တရုတ်နိုင်ငံနှင့် မြန်မာနိုင်ငံရှိအထည်ချုပ်လုပ်ငန်းရှင် ၁ဝဝ ခန့် လာရောက်ပြသမည့် မြန်မာ့အထည်အလိပ်နှင့် စက်ယန္တရား ကုန်စည်ပြပွဲ ၂ဝ၂၅ ပြပွဲကို Inya Lake Hotel, Yangon Convention Center (YCC) ၌ ပြုလုပ်သွားမည်ဖြစ်သည်။
အဆိုပါကုန်စည်ပြပွဲကို ၂၀၂၅ ခုနှစ်၊ ဒီဇင်ဘာလ ၅၊ ၆၊ ၇ ရက်တို့တွင် (၃) ရက်တိုင်တိုင်ပြုလုပ်မည်ဖြစ်ပြီး တရုတ်နိုင်ငံ၊ Zhejiang ပြည်နယ်၊ ကူးသန်းရောင်းဝယ်ရေးဦးစီးဌာန၏ ပံ့ပိုးကူညီမှုဖြင့် မြန်မာနိုင်ငံအထည်ချုပ်လုပ်ငန်းရှင်များအသင်း (MGMA) နှင့် Chinese Textile & Garment Association In Myanmar (CTGA) တို့ ပူးပေါင်းကာ တရုတ်-မြန်မာနှစ်နိုင်ငံ အထည်အလိပ်နှင့် အထည်ချုပ်လုပ်ငန်းများ၊ မြန်မာနိုင်ငံနှင့် အာဆီယံနိုင်ငံများအကြား စီးပွားရေးဆိုင်ရာဆက်ဆံရေးများ၊ အလားအလာရှိသည့် စီးပွားရေးဆိုင်ရာပူးပေါင်းဆောင်ရွက်မှုများ ရေရှည်ပြုလုပ်နိုင်ရန်နှင့် မြန်မာနိုင်ငံရည်ရွယ်ကာ ပြုလုပ်ခြင်းဖြစ်သည်ဟု ဆိုသည်။
တရုတ်နိုင်ငံမှ အမှတ်တံဆိပ် ၁၀ ခုခန့်နှင့် အထည်အလိပ်နှင့် အဝတ်အထည်၊ ဆက်စပ်ပစ္စည်းများ၊ အဝတ် အထည်ဆိုင်ရာ စက်ပစ္စည်းများ ပြသသူ ၁၀၀ ကျော်တို့မှ ၎င်းတို့၏ ထုတ်ကုန်များကို လာရောက်ပြသကြမည်ဖြစ်ပြီး မြန်မာ့အသေးစားအလတ်စားလုပ်ငန်းများ၏ Made in Myanmar ထုတ်ကုန်များကိုလည်း မြှင့်တင်သွားမည်ဖြစ်သည်။
ထို့ပြင် အာဆီယံနိုင်ငံများမှ အထည်ချုပ်လုပ်ငန်းရှင်များအသင်းအဖွဲ့ဖြစ်သော ASEAN Federation of Textile (AFTEX) မှ ကျွမ်းကျင်သုံးသပ်သူများ၏ အထည်ချုပ်ကဏ္ဍ ဖွံ့ဖြိုးတိုးတက်မှုဆိုင်ရာ Panel Discussion များ၊ ဖျော်ဖြေရေးအစီအစဉ်များဖြစ်သော မြန်မာတိုင်းရင်းသားရိုးရာ ဝတ်စုံပြပွဲများ၊ တရုတ် – အာဆီယံနိုင်ငံများမှ ရိုးရာဝတ်စုံပြိုင်ပွဲများ၊ CMP and Local brands Fashion Show : Exhibitors’ Business Matching p Garment related industries များ၏ ဆွေးနွေးပွဲများဖြင့်လည်း စည်ကားသိုက်မြိုက်စွာ ကျင်းပသွားမည်ဖြစ်သည်။
