မြန်မာ၊ ကမ္ဘောဒီးယားနှင့် ထိုင်းနိုင်ငံတို့အကြား တိုက်ရိုက်လေကြောင်းလိုင်းများ ပြေးဆွဲနိုင်ပါက မြန်မာနိုင်ငံသို့ နိုင်ငံတကာခရီးသွားဝင်ရောက်မှု ပိုမိုတိုးတက်လာနိုင်ကြောင်း Mekong Tourism Forum 2026 တွင် ဆွေးနွေးခဲ့ကြကြောင်း သိရသည်။
ဖိုရမ်ကို ရန်ကုန်မြို့ရှိ Pan Pacific Hotel တွင် ကျင်းပလျက်ရှိပြီး မဲခေါင်ဒေသ (၆) နိုင်ငံဖြစ်သည့် မြန်မာ၊ တရုတ်၊ ကမ္ဘောဒီးယား၊ လာအို၊ ထိုင်းနှင့် ဗီယက်နမ်နိုင်ငံတို့မှ ခရီးသွားလုပ်ငန်းဆိုင်ရာ တာဝန်ရှိသူများ၊ ကိုယ်စားလှယ်များနှင့် နိုင်ငံတကာခရီးသွားလုပ်ငန်း ကျွမ်းကျင်သူများ တက်ရောက်ဆွေးနွေးခဲ့ကြသည်။
မြန်မာနိုင်ငံ ခရီးသွားအဖွဲ့ချုပ်ဥက္ကဋ္ဌ ဦးရန်ဝင်းက မြန်မာနိုင်ငံ၏ ခရီးသွားကဏ္ဍ ဖွံ့ဖြိုးတိုးတက်ရေးအတွက် ခရီးသွားဝင်ရောက်မှုမြင့်မားသည့် နိုင်ငံများနှင့် တိုက်ရိုက်လေကြောင်းချိတ်ဆက်မှုများ အရေးကြီးကြောင်း ပြောကြားခဲ့သည်။
“လက်ရှိမှာ ကမ္ဘောဒီးယားနိုင်ငံနဲ့ တိုက်ရိုက်လေကြောင်းခရီးစဉ် ပြေးဆွဲနိုင်ရေး ကြိုးပမ်းဆောင်ရွက်နေပါတယ်။ အန်ကောဝပ်ဒေသကို နှစ်စဉ် နိုင်ငံတကာခရီးသွား သန်းနှင့်ချီ လာရောက်ကြတဲ့အတွက် မြန်မာနိုင်ငံနဲ့ တိုက်ရိုက်ချိတ်ဆက်နိုင်မယ်ဆိုရင် ပုဂံအပါအဝင် အခြားခရီးသွားဒေသတွေကို ခရီးသွားဧည့်သည် ပိုမိုဝင်ရောက်လာနိုင်ပါတယ်” ဟု ၎င်းက ပြောကြားခဲ့သည်။
မြန်မာ၊ ကမ္ဘောဒီးယားနှင့် ထိုင်းနိုင်ငံတို့သည် ပထဝီဝင်အနေအထားအရ ဆက်စပ်တည်ရှိသည့်အပြင် ယဉ်ကျေးမှုနှင့် သမိုင်းအမွေအနှစ်များလည်း ဆက်နွှယ်မှုရှိသဖြင့် နိုင်ငံတကာခရီးသွားများ စိတ်ဝင်စားသည့် ဒေသတစ်ခုအဖြစ် ရပ်တည်နေကြောင်း သိရသည်။
ထို့ကြောင့် သုံးနိုင်ငံအကြား တိုက်ရိုက်လေကြောင်းလိုင်းများ ပြေးဆွဲနိုင်ရေးကို ခရီးသွားလုပ်ငန်းအဖွဲ့အစည်းများနှင့် ခရီးသွားအေဂျင်စီများက မျှော်လင့်ထားကြပြီး ယင်းအစီအစဉ် အကောင်အထည်ဖော်နိုင်ပါက မြန်မာနိုင်ငံ၏ ခရီးသွားလုပ်ငန်း ရေရှည်ဖွံ့ဖြိုးတိုးတက်ရေးအတွက် အထောက်အကူပြုမည်ဟု သုံးသပ်ထားကြကြောင်း သိရသည်။