မြန်မာနှင့်နယ်စပ်တွင် ထိုင်းစစ်တပ်က စောင့်ကြည့် ထိန်းချုပ်နေ

KK Park မှ နိုင်ငံခြားသား ၁,၅၀၀ ကျော် ထိုင်းနိုင်ငံအတွင်းသို့ ထွက်ပြေးဝင်ရောက်ခဲ့သည့်အတွက် မဲဆောက်ခရိုင်အတွင်းရှိ ထိုင်း-မြန်မာနယ်စပ်ဧရိယာကို ထိုင်းဘုရင့်တပ်မတော်၏ နရဲစွမ်တပ်ဖွဲ့က စောင့်ကြည့်ထိန်းချုပ်လျက်ရှိကြောင်း စစ်ရေးသတင်းရင်းမြစ်တစ်ခုက စနေနေ့က ပြောကြားလိုက်သည်။

ကရင်ပြည်နယ် မြဝတီမြို့ရှိ KK Park အထူးစီးပွားရေးဇုန်ကို တပ်မတော်က စီးနင်းထိန်းချုပ်ခဲ့မှုကြောင့် ရင်းနှီးမြှုပ်နှံသူများ၊ လောင်းကစားနှင့်ဆက်စပ်သော အလုပ်သမားများနှင့် ထိုဒေသတွင် အခြေစိုက်သော နိုင်ငံခြားသားများသည် အလန့်တကြားဖြစ်ကာထိုင်းဘက်သို့ ထွက်ပြေးကြသဖြင့် ထိုင်းဘက်က ယခုကဲ့သို့ စောင့်ကြည့်နေခြင်းဖြစ်သည်။ အောက်တိုဘာလ ၂၂ ရက် နေ့မှစကာ လူအများအပြားသည် နယ်စပ်ကိုဖြ-တ်၍ ထိုင်းဘက်ကို ဝင်ရောက်ခဲ့ကြသည်။

နရဲစွမ်တပ်ဖွဲ့၏ Ratchamanu အထူးတပ်ဖွဲ့သည် နယ်စပ်တလျှောက်တွင် ကင်းလှည့်ခြင်းနှင့် စောင့်ကြည့်ခြင်းကို တိုးမြှင့်ဆောင်ရွက်ခဲ့သည်။ ယခုဖြစ်ရပ်နှင့်ပတ်သက်၍ ထိုင်း-မြန်မာ မြို့နယ်အဆင့် နယ်ခြားကော်မတီ(တီဘီစီ) မှတဆင့် မြန်မာဘက်ကို ကန့်ကွက်လွှာပို့ခဲ့ရာတွင် KK Park အတွင်းရှိ အဆောက်အအုံများကို ဖြိုချရာတွင် သတိထားဆောင်ရွက်ပေးရန်၊ နယ်စပ်နှစ်ဖက်ရှိ ဒေသခံများ ထိခိုက်နစ်နာမှုမဖြစ်စေအောင် ကာကွယ်ပေးရန် မြန်မာအာဏာပိုင်များကို တိုက်တွန်းထားသည်ဟု သတင်းရင်းမြစ်က ပြောကြားခဲ့သည်။

တာ့ခ်ပြည်နယ်ရှိ ထိုင်း-မြန်မာနယ်စပ်ကွပ်ကဲရေးစင်တာ၏ အဆိုအရ KK Park မှ ထိုင်းနိုင်ငံဘက်ထွက်ပြေးဝင်ရောက်ခဲ့သူများမှာ အမျိုးသား ၁,၃၃၀ ဦးနှင့် အမျိုးသမီး ၂၆၅ ဦး စုစုပေါင်း ၁,၅၉၅ ဦးရှိခဲ့ပြီဖြစ်ကြောင်း ၎င်းက ဆက်လက်ပြောကြားခဲ့သည်။

လူအများဆုံး အုပ်စုတွင် အိန္ဒိယလူမျိုး(၄၆၅) ဦးပါဝင်ခဲ့ပြီး ယင်းနောက်တွင် ဖိလစ်ပိုင်(၂၂၀) ဦး၊ တရုတ်(၁၈၅) ဦး၊ ဗီယက်နမ်(၁၅၁) ဦး နှင့် အီသီယိုပီးယား(၁၃၀) ဦးတို့ဖြစ်သည်။

ကျန်သူများမှာ ကင်န်ယာ၊ ပါကစ္စတန်၊ နီပေါ၊ ယူကရိန်း၊ အင်ဒိုနီးရှား၊ လာအို၊ တောင်အာဖရိက၊ ဂါနာ၊ နိုင်ဂျီးရီးယား၊ သီရိလင်္ကာ၊ ရဝမ်ဒါ၊ မြန်မာနှင့် ထိုင်းနိုင်ငံ အပါအဝင် နိုင်ငံပေါင်း ၂၀ ကျော်မှ လာရောက်ကြသူများဖြစ်ကြောင်း သိရသည်။

Ref: ဘန်ကောက်ပို့စ်