(၅၆)ကြိမ်မြောက် အာဆီယံနိုင်ငံခြားရေး ဝန်ကြီးများအစည်းအဝေးတွင် ထုတ်ပြန်ခဲ့သည့် ပူးတွဲကြေညာချက်သည် မြန်မာနိုင်ငံအရေးနှင့်ပတ်သက်၍ တစ်ဖက်သက်မမျှမတဖော်ပြထားသည့်အတွက် စိတ်ပျက်မိကြောင်း လက်မခံကြောင်း နိုင်ငံခြားရေးဝန်ကြီးဌာနက ပြောကြားထားသည်။
အာဆီယံ နိုင်ငံခြားရေး ဝန်ကြီးများ အစည်းအဝေး၏ ပူးတွဲကြေညာချက်နှင့် ပတ်သက်၍ နိုင်ငံခြားရေးဝန်ကြီး ဌာနက မြန်မာအစိုးရကိုယ်စား ထုတ်ပြန်သည့် သဘောထားမှတ်ချက်ကို ယမန်နေ့ ဇူလိုင်လ (၁၄) ရက်က ထုတ်ပြန်ခဲ့ခြင်းဖြစ်သည်။
အာဆီယံနိုင်ငံခြားရေးဝန်ကြီးများ၏ ပူးတွဲကြေညာချက်အပါအဝင် မည်သည့်ထုတ်ပြန်ချက်တွင်မဆို နိုင်ငံတစ်နိုင်ငံအား သီးခြားပစ်မှတ်ထား၍ ယင်း၏ ပြည်တွင်းရေးကိစ္စအား ဖော်ပြမှုသည် အာဆီယံပဋိညာဉ်စာတမ်းတွင် ပြဋ္ဌာန်းထားသည့် “ဝင်ရောက်မစွက်ဖက်ရေးမူ”နှင့် သွေဖည်နေသဖြင့် မြန်မာနိုင်ငံက မည်သည့်အခါကမျှ လက်ခံခြင်းမရှိကြောင်း ထည့်သွင်းပြောကြားထားသည်။
ထို့ပြင် မြန်မာနိုင်ငံဆိုင်ရာ ဖြစ်ပေါ်တိုးတက်မှုခေါင်းစဉ်အောက်၌ သက်ဆိုင်ရာနိုင်ငံ၏ ငြိမ်းချမ်းသောနည်းဖြင့် စစ်မှန်သည့် ဒီမိုကရေစီနိုင်ငံ ထူထောင်ရေးကြိုးပမ်းနေမှုများနှင့် သဘောထားရပ်တည်ချက်များကို ထည့်သွင်းစဉ်းစားခြင်းမရှိဘဲ ရေးသားထုတ်ပြန်ခဲ့ခြင်းသာဖြစ်ကြောင်းလည်း ပြောကြားထားသည်။
အဆိုပါ ပူးတွဲကြေညာချက်(မူကြမ်း)အား ညှိနှိုင်းစဉ် မြန်မာနိုင်ငံမှ အာဆီယံအဖွဲ့ဝင် နိုင်ငံတစ်နိုင်ငံအဖြစ် တာဝန်သိစွာဖြင့် ပါဝင်ဆွေးနွေးညှိနှိုင်းခဲ့သော်လည်း ပူးတွဲကြေညာချက်အား အပြီးသတ်ထုတ်ပြန်ကြေညာရာတွင် မြန်မာနိုင်ငံက အဆိုပြုပြင်ဆင်ဖြည့်စွက်ထည့်သွင်းလိုသည့်အချက်များ၊ မြန်မာနိုင်ငံ၏ သဘောထားနှင့် စိုးရိမ်ပူပန်မှုများကို လျစ်လျူရှုခဲ့ကြောင်း နိုင်ငံခြားရေးဝန်ကြီး ဌာနက ထောက်ပြထားသည်။
သို့ဖြစ်၍ အာဆီယံ နိုင်ငံခြားရေးဝန်ကြီးများ အစည်းအဝေး၏ ပူးတွဲကြေညာချက်တွင် ပါဝင်သည့် မြန်မာနိုင်ငံကိစ္စနှင့် ပတ်သက်သည့် အချို့အချက်များအပေါ် စိတ်ပျက်မိပြီး ယင်းဖော်ပြချက်များအား ပြတ်သားစွာ ပယ်ချပြီး ပါဝင်ပတ်သက်မှု မရှိကြောင်းနှင့် မြန်မာနိုင်ငံအနေဖြင့် ရှေ့လုပ်ငန်းစဉ် (၅)ရပ်နှင့်အညီ ဒီမိုကရေစီပြန်လည်ဖော်ဆောင်ရေး၊ နိုင်ငံတည်ငြိမ် အေးချမ်းမှုရှိရေးတို့ကို ဆောင်ရွက်သွားမည်ဖြစ်ကြောင်း မြန်မာအစိုးရကိုယ်စား နိုင်ငံခြားရေး ဝန်ကြီးဌာနက အသိပေးထားသည်။
(၅၆)ကြိမ်မြောက် အာဆီယံနိုင်ငံခြားရေးဝန်ကြီးများအစည်းအဝေးကို ဇူလိုင်လ (၁၁) ရက်က အင်ဒိုနီးရှားနိုင်ငံ၊ ဂျကာတာမြို့၌ ပြုလုပ်ခဲ့ခြင်းဖြစ်သည်။