ပြပွဲသို့ လာရောက်မည့်သူများအနေဖြင့်လည်း သက်ဆိုင်ရာပြခန်းများမှ ကိုယ်စားလှယ်များနှင့် တို-က်ရို-က်ဆက်သွယ်နိုင်မည့် အခွင့်အရေးများရရှိမည်ဖြစ်ကာ လုပ်ငန်းပိုင်းဆိုင်ရာများတွင်လည်း အကျိုးတူပူးပေါင်းဆောင်ရွက်မှုများကို မြှင့်တင်နိုင်မည်ဖြစ်သည်။
နိုင်ငံတကာမိတ်ဖက်များအနေဖြင့်လည်း ပြပွဲတွင်ခင်းကျင်းပြသမည့် ဒေသတွင်းအထည်အလိပ်နှင့် အထည်ချုပ်စက်ရုံများ၏ လုပ်ငန်းစွမ်းဆောင်ရည်နှင့် အဝတ်အထည်ထုတ်လုပ်မှုဆိုင်ရာ နောက်ဆုံးပေါ်နည်းပညာများကို လေ့လာနိုင်မည်ဖြစ်သကဲ့သို့ Made in Myanmar ထုတ်လုပ်သူများထံမှ ရောင်စုံဆန်းပြားသော အထည်အလိပ်ထုတ်ကုန်ပစ္စည်းများ၊ နောက်ဆုံးပေါ်နည်းပညာများနှင့် စက်ပစ္စည်းများကို လေ့လာခွင့်ရရှိမည်ဖြစ်သည်။
” မြန်မာနိုင်ငံအထည်အလိပ်လုပ်ငန်းသည် နိုင်ငံတကာဈေးကွက်ထဲမှာ ‘Made in Myanmar ဆိုတဲ့ နာမည်တံဆိပ်နဲ့ ယှဉ်ပြိုင်နိုင်ဖို့အတွက် သစ်လွင်တဲ့စက်ယန္တရားနည်းပညာများ၊ ထုတ်လုပ်မှုစနစ်တိုးတက်မှုများနဲ့ သက်ဆိုင်ရာမိတ်ဖက်နိုင်ငံများနှင့် ပိုမိုနီးကပ်ချိတ်ဆက်နိုင်ဖို့ အရေးကြီးပါတယ်။ MGMA အနေနဲ့ မြန်မာအထည်ချုပ်လုပ်ငန်းမှ ထုတ်ကုန်များအတွက် ဈေးကွက်အသစ်များရရှိရန် တက်ကြွစွာဆောင်ရွက်လျက်ရှိပြီး ကုန်စည်ပြပွဲများ၊ စီးပွားရေးမိတ်ဖက်တို-က်ရို-က်တွေ့ဆုံဆွေးနွေးပွဲများ၊ ကျင်းပပြုလုပ်ပေးခြင်းနှင့် အပြည်ပြည်ဆိုင်ရာ ကုန်စည်ပြပွဲများတွင် ဝင်ရောက်ပြသခြင်းဖြင့် မြန်မာ့အထည်ချုပ်လုပ်ငန်းကဏ္ဍရဲ့ လုပ်ကိုင်နိုင်စွမ်းကို တစ်ကမ္ဘာလုံးမှ ဝယ်လက်များသိအောင်လည်း ကြိုးစားဆောင်ရွက်လျက်ရှိပါတယ်။ ကျွန်တော်တို့အနေနဲ့ မြန်မာနိုင်ငံရှိ အထည်အလိပ်လုပ်ငန်းရှင်များအတွက် နည်းပညာအသစ်တွေကို သိရှိလာနိုင်ဖို့၊ နိုင်ငံတကာကုမ္ပဏီများနဲ့ ပေါင်းသင်းဆက်ဆံရေးတွေ ဖန်တီးနိုင်ဖို့ အခွင့်အလမ်းတွေ ပေးချင်ပါတယ်။ ဒီပြပွဲမှတစ်ဆင့် မြန်မာ့အထည်အလိပ်လုပ်ငန်းက နိုင်ငံတကာအဆင့်သို့ တက်လှမ်းသွားမည့် လမ်းကြောင်းကို ပိုမိုသိသာအောင် ဖော်ဆောင်နိုင်မယ်လို့ မျှော်လင့်ပါတယ်” ဟု မြန်မာနိုင်ငံအထည်ချုပ်လုပ်ငန်းရှင်များအသင်း၏ ဥက္ကဌ ဦးမြင့်စိုးက ပြောသည်။
ပြပွဲအား ၂၀၂၃ ခုနှစ်မှ စတင်ကာကျင်းပခဲ့ပြီး ပြပွဲသို့လာရောက်ကြည့်ရှုသူပေါင်း ၁,၅၀၀ ကျော်ခန့်ရှိခဲ့ကြောင်း သိရသည်။