မြန်မာ့ဘောလုံး အားကစား ဖွံ့ဖြိုးတိုးတက်ရေး လုပ်ငန်းများ ပူးပေါင်းဆောင်ရွက်ရန် အတွက် မြန်မာနိုင်ငံဘောလုံးအဖွဲ့ချုပ်နှင့် ဧရာ၀တီဘဏ်တို့ မိတ်ဖက်စာချုပ် ချုပ်ဆိုခြင်း (Partnership Contract) အခမ်းအနားကို ယနေ့ (ဖေဖော်ဝါရီ ၂၁ ရက်) နံနက် ၁၁ နာရီအချိန်က ရန်ကုန်မြို့ နိုဗိုတယ် ဟိုတယ်တွင် ကျင်းပခဲ့သည်။
အဆိုပါ အခမ်းအနားသို့ မြန်မာနိုင်ငံဘောလုံးအဖွဲ့ချုပ် ဒုဥက္ကဌ ဒေါက်တာစိုင်းဆမ်ထွန်းနှင့် အမှုဆောင်များ၊ အထွေထွေအတွင်းရေးမှူး ဦးကိုကိုသိန်း၊ မြန်မာနေရှင်နယ်လိဂ်ကော်မတီ ဥက္ကဌ ဦးဇော်မင်းသိန်း၊ အမှုဆောင်အရာရှိချုပ် ဦးစိုးမိုးကျော်နှင့် တာ၀န်ရှိသူများ၊ မြန်မာနေရှင်နယ်လိဂ်ကလပ်အသင်းပိုင်ရှင်များ၊ စပွန်ဆာကုမ္ပဏီများမှ တာ၀န်ရှိသူများ၊ လက်ရွေးစင် အားကစားသမားများနှင့် ဖိတ်ကြားထားသူများ တက်ရောက်ခဲ့ကြသည်။
ဧရာ၀တီဘဏ်အနေဖြင့် မြန်မာ့လက်ရွေးစင် အမျိုးသားအသင်းနှင့် အမျိုးသမီးအသင်း၊ ဖူဆယ်လက်ရွေးစင် အသင်းနှင့် ဖူဆယ်ပြိုင်ပွဲများ၊ သက်တမ်းအလိုက် လူငယ်လက်ရွေးစင်အသင်းများ နိုင်ငံတကာပြိုင်ပွဲများ ၀င်ရောက်ယှဉ်ပြိုင်ရန်၊ နိုင်ငံတကာခြေစမ်းပွဲများ ကစားနိုင်ရန်၊ ပြည်ပလေ့ကျင့်ရေး ခရီးစဉ်များ သွားရောက်နိုင်ရန်၊ မြန်မာနိုင်ငံဘောလုံးအဖွဲ့ချုပ်လက်အောက်ရှိ အကယ်ဒမီကျောင်းများ လည်ပတ်ဆောင်ရွက်ရန်နှင့် လူငယ်ဖွံ့ဖြိုးရေးစီမံကိန်းများ ဆောင်ရွက်နိုင်ရန် မြန်မာနိုင်ငံဘောလုံးအဖွဲ့ချုပ်ကို မိတ်ဖက်ပံ့ပိုးကူညီသူ Partnership အဖြစ် တစ်နှစ်အတွက် ကျပ်သိန်း ၁၀၅၀၀ (ကျပ်သိန်း တစ်သောင်းငါးရာ) ပံ့ပိုးကူညီမည်ဟု သိရသည်။
မြန်မာနေရှင်နယ်လိဂ်နှင့် AYA Pay တို့လည်းသဘောတူစာချုပ် ချုပ်ဆိုခဲ့ကြပြီး AYA Pay အနေဖြင့် ဖေဖော်ဝါရီ ၂၁ ရက်မှ စတင်ကာကျင်းပနေသည့် ၂၀၂၃ ရာသီ MNL အမှတ်ပေးပြိုင်ပွဲကို Supporting Partner အဖြစ် ကျပ်သိန်း တစ်သောင်း ပံ့ပိုးကူညီမည််ဖြစ်သည်။
၂၀၂၃ မြန်မာနေရှင်နယ်လိဂ် ကျင်းပနိုင်ရေးအတွက် Alpine သောက်ရေသန့်၊ RGK+ Z&A Group၊ Warrix အားကစားပစ္စည်း၊ PAN အားကစား ဖိနပ်၊ နိုဗိုတယ် ရန်ကုန်မက်စ် တို့ကလည်း Co-Sponsors များအဖြစ် ပံ့ပိုးကူညီလျက်ရှိသည်ဟု သိရပြီး AYA Pay နှင့်အတူ Host Broadcaster အဖြစ် SKY NET ရုပ်သံ၊ တရားဝင် မိတ်ဖက်များအဖြစ် Genius ၊ 100 PLUS ၊ AYA SYMPO ၊ Warrix ၊ ပူးတွဲစပွန်ဆာများ အဖြစ် CP FIVE STAR ၊ Fresh Air Con၊ Alpine ၊ MAX Energy နှင့် MAX Cement တို့ကလည်း အသီးသီး ဝိုင်းဝန်းကူညီ ပံ့ပိုးလျက်ရှိသည်ဟု သိရသည်။
