မြောက်ကိုရီးယားဟာ ၎င်းတို့ရဲ့ ဒုတိယမြောက် စစ်ဘက်သူလျှိုဂြိုဟ်တုကို အကာသအတွင်း ပစ်လွှတ်ဖို့ ပြင်ဆင်နေပုံရတယ်လို့ တောင်ကိုရီးယားစစ်တပ်က သောကြာနေ့မှာ ပြောဆိုပါတယ်။ မြောက်ကိုရီးယားရဲ့ လက်နက်စမ်းသပ်မှုတွေ အဆက်အပြတ်လုပ်ဆောင်နေမှုကြောင့် ရန်လိုမှုတွေမြင့်မားနေခဲ့တာလည်း ဖြစ်ပါတယ်။
မြောက်ကိုရီးယားက အမေရိကန်ဦးဆောင်တဲ့ စစ်ရေးခြိမ်းခြောက်မှုတွေကို ကိုင်တွယ်ဖြေရှင်းဖို့ဆိုကာ အကာသအခြေပြု ထောက်လှမ်းရေးကွန်ရက်တစ်ခု တည်ဆောက်ရေးကြိုးပမ်းချက်တွေရဲ့ တစ်စိတ်တစ်ပိုင်းအဖြစ် ၎င်းတို့ရဲ့ ပထမဆုံး စစ်ဘက်ထောက်လှမ်းရေးဂြိုဟ်တုတစ်စင်းကို ပြီးခဲ့တဲ့ နိုဝင်ဘာလမှာ ကမ္ဘာပတ်လမ်းအတွင်း လွှတ်တင်ထားခဲ့ပြီးဖြစ်ပါတယ်။
ယင်းသို့ လွှတ်တင်ခဲ့ပြီးနောက် မြောက်ကိုရီးယားခေါင်းဆောင် ကင်ဂျုံအန်က သူ့နိုင်ငံအနေနဲ့ ၂၀၂၄ ခုနှစ်အတွင်း နောက်ထပ် စစ်ဘက်ဂြိုဟ်တုသုံးလုံး လွှတ်တင်သွားဦးမှာဖြစ်တယ်လို့ အာဏာရပါတီအဓိက အစည်းအဝေးတစ်ခုမှာ ပြောဆိုခဲ့ပါတယ်။
မြောက်ကိုရီးယားဟာ နိုင်ငံအနောက်မြောက်ပိုင်းရှိ ၎င်းရဲ့ Tongchangri အဓိက လွှတ်တင်ရေးအဆောက်အအုံမှာ သူလျှိုဂြိုဟ်တု လွှတ်တင်ရေးအတွက်လို့ ယုံကြည်ရတဲ့ လှုပ်ရှားမှု အရိပ်အယောင်တွေ တွေ့ရှိထားတယ်လို့ တောင်ကိုရီးယားစစ်တပ်က သောကြာနေ့မှာ ဒေသတွင်း သတင်းထောက်တွေကို ပြောဆိုခဲ့ပါတယ်။
မြောက်ကိုရီးယားရဲ့ ယင်းလုပ်ဆောင်ချက်တွေအပေါ် တောင်ကိုရီးယားနဲ့ အမေရိကန်ထောက်လှမ်းရေးအာဏာပိုင်တွေက အနီးကပ်စောင့်ကြည့်နေတယ်လို့လည်း ပြောဆိုခဲ့ပါတယ်။
Tongchangri နယ်မြေမှာ မြောက်ကိုရီးယားက ဘယ်လိုလှုပ်ရှားမှုတွေ လုပ်ဆောင်နေလဲဆိုတာကိုတော့ တောင်ကိုရီးယားစစ်တပ်က လတ်တလောမှာ တိကျစွာ ရှင်းလင်းပြောဆိုခြင်း မပြုခဲ့ဘူးလို့ သိရပါတယ်။
ပထမဆုံး သူလျှိုဂြိုဟ်တုဖြစ်တဲ့ Malligyong-1 ကို နိုဝင်ဘာ ၂၁ ရက်မှာ လွှတ်တင်ခဲ့ပြီးနောက် အိမ်ဖြူတော်နဲ့ ပင်တဂွန်အပါအဝင် အမေရိကန်နဲ့ တောင်ကိုရီးယားရှိ အဓိကနေရာတွေရဲ့ ဓါတ်ပုံတွေကို ပေးပို့ခဲ့ကြောင်း မြောက်ကိုရီးယားက ပြောဆိုခဲ့ပါတယ်။ သို့ပေမယ့် ယင်းဓါတ်ပုံတွေကို ထုတ်ပြခဲ့ခြင်းမျိုးတော့ မရှိခဲ့တာကြောင့် ဂြိုဟ်တုရဲ့ စွမ်းဆောင်ရည်နဲ့ ပတ်သက်လို့ သံသယတွေ ကျယ်ကျယ်ပြန့်ပြန့် ဖြစ်ပေါ်စေခဲ့ပါတယ်။
Ref: abc News