KNLA၊ PDF ပူးပေါင်းအဖွဲ့များ၏ ဝင်ရောက်တိုက်ခိုက်မှုကြောင့် ယာယီလက်လွှတ်ခဲ့ရသည့် မြဝတီမြို့စောင့်တပ် ခလရ (၂၇၅) ကိုတပ်မတော်မှ ပြန်လည်ထိန်းချုပ်ရာတွင် KNA တို့က ပူးပေါင်းရပ်တည်ပေးခဲ့ကြောင်း သိရသည်။
ပြီးခဲ့သည့် ဧပြီ (၁၁) ရက်က စတင်ကာ (၁၀) ရက်ကျော် လက်လွှတ်ခဲ့ရသည့် ခလရ (၂၇၅) ကို ယနေ့ ဧပြီလ (၂၃) ရက် နေ့လယ်ပိုင်းက ပြန်လည်ထိန်းချုပ်လိုက်နိုင်ခြင်း ဖြစ်ကြောင်း KNA နှင့် နီးစပ်သည့် သတင်းရင်းများထံမှ သိရသည်။
ခလရ (၂၇၅) တိုက်ခိုက်ခံရချိန်က ခွာစစ်ဆင်ခဲ့ပြီး ထိုင်း – မြန်မာ အမှတ်(၂) ချစ်ကြည်ရေးတံတားသို့ ပြောင်းရွေ့နေခဲ့ရသည့် တပ်ဖွဲ့ဝင် (၂၀၀) ဝန်းကျင်သည် ယနေ့ နေ့လယ်ပိုင်းတွင် ခလရ (၂၇၅) စခန်းအတွင်းပြန်လည်ဝင်ရောက်နိုင်ခဲ့ပြီဖြစ်ကြောင်း မြဝတီဒေသခံသ တင်းရင်းမြစ်များကလည်း အတည်ပြု ပြောကြားသည်။
အဆိုပါ တပ်ဖွဲ့ဝင် (၂၀၀) ကျော် ရှိနေသည့် အမှတ်(၂) ချစ်ကြည်ရေးတံတားရှိ အဆောက်အဦများကို ဧပြီ (၂၀) ရက် နံနက်အစောပိုင်းက KNLA နှင့် PDF ပူးပေါင်းအဖွဲ့များ ထပ်မံတိုက်ခိုက်ခဲ့သည့်အတွက် တပ်မတော်မှ လေကြောင်းပစ်ကူဖြင့် တန်ပြန်တိုက်ခဲ့ရာ ဧပြီ (၂၁) ရက်တွင် KNLA နှင့်ပူးပေါင်းအဖွဲ့များ ဆုတ်ခွာသွားခဲ့ရသည်။
ယင်းသို့ဆုတ်ခွာသွားသည့်အတွက် မြဝတီမြို့နှင့်အနီးတဝိုက်တွင် တိုက်ပွဲများ ပြန်လည်ငြိမ်သက်သွားခဲ့ပြီး ယနေ့နေ့လယ်ပိုင်းတွင် တပ်မတော်က ခလရ(၂၇၅) ကို ပြန်လည်ထိန်းချုပ်လိုက်နိုင်ခြင်းလည်း ဖြစ်သည်။
မြဝတီမြို့အနီး တိုက်ပွဲအတွင်း အရပ်သား (၅) ဦး ေ-သဆုံးခဲ့ပြီး (၅) ဦးထက်မနည်း ထိခိုက်ဒဏ်ရာ ရရှိခဲ့ပြီး လူနေအိမ်နှင့် အဆောက်အဦအချို့ ပျက်စီးဆုံးရှုံးခဲ့ကြောင်း ဒေသတွင်း သတင်းရင်းမြစ်များထံမှ သိရသည်။
ခလရ (၂၇၅) စတင်တိုက်ခိုက်ခံရချိန်မှ စတင်ကာ မြဝတီမြို့ လုံခြုံရေးကို BGF အသွင်ပြောင်း KNA က တာဝန်ယူပေးထားပြီး မြို့ပေါ်၌ ကင်းလှည့်ခြင်းကို ဆောင်ရွက်လျက်ရှိနေခြင်းလည်း ဖြစ်သည်။
ခလရ (၂၇၅) ကို တပ်မတော်က ပြန်လည် ထိန်းချုပ်နိုင်ရန် KNA က အကူညီပေးခဲ့သည် ဆိုသည့်သတင်းနှင့် ပတ်သက်၍ KNA ၏ တာဝန်ရှိသူများဖြစ်သည့် ဗိုလ်မှူးကြီး စောချစ် သူ၊ ဗိုလ်မှူးကြီး စောတင်ဝင်းနှင့် ဗိုလ်မှူးနိုင်မောင်ဇော်တို့ထံ ဆက်သွယ်ရန်ကြိုးစားခဲ့သော်လည်း ဖုန်းအဆက်အသွယ်မရသဖြင့် အတည်ပြုနိုင်ခြင်း မရှိခဲ့ပေ။
