မြန်မာ့ရွှေ ဂျပန်သို့ တင်ပို့ရန်ကိစ္စ လာရောက်လေ့လာဆဲအဆင့်သာရှိသေးဟုဆို

မြန်မာ့ရွှေအချောထည့်များကို ဂျပန်နိုင်ငံသို့ တင်ပို့ရန်ကိစ္စနှင့် ပတ်သက်၍ တစ်ဖက်နိုင်ငံမှ ကုန်သည်များအနေဖြင့် ပြည်တွင်းဈေးကွက်ကို လာရောက်လေ့လာသည့် အဆင့်သာ ရှိသေးကြောင်း ရန်ကုန်တိုင်း ရွှေအသင်းမှ သိရသည်။

ကိုဗစ်ကာလတွင် ရပ်နားသွားသည့် မြန်မာ့ရွှေအချောထည် ဂျပန်သို့ တင်ပို့သည့်အစီအစဉ်ကို ပြန်လည်စတင်နိုင်ရန်အတွက် ဂျပန်ဘက်မှ ကုမ္ပဏီများအနေဖြင့် ပြည်တွင်းသို့ လာရောက်ကာ ဈေးကွက်လေ့လာခြင်းများ လုပ်ဆောင်လျက်ရှိကြောင်း သိရသည်။

ထို့အပြင် ရန်ကုန်ရွှေအသင်း တာဝန်ရှိသူများနှင့်တွေ့ဆုံကာ နှစ်ဘက်ညှိနှိုင်းဆွေးနွေးမှုများလည်း လုပ်ဆောင်ခဲ့ကြောင်း သိရသည်။

“ပြန်ဆက်သွယ်ဖို့ ဈေးကွက်လာလေ့လာတဲ့ သဘောပါပဲ။ ကုန်သွယ်ရေးလိုင်စင်လုပ်တာ လွယ်သလား ၊ ဘဏ်ငွေလွှဲတာတွေမှာ ဘာတွေအပြောင်းအလဲရှိသေးလဲ ၊ လာတဲ့အချိန်မှာရော ကိုဗစ်နဲ့ပတ်သက်လို့ ဘာစည်းကမ်းချက်တွေရှိသေးလဲ အဲဒါတွေ လာလေ့လာတဲ့ သဘောပါပဲ ” ဟု ရန်ကုန်တိုင်း ရွှေအသင်းဥက္ကဋ္ဌ ဦးမျိုးမြင့်က ပြောသည်။

လက်ရှိတွင် ပြည်တွင်း ရွှေဈေးကွက်အတွင်း၌ ဈေးနှုန်းတက်ရိပ်ပြနေသော်လည်း အရောင်းအဝယ်အေးနေပြီး ဂျပန်ကုမ္ပဏီနှင့်ဆွေးနွေးရာတွင် ဈေးနှုန်းကိစ္စ ဆွေးနွေးခြင်းမရှိသေးကြောင်း သိရသည်။

အကယ်၍ အရောင်းအဝယ်စတင်ဖြစ်မည်ဆိုပါက ကမ္ဘာ့ရွှေဈေးနှုန်းပေါ်၌သာအခြေခံ၍ ဈေးနှုန်းသတ်မှတ်ကာအရောင်းအဝယ် ပြုလုပ်သွားမည်ဖြစ်ကြောင်း ဦးမြင့်မြင့်က ပြောသည်။

“ဟုတ်ပါတယ်၊ ကမ္ဘာ့ရွှေဈေးပေါ် အခြေခံပြီးတော့ပဲ သွားကြမှာပါ” ဟု ၎င်းက ဆိုသည်။

ဂျပန်ကုမ္ပဏီများအနေဖြင့် မြန်မာ့ရွှေကို ဝယ်ယူရာတွင် လက်ဝတ်ရတနာနှင့် အဆောင်ပစ္စည်းများ ၊ အရုပ်များစသည့် အချောထည်များကိုသာ ဝယ်ယူသွားရန် စိတ်ဝင်စားမှုရှိနေပြီး လေ့လာဆဲအဆင့်သာရှိသေးသည့်အတွက် မည်သည့်အချိန်တွင် အရောင်းအဝယ် စတင်လုပ်ဖြစ်မည်ကို အတိအကျမပြောနိုင်သေးကြောင်း သိရသည်။

လက်ရှိတွင် ပြန်တွင်းရွှေဈေးကွက်အတွင်း၌ အခေါက် ရွှေတစ်ကျပ်သားလျင် ၂၈ သိန်းကျပ်အထက် ပေါက်ဈေးရှိနေပြီး ရန်ကုန်ရွှေအသင်း၏ ယနေ့ရည်ညွှန်းဈေးမှာ ၂၁၆၄၂၀၀ ကျပ်ဖြစ်ကြောင်း သိရသည်။