တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် တရုတ်နိုင်ငံသမ္မတ မစ္စတာ ရှီကျင့်ဖျင်တို့သည် ဇွန် ၁၆ ရက် နံနက်ပိုင်းတွင် ပေကျင်းမြို့ရှိ Great Hall of the People ၌ တွေ့ဆုံဆွေးနွေးခဲ့ကြပြီး နှစ်နိုင်ငံ ပူးပေါင်းဆောင်ရွက်မှု မြှင့်တင်ရေးဆိုင်ရာ နားလည်မှုစာချွန်လွှာနှင့် သဘောတူစာချုပ် ၁၈ ခုကို လက်မှတ်ရေးထိုး လဲလှယ်ခဲ့ကြသည်။
လက်မှတ်ရေးထိုးခဲ့သည့် သဘောတူညီချက်များတွင် ကမ္ဘာလုံးဆိုင်ရာ လုံခြုံရေးအစီအမံ (GSI)၊ ကမ္ဘာလုံးဆိုင်ရာ ယဉ်ကျေးမှုအစီအမံ (GCI) နှင့် ကမ္ဘာလုံးဆိုင်ရာ ဖွံ့ဖြိုးတိုးတက်ရေးအစီအမံ (GDI) တို့ကို ပူးတွဲအကောင်အထည်ဖော်ရေးဆိုင်ရာ သဘောတူညီချက်များ ပါဝင်ခဲ့သည်။
ထို့ပြင် လူ့စွမ်းအားအရင်းအမြစ် ဖွံ့ဖြိုးတိုးတက်ရေး၊ ကျန်းမာရေးကဏ္ဍ၊ သိပ္ပံနှင့် နည်းပညာ၊ မီဒီယာ၊ ဉာဏပစ္စည်းမူပိုင်ခွင့်နှင့် ယှဉ်ပြိုင်မှုဆိုင်ရာ ပူးပေါင်းဆောင်ရွက်ရေး ကဏ္ဍများတွင်လည်း နားလည်မှုစာချွန်လွှာများ လက်မှတ်ရေးထိုးခဲ့ကြသည်။
စီးပွားရေးနှင့် ကုန်သွယ်ရေးကဏ္ဍတွင် မြန်မာနိုင်ငံမှ တရုတ်နိုင်ငံသို့ ဆေးဘက်ဝင်အပင်များ၊ လတ်ဆတ်သော ငှက်ပျောသီးများနှင့် စားသုံးရန် ရေထွက်ကုန်များ တင်ပို့နိုင်ရေးဆိုင်ရာ သဘောတူစာချုပ်များကို ချုပ်ဆိုခဲ့ကြပြီး၊ မဟာမဲခေါင်ဒေသခွဲ နယ်စပ်ဖြတ်ကျော် သယ်ယူပို့ဆောင်ရေး လွယ်ကူချောမွေ့စေရေးဆိုင်ရာ သဘောတူညီချက်ကိုလည်း ရရှိခဲ့သည်။
အားကစားကဏ္ဍတွင် အောင်ဆန်းအားကစားကွင်းသစ် ပြန်လည်တည်ဆောက်ရေးစီမံကိန်းအတွက် တရုတ်နိုင်ငံဘက်မှ အကူအညီပေးအပ်ရေးဆိုင်ရာ စာချွန်လွှာကို လက်မှတ်ရေးထိုးခဲ့သည်။
ထို့အပြင် မြေငလျင်ဘေးဒဏ်သင့်ဒေသများအတွက် အရေးပေါ် လူသားချင်းစာနာထောက်ထားမှုဆိုင်ရာ နည်းပညာအကူအညီများ လွှဲပြောင်းပေးအပ်ရေး သဘောတူညီချက်ကိုလည်း ချုပ်ဆိုခဲ့ကြသည်။
အဆိုပါ နားလည်မှုစာချွန်လွှာနှင့် သဘောတူစာချုပ် ၁၈ ခုသည် မြန်မာ-တရုတ် နှစ်နိုင်ငံအကြား မဟာဗျူဟာမြောက် ပူးပေါင်းဆောင်ရွက်မှုကို ပိုမိုနက်ရှိုင်းစေမည့်အပြင် ကုန်သွယ်ရေး၊ အခြေခံအဆောက်အအုံ၊ ပညာရေး၊ ကျန်းမာရေးနှင့် ပြည်သူအချင်းချင်း ဖလှယ်ရေးကဏ္ဍများတွင် အခွင့်အလမ်းသစ်များ ဖန်တီးပေးနိုင်မည်ဟု သုံးသပ်မှုများ ထွက်ပေါ်လျက်ရှိသည်။