မြန်မာလိမ်လည်မှုစင်တာမှ အကယ်ခံရသူ မလေး ၃၁ ဦး နေရပ်ပြန်

ဒီဇင်ဘာ ၂၀

မြဝတီမြို့ရှိ လိမ်လည်မှုစင်တာ အစုအဖွဲ့တစ်ခုမှ မလေးရှားနိုင်ငံသား ၃၁ ဦးကို အဆင့်မြင့် သံတမန်စစ်ဆင်ရေး အပြီးတွင် အောင်မြင်စွာ ပြန်လည်ပို့ဆောင်လိုက်ပြီဖြစ်ကြောင်း မလေးဘာသာစကားဖြင့် ထုတ်ဝေသော နေ့စဉ်ထုတ် စီနာဟာရီးယန်က ဖော်ပြသည်။

ထိုင်း-မလေးရှားနယ်စပ် အနီး ဘူကစ် ကာယူ ဟီတမ် လူဝင်မှုကြီးကြပ်ရေးဌာနသို့ စနေနေ့ ညနေ ၆ နာရီ ၅၀ မှာ ရောက်ရှိလာကြောင်း၊ ရောက်ရှိလာချိန်တွင် ၎င်းတို့ကို တော်ဝင်မလေးရှားရဲတပ်ဖွဲ့ထံသို့ ချက်ခြင်းလွှဲပြောင်းပေးအပ်ခဲ့ကြောင်းနှင့် လူလိမ်ဂိုဏ်း၏လုပ်ဆောင်မှုများကို ဆက်လက်စုံစမ်းစစ်ဆေးခဲ့ပါသည်။

ဒီဇင်ဘာလ အစောပိုင်းအတွင်း ဘန်ကောက်ရှိ မလေးရှားသံရုံးမှ လိမ်လည်ခံရသူများ၏ အမည်စာရင်းကို အတည်ပြုခဲ့သော်လည်း ၎င်းတို့အား ပြန်ပို့မှုကို ဥပဒေဆိုင်ရာ အတားအဆီးများကြောင့် နှောင့်နှေးမှုများရှိခဲ့သည်။

နိုင်ငံခြားရေး ဝန်ကြီးဌာန၏သတင်း ထုတ်ပြန်ချက်အရ အဆိုပါ အဖွဲ့ကို ပြည်တွင်း လူဝင်မှုကြီးကြပ်ရေး ဥပဒေအရ တရားမဝင် ဝင်ရောက်မှုကြောင့် စတင်ဖမ်းဆီးခဲ့ခြင်း ဖြစ်သည်။

ချုပ်နှောင်ထားသည့် လုပ်ငန်းစဉ်များ၊ တရားရုံးလုပ်ဆောင်ချက်များနှင့် ဒ-ဏ်ငွေများကြောင့် ၎င်းတို့ ပြန်လာရန် ချက်ချင်းစီစဉ်နိုင်ခြင်းမရှိကြောင်း နိုင်ငံခြားရေးဝန်ကြီး မိုဟာမက် ဟာဆန်က ပြောကြားခဲ့သည်။

ထိုင်း-မြန်မာနယ်စပ် တရားဥပဒေစိုးမိုးရေးဆိုင်ရာ ရှုပ်ထွေးခက်ခဲမှုများကို အာဏာပိုင်များက လမ်းကြောင်းရှာဖွေနေရသောကြောင့် လုပ်ငန်းစဉ်သည် အနည်းဆုံးသီတင်းနှစ်ပတ်ကြာမည်ဟု ၎င်းသည် ယခင်က အသိပေး‌ပြောကြားထားသည်။

လိမ်လည်မှုအဖွဲ့ကို ထိုင်းနိုင်ငံ၏ နိုင်ငံအဆင့် လွှဲပြောင်းပေးရေး ယန္တရားအရ သောကြာနေ့၌ လွတ်မြောက်လာခဲ့ကြသည်။ ဘန်ကောက်ရှိ မလေးရှားသံရုံးနှင့် တက်ခ်ခရိုင် လူဝင်မှုကြီးကြပ်ရေး အာဏာပိုင်များအကြား အကြိတ်အနယ် ညှိနှိုင်းပြီးနောက်၊ အရေးပေါ် ခရီးသွားစာရွက်စာတမ်းများ၊ မိသားစုထံ အသိပေးပြောကြားချက်များ၊ ထောက်ပံ့ပို့ဆောင်ရေးနှင့် မဲဆောက်မှ မလေးရှားနယ်စပ်သို့ ၂၆ နာရီကြာ အစောင့်အကြပ်များ အပါအဝင် ကောင်စစ်ရေးရာ ပံ့ပိုးကူညီမှုများပေးထားကြောင်း နိုင်ငံခြားရေးဝန်ကြီးဌာနက ပြောကြားခဲ့သည်။

ပြည်ထဲရေးဝန်ကြီးဌာန၊ လူဝင်မှုကြီးကြပ်ရေးဌာနနှင့် မလေးရှားနယ်စပ်ထိန်းချုပ်ရေးအေဂျင်စီတို့ကြား ချောမွေ့စွာ ညှိနှိုင်းဆောင်ရွက်ခြင်းကြောင့် မစ်ရှင်၏အောင်မြင်မှုကို ဝန်ကြီးဌာနက အသိအမှတ်ပြုခဲ့ပြီး အဖွဲ့၏ပြန်လည်လက်ခံရေးအစီအစဉ်တွင် ပူးပေါင်းဆောင်ရွက်မှုအတွက် ထိုင်းနှင့်မြန်မာအစိုးရတို့ကိုလည်း အထူးကျေးဇူးတင်ရှိကြောင်း ဖော်ပြခဲ့သည်။

နိုင်ငံခြားရေးဝန်ကြီးဌာနသည် ပြည်ပရှိ မလေးရှားနိုင်ငံသားများအား အကာအကွယ်ပေးရေး ကတိကဝတ်ကို ထပ်လောင်းပြောကြားခဲ့ပြီး ပိုမိုခေတ်မီဆန်းပြားသော အွန်လိုင်းအလုပ်အကိုင်ရှာဖွေရေးအသင်းအဖွဲ့များကို ရှောင်ရှားရန် နိုင်ငံသားများအား သတိပေးထားသည်။

Ref: မိုင်နျူးစ်