မိုင်းဖုန်းဆရာတော်ကြီးသည် မိုင်းလားအထူးဒေသ(၄)ရှိ မိုင်းခန်ဖဝတ်ဂူ၌ ဇူလိုင် ၃ ရက်မှစတင်ကာ ဝါတွင်းဂူအောင်းအဓိဌာန်ဝင်တော်မူနေရာမှ မှိုဆွမ်းဟင်းဘုဥ်းပေးပြီးနောက် မူးဝေအော့အန်ခဲ့သဖြင့် အဓိဌာန်ရွှေ့ဆိုင်းခဲ့ရသည်။
မိုင်းဖုန်းဆရာတော်ကြီးသည် အဓိဌာန်ဝင်တော်မမူမီနံနက်ပိုင်း၌ မှိုဆွမ်းဟင်းဘုဥ်းပေးပြီးနောက် တပည့်ဒါယိကာ၊ဒါယိကာမများအား တရားဟောကြားတော်မူပြီး ညပိုင်းတွင် ဂူအောင်းအဓိဌာန်ဝင်တော်မူသွားခဲ့သော်လည်း မူးဝေအော့အန်သည့် ဝေဒနာခံစားခဲ့ရသည်။
ထိုသို့ ဂူအောင်းအဓိဌာန်ဝင်တော်မူနေပြီးနောက် ၆ ရက်တိုင် မေတ္တာပို့ခြင်းနှင့်တရားရှုမှတ်ခြင်းများပြုလုပ်ကာ မှိုဆိပ်တက်သည့်ဝေဒနာအား သည်းခံခဲ့သော်လည်း မသက်သာသဖြင့် ဇူလိုင် ၇ ရက်ညတွင် အစောင့်များသိရှိစေရန် အချက်ပေး မောင်းတီးခဲ့၍ အစောင့်များမှဂူတွင်းသို့ဝင်ရောက်ကြည့်ရှုခဲ့ကြသည်။
ထို့နောက် မှိုဆိပ်တက်၍ မူးဝေအော့အန်နေသည့် မိုင်းဖုန်းဆရာတော်ကြီးအား မိုင်းလားဒေသ၏ သာသနာရေးဆိုင်ရာအကြီးအကဲ ဦးစိုင်းဆမ်တစ်မှ ကျန်းမာရေးကုသမှုခံယူရန်တောင်းပန်လျှောက်ထားပြီးနောက် ဆရာတော်ကြီးအား တပ်မတော်သားများမှထမ်းကာ တောင်အောက်သို့ပင့်ဆောင်တော်မူခဲ့ကြသည်။
ထိုသို့ ပင့်ဆောင်တော်မူပြီး ဇူလိုင် ၈ ရက်နေ့လည် ၁ နာရီတွင် မိုင်းဖုန်းဆရာတော်ကြီးအား တာချီလိတ်-မယ်ဆိုင်ချစ်ကြည်ရေးတံတားမှဖြတ်၍ ထိုင်းနိုင်ငံ၊ချိုင်းရိုင်းရှိ Bangkok Hospital သို့ အချိန်မီပို့ဆောင်ပြသခဲ့ကြသဖြင့် ဇူလိုင် ၉ ရက်တွင် မိုင်းဖုန်းဆရာတော်ကြီး၏ ကျန်းမာရေးအခြေအနေမှာ ပြန်လည်ကောင်းမွန်လာခဲ့၍ ဆေးရုံမှဆင်းကာ ဇူလိုင် ၁၀ ရက်နေ့လည် ၁ နာရီ၌ တာချီလိတ်- မယ်ဆိုင် ချစ်ကြည်ရေးတံတား အမှတ်(၂)မှတဆင့် မိုင်းဖုန်းသို့ပြန်လည်ကြွရောက်တော်မူခဲ့ကြောင်း သိရသည်။
လက်ရှိအချိန်၌ မိုင်းဖုန်းဆရာတော်ကြီးသည် အနားယူတော်မူနေကာ ဝါတွင်းဂူအောင်းအဓိဌာန်အား ပြန်လည်ဝင်ရောက်တော်မူမည်ဖြစ်ကြောင်း သိရသည်။