြားတင်ပို့မှု လျော့နည်းသွားခြင်းဖြစ်ကြောင်း သိရသည်။
၂၀၂၂-၂၀၂၃ ကြံရာသီတွင် ရှမ်းပြည်နယ်မြောက်ပိုင်းနှင့် စစ်ကိုင်းတိုင်း ကသာမြို့တွင် တန် ၁၂၀၀၀ နှင့် တန် ၅၀၀၀ သကြားစက်များ လည်ပတ်နေတာကြောင့် လာမည့်နှစ်တွေကစပြီး ပြည်တွင်းသကြားထုတ်လုပ်မှု မြင့်တက်လာနိုင်ကြောင်း မြန်မာနိုင်ငံသကြားနှင့် ကြံထွက်ပစ္စည်းလုပ်ငန်းရှင်များအသင်းက ခန့်မှန်းထားသည်။
မြန်မာနိုင်ငံတွင် နှစ်စဉ် သကြားထုတ်လုပ်မှု တန်ချိန် ၄ သိန်းခွဲခန့်ရှိပြီး အစောပိုင်းကာလများတွင် နယ်စပ်ဖြတ်ကျော် လမ်းကြောင်းတွေကနေတစ်ဆင့် တရုတ်နိုင်ငံကို တင်ပို့ရောင်းချခဲ့သော်လည်း လက်ရှိတွင် ဗီယက်နမ်နိုင်ငံတစ်ခုတည်းကိုသာ ပင်လယ်ရေကြောင်းကနေ တင်ပို့ရောင်းချနေပြီး တရုတ်ကိုတော့ ကြံအချောင်းလိုက်တင်ပို့နေခြင်းဖြစ်ကြောင်း သိရသည်။
