မြန်မာနိုင်ငံတွင်သတ္တုထုတ်လုပ်လိုပါက မြန်မာနိုင်ငံသို့လာရောက်ဆွေးနွေးရန် နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်မှ ယနေ့ သြဂုတ် ၃၁ ရက်နံနက်ပိုင်းက မြန်မာ-တရုတ် စီးပွားရေးပူးပေါင်းဆောင်ရွက်မှုမြှင့်တင်ရေးတွေ့ဆုံပွဲတွင် ဆွေးနွေးဖိတ်ခေါ်ခဲ့သည်။
တွေ့ဆုံပွဲတွင် မြန်မာနိုင်ငံ၏ သတ္ထုတူးဖော်ရေးလုပ်ငန်းများ အဆင့်မြှင့်တင်နိုင်ရေးနှင့် စွမ်းအင်ထုတ်လုပ်ရေးကဏ္ဍမြှင့်တင်နိုင်ရေးလုပ်ငန်းများ၌ ရင်းနှီးမြှုပ်နှံမှုများဆောင်ရွက်လိုမှုနှင့်ပတ်သက်၍ တရုတ်စီးပွားရေးလုပ်ငန်းရှင်များက မေးမြန်းခဲ့ကြသည်။
အဆိုပါ မေးမြန်းမှုများအား နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌမှ သတ္ထုတူးဖော်မှုအဆင့်မြှင့်တင်ရေးလုပ်ငန်းများနှင့်ပတ်သက်၍ မြန်မာနိုင်ငံမှထွက်ရှိသည့် သဘာဝသယံဇာတ ပစ္စည်းများအား ကုန်ကြမ်းအဖြစ်ပြည်ပနိုင်ငံများသို့ တင်ပို့ခြင်းကို ခွင့်မပြုထားသော်လည်း ကုန်ချောအဖြစ်ထုတ်လုပ်တင်ပို့ခြင်းကိုခွင့်ပြုပေးထားသည်ဟု ပြန်လည်ဖြေကြားသည်။
ထို့ကြောင့် သယံဇာတများထုတ်ယူခြင်းမှာ သဘာဝပတ်ဝန်းကျင်ကိုထိခိုက်စေသဖြင့် သဘာဝပတ်ဝန်းကျင်ထိန်းသိမ်းခြင်းလုပ်ငန်းများကို မဖြစ်မနေ ဆောင်ရွက်ရမည်ဖြစ်၍ မြန်မာနိုင်ငံတွင်သတ္ထုထုတ်လုပ်ခြင်းလုပ်ငန်းများကိုဆောင်ရွက်လိုပါက မြန်မာနိုင်ငံသို့ လာရောက်ဆွေးနွေးရန်ဖိတ်ခေါ်ခဲ့သည်။
ထို့အတူ စွမ်းအင်ကဏ္ဍနှင့် သဘာဝဓာတ်ငွေ့ထုတ်လုပ်ခြင်းများအတွက်လည်း လာရောက်ဆွေးနွေးနိုင်ကာ မိမိအနေဖြင့် ပြန်လည်ပြည့်ဖြိုးမြဲစွမ်းအင်ထုတ်လုပ်မှုကို ပထမဦးစားပေးအနေဖြင့် ဆောင်ရွက်လျက်ရှိပြီး Waste To Energy ကိုလည်း ဒုတိယဦးစားပေးအနေဖြင့်စိတ်ဝင်စားသော်လည်း ထုတ်လုပ်မှုအတွက် ကုန်ကျစရိတ်ကိုထည့်သွင်းတွက်ချက်ရန်လိုသည်ဟုလည်း နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌက ပြန် လည်ဖြေကြားခဲ့သည်။
ထို့ပြင် မြန်မာ-တရုတ် နှစ်နိုင်ငံကြား ရင်းနှီးမြှုပ်နှံမှုများဖွံ့ဖြိုးတိုးတက်ရေးအတွက် မြန်မာ-တရုတ်စီး ပွားရေးလုပ်ငန်းရှင်များပူးပေါင်းဆောင်ရွက်ရေးအဖွဲ့ဖွဲ့စည်း၍ လုပ်ငန်းများမြန်ဆန်စွာဖွံ့ဖြိုးတိုးတက်စေရေး အကောင်အထည်ဖော်ဆောင်ရွက်နိုင်ရန်လိုသည်ဟုလည်း ဆွေးနွေးပြောကြားခဲ့သည်။