မြေမြှုပ်မိုင်းကိစ္စ ကမ္ဘောဒီးယားက တောင်းပန်ရန် ထိုင်း တောင်းဆို

        
ထပ်မံထောင်ထားသော မြေမြှုပ်မိုင်းများကြောင့် ထိုင်းစစ်သားများ ဒဏ်ရာရရှိခဲ့သည်ဟု စွပ်စွဲခဲ့ပြီးနောက် ယင်းကိစ္စနှင့်ပတ်သက်၍ ကမ္ဘောဒီးယားအနေဖြင့် တောင်းပန်ရန် ထိုင်းက တောင်းဆိုခဲ့ကြောင်း နိုင်ငံခြားရေးဝန်ကြီးဌာန အရာရှိတစ်ဦးက နိုဝင်ဘာလ ၁၂ ရက်နေ့တွင် ပြောကြားခဲ့သည်။ အမေရိကန်သမ္မတ ဒေါ်နယ်ထရမ့်ပ်က ကြားဝင်၍ စေ့စပ်ပေးခဲ့သော အပစ်ရပ်သဘောတူညီမှုအရ အပစ် ရပ်ဆိုင်းခဲ့အပြီး နောက်တစ်နေ့တွင် ထိုင်းဘက်က ယခုကဲ့သို့ တောင်းဆိုလာခြင်းဖြစ်သည်။
           
နှစ်နိုင်ငံအကြား အငြင်းပွားနယ်စပ်တလျှောက်ကင်းလှည့်နေသည့် ထိုင်းစစ်သားတစ်ဦး ကို ကိုယ်အင်္ဂါဆုံးရှုံး‌စေခဲ့သည့် နိုဝင်ဘာလ ၁၀ ရက်‌‌နေ့က‌ ပေါက်ကွဲခဲ့သော မိုင်းအပါအဝင် မြေမြှုပ်မိုင်းအသစ်များကိုထပ် ထောင်ထားခဲ့သည်ဆိုသော စွပ်စွဲချက်ကို ကမ္ဘောဒီးယားဘက်က ငြင်းဆိုခဲ့သည်။ ယင်းဖြစ်စဉ်ကြောင့် ဇူလိုင်လအတွင်းက ငါးရက်ကြာ ပဋိပက္ခဖြစ်ပွားပြီးနောက်တွင် တင်းမာမှုများ တဖန်ပြန်ဖြစ်လာခဲ့သည်။ 
            
“ကမ္ဘောဒီးယားဘက်က တောင်းပန်ချက် ထုတ်ပြန်တာမျိုးကို ကျွန်တော်တို့ လိုလားပါတယ်” ထိုင်းနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ နီကွန်းဒက် ဘာလန်ကူရာက သတင်းထောက်များကို ပြောကြားခဲ့သည်။
        
“ ဖြစ်ပျက်ခဲ့တဲ့ အကြောင်းချင်းရာတွေအတွက် ဘယ်သူ့မှာ တာဝန်ရှိသလဲဆိုတာကို ဖော်ထုတ်ဖို့ သူတို့ကို တောင်းဆိုခဲ့ပြီး နောင်ကို ဒါမျိုးထပ်မဖြစ်ရအောင် ကာကွယ်ဖို့ရာ အစီအမံတွေ ချမှတ်သွားဖို့ တောင်းဆိုခဲ့ပါတယ်” ဟု လည်း၎င်းက ပြောကြားခဲ့သည်။
      
ထိုင်းဘက်က တောင်းဆိုချက်နှင့် ပတ်သက်၍ ကမ္ဘောဒီးယားအစိုးရ ပြောရေးဆိုခွင့်ရှိသူတစ်ဦးက မှတ်ချက်ပေးရန် ငြင်းဆန်ခဲ့သည်။

Ref: သည်စထရိတ်တိုင်းမ်စ်