တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၁၇ ရက် နံနက်ပိုင်းတွင် ပေကျင်းမြို့ရှိ China Railway Construction Corporation Limited (CRCC) သို့ သွားရောက်လေ့လာခဲ့ကြောင်း သိရသည်။
CRCC သည် ၁၉၄၈ ခုနှစ်တွင် တရုတ်ပြည်သူ့လွတ်မြောက်ရေးတပ်မတော် (PLA) ၏ Railway Corps အဖြစ် စတင်တည်ထောင်ခဲ့ပြီး ယခုအခါ ကမ္ဘာ့ထိပ်တန်း အခြေခံအဆောက်အအုံ တည်ဆောက်ရေးကုမ္ပဏီများအနက် တစ်ခုအဖြစ် ရပ်တည်လျက်ရှိသည်။
လေ့လာရေးခရီးစဉ်အတွင်း နိုင်ငံတော်သမ္မတသည် CRCC ၏ သမိုင်းမှတ်တမ်းဓာတ်ပုံများ၊ မှတ်တမ်းအထောက်အထားများ၊ မီးရထားတပ်ဖွဲ့၏ သမိုင်းကြောင်းများ၊ အမြန်ရထားစီမံကိန်းများနှင့် မြန်မာနိုင်ငံအပါအဝင် နိုင်ငံတကာ၌ ဆောင်ရွက်နေသည့် အခြေခံအဆောက်အအုံစီမံကိန်းများကို ကြည့်ရှုလေ့လာခဲ့သည်။
ထို့နောက် CRCC ဥက္ကဋ္ဌက မြန်မာနိုင်ငံတွင် မီးရထားလမ်းများ၊ ကားလမ်းများ၊ မြေအောက်ရထားလမ်းများ၊ လေဆိပ်များနှင့် Smart City စီမံကိန်းများ တည်ဆောက်ခြင်း၊ ပြုပြင်မွမ်းမံခြင်းနှင့် အဆင့်မြှင့်တင်ခြင်းလုပ်ငန်းများတွင် CRCC ၏ အတွေ့အကြုံနှင့် နည်းပညာများဖြင့် ပူးပေါင်းပါဝင်ဆောင်ရွက်လိုကြောင်း ရှင်းလင်းတင်ပြခဲ့သည်။
ယင်းအပေါ် နိုင်ငံတော်သမ္မတက သိရှိလိုသည်များကို မေးမြန်းဆွေးနွေးခဲ့ပြီး မြန်မာနိုင်ငံနှင့် CRCC တို့အကြား အနာဂတ်ပူးပေါင်းဆောင်ရွက်နိုင်မည့် အခြေအနေများကို အမြင်ချင်းဖလှယ်ဆွေးနွေးခဲ့ကြသည်။
CRCC သည် ကမ္ဘာ့အမြင့်ဆုံးနှင့် အရှည်ဆုံးကုန်းပြင်မြင့် မီးရထားလမ်းဖြစ်သည့် ကျင်းဟိုင်–တိဘက် (Qinghai–Tibet) မီးရထားလမ်း တည်ဆောက်ရေးလုပ်ငန်းတွင် ၇၀ ရာခိုင်နှုန်းခန့် ပါဝင်ဆောင်ရွက်ခဲ့သည့်အပြင် ပေကျင်း–ရှန်ဟိုင်း အမြန်ရထားလမ်း စီမံကိန်း၏ ၄၆ ရာခိုင်နှုန်းကိုလည်း တာဝန်ယူဆောင်ရွက်ခဲ့ကြောင်း သိရသည်။
ထို့ပြင် CRCC သည် ယနေ့အချိန်အထိ မီးရထားလမ်းနှင့် အမြန်ရထားလမ်း ကီလိုမီတာ ၁၃၀,၀၀၀ ကျော်၊ အဝေးပြေးလမ်းမ ၅၀,၀၀၀ ကျော်၊ တံတား ၂၈,၀၀၀ ကီလိုမီတာကျော်နှင့် ဥမင်လိုဏ်ခေါင်း ၂၆,၀၀၀ ကီလိုမီတာကျော်တို့ကို ကမ္ဘာ့နိုင်ငံများစွာတွင် တည်ဆောက်ခဲ့ပြီး နိုင်ငံနှင့်ဒေသပေါင်း ၁၄၈ ခု၌ လုပ်ငန်းများ ဆောင်ရွက်လျက်ရှိကြောင်း သိရသည်။